作為車迷，幾年前睇曼聯其中一個最大娛樂，就係睇班曼迷為普巴而嘈。

有人話佢懶、態度差、淨係識得轉髮型，踢三場好波就傷，傷完復出又要搵態；另一邊就話曼聯根本唔識用，浪費咗佢嘅能力。每逢普巴交出一腳靚長傳，前者就潛水；到佢中場甩波、慢慢行返去防守，後者又自動失蹤。車迷坐喺隔籬食花生，氣氛相當融洽。

嗰陣大家爭論嘅問題，係普巴到底有無辜負自己嘅天賦。但去到今日，再問呢條問題，好似已經有少少過時。

因為根據法國傳媒報道，摩納哥準備同普巴提早解約。呢位曾經嘅世界紀錄身價球員，加盟一年只踢咗6場、合共115分鐘，期間先後受傷7次。今個夏天本來係最後一次證明自己嘅機會，結果Pre-season只踢到45分鐘，返到大隊操練第一日又再整傷左大腿。

由祖雲達斯四連霸、歐聯決賽、£89m回歸曼聯，到25歲成為世界盃冠軍；再由曼聯棄將、祖雲達斯傷兵、禁藥停賽，跌到摩納哥都準備放棄。普巴上得有幾快，跌得就有幾急。

所以今次《死因研究》要解剖嘅，唔係普巴本人，而係佢作為頂級球員嘅生涯，以及一次又一次嘅復活計劃。

死者背景：佢唔係無兌現過天賦

講普巴殞落之前，或者有部份曼迷唔認同都唔定，我覺得呢條友全盛期真係幾撚勁。

2012年，19歲嘅普巴因為喺曼聯無乜上陣機會，完約後免簽去咗祖雲達斯。嗰陣嘅佢只係一個踢過7場一隊比賽嘅幼幼，但加盟第一季已經踢足37場，協助球隊贏得意甲冠軍。

之後幾年，普巴好似打機食咗Buff咁款極速升Level。佢有

Read more

寫在前頭，呢篇文最後得出嘅結論，可能只係阿媽係女人阿爸係男人。但由於泰萊話會退休，同燒雞翼一樣，如果而家唔食，以後就無機會再食。

舊年我寫過一篇《【車迷觀點】車路士與泰萊詛咒續集　用統計工具做不精確驗證》，嘗試將泰萊執法車路士嘅紀錄分開油王同BlueCo時代，再用統計工具驗證：佢係咪真係長期對車路士不利？又係咪喺2022年羅美路扯古古頭髮、引發全球車迷聲討之後收斂咗？

結果篇文出街之後，我先發現核心資料有錯，部分數字甚至無法追溯真正嘅比賽紀錄。既然證物本身都企唔住，後面寫得幾有道理都只係廢話，所以最後只能撤文、道歉，炒晒車，勁樣衰。

表面睇我有撤文，但其實篇文一直放咗喺草稿箱，提醒自己資料收集要再嚴謹少少。不過既然泰萊要退休，舊帳亦終於封盤，咁今日就容許我厚住面皮，再挑戰多一次。

車迷講咗十幾年：「泰萊一吹車仔，實有紅牌。」

咁由2012年第一場，到2026年最後一場，佢究竟趕過幾多個車路士球員出場？今次，我有齊CSV，有興趣，睇完再PM我。

四張紅牌，點解記憶中好似有四十張？

由2012年至2026年，泰萊合共執法車路士59場正式賽事。當中有幾多個車路士球員俾佢趕出場？

答案係

Read more

安素呢單嘢，一個月前，我仲笑住寫咗篇【割蓆聲明】。

由安素話自己將來想喺馬德里生活，到古古叫佢一齊去馬德里，再到經理人不斷研究離隊可能，成個6月幾乎每隔兩日就傳一次皇馬。最後皇馬可能真係俾人煩到頂唔順，罕有地喺官網發正式聲明，講明無直接或間接接觸安素，亦完全無意進行交易。

暗戀對象公開叫你唔好再有非分之想，正常人應該都會收拾心情，返屋企聽住失戀歌喊兩晚，然後重新做人。當時我亦以為，安素今個夏天嘅轉會故事差唔多可以收檔。

點知套劇居然可以原地換男主角。皇馬走咗，今次輪到曼城入場。

根據《The Athletic》報道，曼城成個夏天都對安素有認真興趣，佢更加係馬……那個男人補強中場嘅首選。不過去到呢一刻，曼城仍然未有正式報價，車路士亦唔打算繼續陪佢哋慢慢玩。球會已經公開落閘：英國時間星期五下午5點，即係香港時間星期六凌晨零時之前，£120m，夠鐘截單，逾時不候。

但再望清楚成件事，又有少少古怪。可能車仔今次想迫嘅，由始至終都唔止曼城咁簡單。

£120M唔係減價促銷，係唔想賣嘅價錢

首先要搞清楚一樣嘢：車路士無將安素列為非賣品，唔代表球會

Read more

講明，呢篇唔係咩怨婦文，單純係因為見到曼治又傷。

至少喺曼聯對PSG嘅熱身賽，佢踢咗不足20分鐘就離場，相信唔少曼迷以至車迷第一個反應都係：「又嚟？」

但今次似乎只係虛驚一場。卡域克賽後話曼治俾人踢中，球隊純粹小心為上，預防性收起；之後佢亦被影到自行上隊巴，睇落無乜大礙。

最值得寫嘅，唔係佢受傷，而偏偏就係大家點解會誤會。

一個普通碰撞、一次預防性換人，已經令人驚緊。三年前，曼聯用£55M買入呢位英格蘭國腳、車路士雙料年度最佳球員，再將7號波衫交到佢手上；三年後，曼聯踢過114場英超，曼治只正選25次，大家討論佢嘅方式亦變成：

「如果健康，其實有用。」
「踢返8號可能有得救。」
「做輪換都唔差吖。」

由核心級收購跌到要證明自己可以做輪換，就好似本身要做主角，最後變咗配角嘅飛鳥真咁款。

呢篇文唔係見到曼治疑似受傷離場，就走過抽水要寫嘅文。兩年前我做過一次曼治覆盤，當時判車路士每個決定都「冰冷、殘酷，但完全正確」。

兩年後重新開File，出售結論未必需要推翻，但我對曼治本人嘅部分判詞，可能真係落得太盡。

所以真正要問嘅，唔係曼治仲識唔識踢波，而係曼聯當年用£55M買入嘅到底係一個點樣嘅球員？今日佢仍然有得救，又能唔能夠證明宗交易買得啱？

£55M買咗個好球員，但買錯咗答案

首先要幫曼治講返句公道說話。2023年曼聯決定買佢，唔係完全無根無據，更加唔係單純見到英格蘭國腳就亂撳Purchase。

全盛期嘅曼治真係勁過。呢句說話由車迷口中講出嚟應該有說服力，亦足以解釋點解當年我哋會心痛。

曼治為車路士上陣195場、攻

Read more

繼續無人睇系列。不過我認為睇完呢篇，無論你係咩世代，都可以大條道理咁拎出嚟認叻。

上一篇文，我為咗查車仔六十年前點解兩度宣布訪港，最後兩次都無出現，小弟翻查咗一大堆六十年代香港報紙，總算為失蹤嘅車路士搵返個答案：一次係車仔自己甩底，另一次仲衰，臨出發前先搵富咸頂包。(笑)

本來案已破，篇已完，理論上工已收。但喺報紙堆入面，我意外發現失蹤嘅好似唔止車路士支球隊，連「車路士」呢個名本身都失蹤埋。

我知我知，講到呢個位，一定會有老鬼巴打跳出嚟：「以前唔係叫車路士，係叫修爾斯。」

畢竟呢個答案太過理所當然。老一輩叫修爾斯，後來先改叫車路士，成件事好似已經係香港車迷之間一段約定俗成嘅常識。老實講，如果唔係今次無意中望到嗰堆舊報紙，我自己都從來無諗過要懷疑。

但修爾斯到底係幾時出現？車路士又係幾時開始有人叫？兩者之間，真係曾經有過一次由舊名換成新名嘅「改名」？

就係咁，上一宗失蹤案先啱啱結束，我又順手開咗一宗根本無人委託嘅案件。今次要搵嘅唔係失蹤嘅球隊，而係我哋叫咗幾十年、但好似從來無人認真查過嘅名。

最初根本無標準答案

當我真正逐份報紙揭落去，第一個發現係：六十年代香港傳媒根本未決定呢間球會應該叫咩名。

其中最搶鏡嘅，當然係

「查爾斯亞」。

《工商晚報》1965-02-19

第一眼見到嗰陣，我仲以為自己睇錯，或者舊報紙掃描得太矇，認錯咗其中一兩隻字。但再三確認之後，無錯，當年真係有人將Chelsea譯成「查爾斯亞」。

除咗查爾斯亞，報紙上面仲先後出現過「車利士」同「車沙隊」，同一間球會，單係中文名已經可以砌出幾套唔同版本。

《工商晚報》1965-03-05

《華僑日報》1966-04-29

今日睇返，呢堆名當然有種山寨Game角色譯名嘅味道。但將今日已經統一嘅譯名標準放返落六十年代，其實並唔公平。至少從我今次搵到嘅報道所見，當時各間報館有各自嘅譯法，同一個年代亦可以同時出現幾種叫法。

單靠呢批報紙，我哋無法判斷邊一個譯名最流行，更加唔能夠宣布邊個先係「正版」。但佢哋至少證明咗一件事：Chelsea喺香港最初並無一個固定中文名，俾全港球迷整整齊齊沿用落去。

換句話講，我哋今日將「修爾斯」理解成車路士唯一而正宗嘅舊名，好可能只係將後來嘅集體記憶，倒轉套返落一個本來就相當混亂嘅年代。

不過，六十年代譯名混亂，仲未足以解答最關鍵嗰條問題：今日使用嘅「車路士」，到底係幾時先出現？

七十年代，兩個名已經同場

要知道「車路士」究竟幾時出現，最直接嘅方法，當然係繼續逐年揭報紙。不過一個人喺舊資料堆入面亂撞，好容易迷失自我。所以今次我呢個毒撚四出求救，又Send信問TVB、又問有線同香港電台，仲搵過唔同體育界前輩，而當中覆我嘅，就係足球評述員鍾國雄先生。

鍾Sir除咗分享自己參與足球資料蒐集及翻譯嘅經驗，亦幫手向其他前輩了解當年各間媒體使用譯名嘅情況。呢度一定要正式多謝佢，亦容許小編厚顏無恥，順便痴一痴鍾Sir個名。

前輩嘅記憶可以為調查指出方向，但幾十年前邊間媒體喺邊一年用過咩名，最後仍然要靠當時留下嘅實物逐張拼返出嚟。而當我將時間由六十年代繼續向後推，首先見到嘅仍然唔係「修爾斯」。

1971年，《華僑日報》仍然將Chelsea譯成「車利士」。

《華僑日報》1971-05-24

去到1972年3月6日，《香港工商日報》報道一項賽事時，已經清楚使用今日大家熟悉嘅「車路士」。

《香港工商日報》1972-03-06 (左下仲有正嘢……)

更有趣嘅係，同一日《工商晚報》報道同一項賽事，使用嘅仍然係「車利士」。

《工商晚報》1972-03-06

同一日、同一項賽事，兩份香港報紙已經各自叫緊唔同嘅名。呢個對照證明嘅唔係「車路士」已經擊敗其他譯名，剛剛相反，佢證明當時根本未有全港統一嘅答案。但至少有一件事可以肯定：「車路士」唔係九十年代先突然改出嚟，最遲喺1972年，香港報紙已經有人使用。

咁「修爾斯」又去咗邊？

目前搵到嘅其中一個較早實物例子，出現喺1976年嘅《香港工商日報》。亦即係同一份曾經使用「車路士」嘅報章，幾年之後又出現「修爾斯」。

《香港工商日報》1976-09-27

鍾Sir其後仲幫我搵到一本商品資料標示為1980年嘅《英國足球畫冊》第71期，內頁仍然使用「車路士」。幾個譯名並唔係排隊交更，而係繼續喺唔同媒體之間穿插出現。

張圖始終係賣家放售用，我就唔直接搬運啦。想睇可以去原帖，利申：小編唔係賣家，亦無收取任何利益。連結喺度

戴返個頭盔，1972年同1976年只係目前搵到嘅較早例子，唔代表「車路士」一定比「修爾斯」早四年誕生。分分鐘有巴打喺儲物櫃搵到份舊報紙，兩個年份隨時都可以繼續向前推。

但要推翻「以前全香港都叫修爾斯，後來先改名車路士」，證據已經足夠。至少由七十年代開始，「車路士」同「修爾斯」已經同場生存，並唔係一個退役之後，另一個先正式接班。

所以真正要問嘅，已經唔再係車路士喺邊一年「改名」，而係點解兩個長期並存嘅譯名，最後會被香港球迷記成一舊一新？

唔係改名，只係你睇邊一台

去到呢度，件事開始清楚。香港球迷點樣稱呼Chelsea，可能從來都唔係單純由年代決定，而係睇你當時讀邊份報紙、聽邊一個電台、睇邊一個電視台。

根據鍾Sir本人同佢轉述嘅幾位前輩憶述，七、八、九十年代，「修爾斯」同「車路士」一直並存。報章較常使用「車路士」，TVB長期稱呼球隊為「修爾斯」，亞視及後來嘅有線則使用「車路士」。

同一個年代，有人夜晚睇電視聽到「修爾斯」，第二朝揭報紙見到嘅可以係「車路士」。各間媒體有自己一套譯名，亦無一本全港共用嘅足球字典迫所有人跟從。

呢個亦解釋咗點解「修爾斯」會成為一代香港球迷特別深刻嘅記憶。對好多老球迷嚟講，當年電視評述員把口講出嚟嘅名，先係佢哋第一次真正「聽到」Chelsea。TVB長期使用「修爾斯」，呢三隻字自然同舊年代綁埋一齊。

至於有線，情況又無後來想像中咁簡單。鍾Sir特別向我解釋：

「96年前係carry ESPN，節目內容方面，有線電視沒有話事權，只係直接將節目播放出街。」

有線啟播初期主要係直接播放ESPN節目，唔代表畫面入面所有內容同叫法都由有線制定。直到1996年取得英超獨家播映權，先開始好似今日Now TV一樣，由本地團隊一手包辦節目製作。鍾Sir本人喺1997年加入有線，當時資料蒐集、翻譯以至譯名，正正係佢嘅主要工作。

而有線本地製作使用嘅，就係「車路士」。

因此，有線的確可能係「車路士」普及嘅重要推手。當英超每星期固定出現喺香港觀眾面前，一個譯名被節目、評述同字幕持續重複，自然更容易深入民心。但佢做嘅唔係將「修爾斯」正式改名，而係喺幾個早已存在嘅譯法之中，選擇咗「車路士」。

至於TVB究竟由邊一年開始使用「修爾斯」、又喺邊一年完全轉用「車路士」，目前仍然搵唔到一條清楚分界線。但當「修爾斯」逐漸只剩低喺舊節目同老球迷口中，而「車路士」成為今日跨媒體嘅統一叫法，後來嘅人自然會將兩者理解成舊名同新名。

「修爾斯」之所以被記成車路士嘅舊名，未必因為佢出現得更早，而係使用呢個名嘅電視聲音，曾經陪伴過成整代香港球迷。

總結：我哋無改過名，只係其中一個名贏咗

翻完呢堆舊報紙，答案其實比想像中簡單。

「修爾斯」並非車仔唯一嘅早期譯名，「車路士」亦唔係新一輩先會叫，更加唔係後來先被發明出嚟嘅名。香港目前亦搵唔到一個正式時刻，宣布Chelsea由「修爾斯」改名做「車路士」。真正發生嘅，只係唔同媒體各自選擇譯名，再經過幾十年反覆使用，其中一個慢慢得到更多曝光，最後成為今日大家共同接受嘅叫法。

如果以後再有老鬼巴打話：「以前唔係叫車路士，係叫修爾斯。」其實佢唔算講錯，只係講少咗一半。以前的確有人叫修爾斯，但同一時間，亦早已有另一班香港球迷叫緊車路士。

至於查爾斯亞、車利士同車沙隊，就係呢場譯名大亂鬥入面，未能成功生存落嚟嘅敗者。

上一篇，我為兩度失蹤嘅車路士搵返佢哋去咗邊；今次再查落去先發現，原來車路士個名從來無真正失蹤。佢只係曾經有過太多個名，而我哋今日熟悉嗰一個，最後贏咗。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

睇完柔佛DT 3：3 車路士，上一篇已經鬧完車仔踢得有幾閪，本來件事應該可以告一段落。但回想成場波，個腦仲係不停彈出同一條問題：

柔佛DT平時係咪真係打開MMA？有幾腳已經唔係熱身賽踢得硬淨，而係踢到令人懷疑主辦單位有無準備定擂台。

不過，戴返個頭盔先。我平時無睇馬來西亞聯賽，對柔佛嘅認識亦只係由今場波先正式開始，唔會因為臨時睇咗一堆資料，就扮東南亞足球專家。偏偏我個Page有一部分讀者來自馬來西亞，當地巴打如果發現有錯，歡迎補充，勿屌。

如果將今場3：3全部歸功於茅波，好似有少少睇少咗佢哋。

一隊大部分車迷連球員名都叫唔出嘅馬來西亞球隊，點解可以面對身價高自己幾十倍嘅車仔，仍然由第一分鐘開始踢得咁有恃無恐？除咗拳拳到肉，柔佛DT究竟仲係一隊點樣嘅球隊？

喺馬來西亞，佢哋先係扮演車路士嗰個

首先，可能有巴打同我一樣，睇到「柔佛」兩個字，會唔知係咩嚟，我幫大家Google咗，AI咁答：

柔佛（馬來語：Johor）係馬來西亞嘅一個州，喺馬來半島嘅最南端，隔住柔佛海峽同新加坡相望，首府係新山。

（仆你個街用AI呃稿費！？）

柔佛DT全名Johor Darul Ta’zim，當中Darul Ta’zim係柔佛州嘅阿拉伯語尊稱，大約意思係「尊嚴之邦」。所以用接近啲香港人嘅諗法嚟鳩譯嘅話，就係………尊貴中環，左右。

而柔佛DT亦唔係一隊突然爆Seed，專登喺車仔面前踢出人生代表作嘅東南亞魚腩。

2012年開始，

柔佛足球全面重整，由球場、訓練設施、青訓以至球員待遇都逐步升級，再集中大量馬來西亞國腳，又引入有歐洲、南美及亞洲頂級賽事經驗嘅外援。可以話係成個州出盡飲奶之力打造出嚟嘅足球招牌。

結果大家今場都聽到旁述講：馬來西亞聯賽12連霸、連續108場聯賽不敗。呢啲數字當然有聯賽競爭力差距嘅成分，唔可以見到108場就真係攞柔佛同皇馬比較；但反過來講，能夠長期將差距穩定轉化成冠軍，本身亦證明佢哋唔係一隊純粹靠幾個有錢外援落場各自為戰嘅暴發戶。

更加重要嘅係，長期做霸王會養成一套完全唔同嘅比賽習慣。

柔佛喺國內大部分時間都唔係縮喺後面泊大巴，而係負責控制球權、由後場開始組織、將兩邊拉闊，再將對手壓返入自己半場嗰隊；失去控球之後，第一反應亦唔係全軍退守，而係立即圍住個波反搶，務求盡快攞返主導權。

個劇本好似好熟？係，就係我小標題所講，柔佛先係平日扮演車路士嗰個。佢哋落場嗰刻嘅預設並唔係「捱得幾耐得幾耐」，而係個波理應屬於自己，場波亦理應由自己話事。

問題只係，今場對住車仔，柔佛大部分時間得四成控球，明顯無可能照搬平日恃強凌弱嗰套玩法。既然做唔返霸王，佢哋決定將自己變成一隻難搞嘅Boss………

做唔返霸王，就做爛仔

柔佛今場無蠢到同車仔鬥控球。睇返比賽（無錯，難睇我都睇咗次重播），無波嗰陣佢哋大部分時間收成5-4-1，兩條防線縮窄保護中路，先將車仔逼去邊線；搶返個波之後亦唔慢慢猜，而係盡快向前，直接攻擊車仔兩邊身後同臨時拼裝嘅防線空位。

開紀錄嗰球就係標準示範。柔佛喺後場搶返控球後，幾腳已經由自己禁區推到車仔門前，最後由阿里夫艾曼近門射入。成個過程無乜花巧，就快狠準，而且每個人都知道下一步要向邊度跑。

所以，雖然柔佛全場只有四成控球，射門亦以12：17落後，但佢哋有6次命中目標，反而比車仔多一次。換句話講，車仔係攞住個波比較耐；柔佛就係每次攞到個波，都盡量將佢變成一件會傷人嘅武器。

嗯，傷人，你應該估到我跟住想講咩。

柔佛全場錄得19次犯規，有幾腳確實過晒熱身賽應有嘅尺度，呢樣無必要幫佢哋洗白。當車仔啱啱搶返個波、準備加速，柔佛第一反應就係埋身、落腳，必要時直接用犯規截停。呢招其實都有英超隊做過，既可以打斷節奏，亦唔俾車仔嘅鋒線舒服轉身衝向防線。

最搞笑係，柔佛負責開MMA擂台，車仔就非常有禮貌咁主動參加，仲鞠晒躬、除埋鞋先入場。人哋19次犯規只係食3張黃牌，車仔反而因為投訴、報復同自己腦充血食足5張。即係對面負責撩交打，我哋就一人分飾兩角，做受害者同食牌嗰個。

如果將成場波全部歸納成「柔佛踢茅波」，其實反而睇得太淺。真正令車仔辛苦嘅，係柔佛識得因應對手轉玩法：國內做霸王就控住你打，遇上實力更強嘅車仔，就收窄、轉換、死球，再用身體對抗將比賽強度推到自己想要嘅水平。

佢哋未必有能力同真正嘅車仔正面鬥實力，但就成功將一場原本應該考驗技術同身價嘅熱身賽，變成鬥反應、鬥默契、鬥身體兼鬥邊個首先失控。而好不幸，呢幾樣全部都係臨時拼裝車仔C隊最唔想遇到嘅嘢。

離開馬來西亞，仲係咪大佬？

當然，講到柔佛12連霸、108場聯賽不敗，咁撚勁，咁又唔見佢哋參加世冠盃屌打PSG？

未，至少暫時未。不過佢哋近年已經開始證明，自己唔止識喺馬來西亞大蝦細。

早喺2015年，柔佛已經贏過亞洲足協盃，成為馬來西亞史上第一支贏得亞洲球會賽事冠軍嘅球隊。

而真正有參考價值嘅，係近兩季亞冠精英聯賽。

2024/25球季，柔佛喺東亞區聯賽階段排第4，最後一輪更加以5：2反勝三屆亞洲冠軍浦項製鐵，殺入16強。雖然之後兩回合僅以0：1不敵泰國班霸武里南聯出局，但至少已經唔係入去陪跑，叫做可以同日韓球隊踢到唔失禮。

去到2025/26球季，佢哋再行前一步。16強兩回合以3：2淘汰廣島三箭，隊史首次殺入亞冠精英聯賽八強；最後面對衛冕冠軍艾阿里，柔佛更加早早領先兼多打一人。可惜佢哋最終都守唔住，被艾阿里反勝2：1出局。

呢場反而清楚畫出柔佛而家嘅上限：有能力令亞洲頂級球隊狼狽，但距離真正平起平坐，仲有一段明顯距離。

呢啲成績未足以證明柔佛已經同沙特、日本頂級球會平起平坐。佢哋仍然未去到亞洲最頂嗰層，甚至要坐穩二線頭都仲需要更多時間。但至少可以確認，柔佛唔係一離開馬來西亞就現形嘅山寨王。佢哋已經有能力喺亞洲最高級別賽事同日韓、沙特球隊周旋，捉到機會甚至真係可以送你出局。

所以…………？

嗯，重點喺呢度。

所以今場3：3有冷門成分，但又畢竟只係熱身賽，唔係世界末日。車仔派出一隊臨時拼裝、默契近乎零嘅C隊，對手係一支長期合作、識得轉換玩法，而且啱啱先踢入亞洲八強嘅球隊。紙面身價差距巨大，但落到場上，件事從來唔係「英超豪門對馬來西亞球隊」咁簡單。

嗯，至於最初嗰條問題：柔佛係咪真係打開MMA？

係，有幾腳仲落重手添。但MMA只係佢哋其中一件武器，唔係全部答案。車仔以為自己去馬來西亞踢場熱身賽，柔佛就當有歐洲豪門踩入地頭，炸晒毛。於是一邊想熱身，另一邊就直頭當自己打Boss戰。

我寫到咁，如果你有一刻覺得：「……今次車仔俾人迫和，加上踢得咁柒，某程度上係情有可原……」

我贏。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

燈燈燈櫈，由於作者情緒激動，本文將含有大量粗言穢語，未滿18歲人士請由家長陪同收看。燈櫈櫈櫈。

睇完柔佛DT 3：3 車路士，我照慣例開電腦，準備寫【戰術覆盤】。然後望住個空白頁，我磨撚咗半個鐘頭。

最後得出一個非常唔專業嘅結論：場波閪撚到無乜好覆盤。嗱，唔止我架，至少去到我落筆嗰刻，今場波連TA都未見有文出，你就知有幾閪。

唔係完全無戰術；表面上甚至唔算踢得太差，但成場真正令人記得嘅，只有甩漏、犯規、兩個十二碼、一個烏龍，同安瑟明路傷出。

熱身賽賽果從來唔重要。球員未夾熟、試陣失敗，甚至輸波都無問題，前提係至少熱到身、建立到少少配合，或者試出一啲值得帶返英格蘭嘅嘢。

今場唯一試出嚟嘅，就係一大班人根本未準備好。

所以我真係有諗過唔掛【戰術覆盤】個名，改掛【車迷觀點】。我真正想問嘅唔係車仔點解贏唔到，而係一場既熱唔到身、磨合唔到戰術，仲差啲踢到打交嘅熱身賽，究竟有咩意義？

十一個陌生人，連Wi-Fi密碼都未收到

嗱，場波閪就閪，呢樣無必要兜。

但車路士今場踢成咁，的確有一堆客觀原因。球隊24小時前先踢完AC米蘭，沙比幾乎換晒全部正選；沙亞更加喺臨開賽前突然被收起，原定防線未開波已經要臨時執過。

最後排出嚟嘅3-4-3，三中堅係

Subuloye、達叔同安瑟明路；昆達、基頓斯分居兩邊，艾素高拍住MNJ，前面就由二安、積臣同戴納負責。

齋睇人名，其實未至於完全無得踢。前線幾個都有一隊經驗，達叔更加係場上最年長嗰個，理論上應該有能力帶住班細。但實際效果就似十一個人啱啱加入同一間公司，連同事叫咩名、廁所喺邊、Wi-Fi密碼係乜都未知，已經被捉去做年度Presentation。

第一個失球入面，達叔看漏身後嘅Aiman，成條防線亦無人及時補位。安瑟明路傷出之後，本身已經求其砌出嚟嘅防線再甩多粒螺絲。

所以如果單講防線混亂，我願意俾沙比同班球員相當大程度嘅減刑。臨時變陣、缺乏默契、中途再傷一個正選，呢種組合唔派膠先係奇蹟。但減刑還減刑，唔代表可以成隊無罪釋放。

防線唔熟，可以解釋點解有人走漏；解釋唔到艾素高同MNJ點解連最基本嘅前後場接駁都做唔到。安瑟明路傷出，可以解釋沙比點解要臨時改陣；解釋唔到二安、積臣、戴納同基頓斯點解長時間各自各精彩。

五個攻擊手，砌唔成一條攻擊線

牌面上，車仔今場條五人攻擊線其實好撚完美。

基頓斯同昆達負責拉開左右兩邊，二安喺右半空間活動，中間再擺積臣同戴納。有人接應，有人推進，有人識一對一，禁區入面亦長期擺住兩個前鋒。單睇個企位，基本上闊度、突破、串連同終結全部齊晒。

但同英格蘭雙特一樣，踢起上嚟就完全唔係嗰回事。

問題唔係五個人企得唔夠前，而係個波根本上唔到去。艾素高同MNJ無法穩定由後場接波，再將進攻帶過中場線；當佢哋俾人封住或者第一腳處理得唔順，前面五個人就只可以留喺原位等運到。

積臣間中會跑防線身後，二安亦會收近中路嘗試幫手，但呢啲更多係球員各自落嚟搵波，唔係一套有戰術嘅走位。第一個人離開位置之後，第二個人無向前攝，第三個人亦無拉開空間；個波就算成功送到前場，都往往只係交到某個球員腳下，然後等佢自己諗辦法。

所以車仔唔係完全無攻勢，甚至有60%控球、17次射門，同29次禁區觸球。問題係29次入到禁區，都製造唔到一次Big Chance；三個入球就分別來自兩個十二碼同一個烏龍。全部係車仔主動施壓換返嚟，但始終無一球能夠證明呢條五人攻擊線真係組織過。

呢個先係最令人失望嘅地方。

沙比唔係無將攻擊球員擺上場，甚至可以話想要嘅零件已經擺得相當齊。只不過擺咗五個攻擊球員上去，同砌成一條五人攻擊線，始終係兩回事。前者今場做到，後者由開波到完場，都只係停留喺概念上。

轉咗陣，至少有人返啱位

沙比當然唔係完全無做過嘢，佢自己都睇得出上半場套3-4-3行唔通。

去到下半場，昆達由翼衛轉返右閘，基頓斯就推高一格，二安亦開始收得更入。你可以叫佢4-2-4，又可以叫4-2-3-1，季前熱身賽啲人走嚟走去，我就唔打算逐格度佢係咩形狀；重點係沙比將幾個攻擊球員放返去比較合理嘅位置，嘗試令佢哋企得近啲。

當中最明顯嘅受惠者就係基頓斯。

上半場踢翼衛，佢每次攞波都要由中場線開始推，未去到禁區已經用咗大半條氣；推前之後，佢終於可以喺自己熟悉嘅位置直接面對守將，第二個十二碼亦係由佢喺禁區內主動挑戰對手博返嚟。

所以話沙比完全無調整，並唔公平。至少佢睇到基頓斯唔適合包辦成條左路，亦知道要將二安拉近中路，增加前場接應。

但問題係，佢改到嘅只係前面幾個人嘅企位，改唔到個波點樣由後面送上去。

昆達落返右閘，唔代表後場突然多咗一個出球點；基頓斯推前，亦唔代表艾素高同MNJ就有能力撕破對方第一道防線。前場幾個人確實企得近咗，但只要個波仲係塞喺後面，企近啲最多都係等運到嗰陣可以傾吓計，無咁悶。

沙比嘅調整並非無效，只係未觸及今場最大嘅問題。佢將零件重新擺返啱位，部機依然著唔到，因為中間條電線由頭到尾都未接上。

而當車仔本身已經踢得支離破碎，柔佛再用一次又一次犯規將僅餘嘅節奏切爛，呢場波最後試出嚟嘅，就更加唔似足球戰術。

熱身未熱到，火就先着咗

本身支離破碎都算，柔佛DT仲要用一次又一次犯規，將車仔僅餘嗰少少比賽節奏打到變橙汁。

我明呀…柔佛無責任就住車路士踢。人哋喺主場面對英超球隊，落場就係想證明自己；如果車仔班球員俾人撞兩下就散，返到英超只會死得更加快。熱身賽本來就係要搵個有強度嘅對手，唔係請十一個陪練返嚟幫你建立自信。

但有強度，同成場不停拉衫、遲落腳、踢踢下互相推撞，始終係兩回事。

柔佛全場19次犯規，車仔亦有15次，兩隊夾埋34次。平均唔使三分鐘就停一次，任何啱啱開始成形嘅攻勢，未試到第二、第三腳已經有人瞓低。去到後段，雙方球員諗住嘅亦唔再係點樣走位，而係上一腳邊個踢過我，今次又輪到我點樣踢返佢。

球證喺呢方面亦功不可沒。

最初幾下過火攔截無及時處理，等到雙方火氣愈積愈多，先開始用黃牌補鑊。結果柔佛犯規更多，最後反而係車仔食足5張黃牌，對手只有3張。唔係話犯規次數同牌數一定要按比例派，但當個尺度一路飄移，球員自然會開始自己執法，場波亦由熱身賽慢慢進化成MMA。

當然，呢啲唔可以用嚟幫車仔脫罪。柔佛再粗野，都無逼艾素高控甩個波，亦無阻止達叔望實自己身後；29次禁區觸球換唔到一次Big Chance，柒嘅始終係車仔。

依家戰術未試清楚、配合未建立，安瑟明路仲要傷住離場；去到最後，大家唯一練到最熟嘅，大概就係點樣由地面爬返起身。

所以話今場無乜好覆盤，唔係因為3：3呢個賽果太肉酸，而係成場波由頭到尾都無提供到一個正常環境，俾我哋判斷沙比想試嗰套嘢究竟得唔得。

車仔無熱到身，柔佛練到拳感。至於球證，麻煩離場拎埋桶火水走。

無熱到身，至少照到妖

咁今場熱身賽究竟有無意義？

冷靜落嚟再諗，其實都有。只不過原本想試嘅戰術無試到，最後試出嚟嘅，係車仔呢套陣容到底有幾多人真係可以用。

達叔走漏、艾素高控甩、基頓斯踢翼衛踢到懷疑人生，全部都唔會令車仔失去任何一分。至少沙比依家知道，當正選陣容被拆走之後，後備球員暫時未有能力維持同一套踢法；有啲人欠缺嘅，甚至唔只係少少默契。

今次個答案唔好睇，但總好過英超開季之後先發現。

所以今場唔係完全無價值，只係價值唔在於戰術成功，而在於提早失敗。

車仔無熱到身，亦無磨合到幾多戰術。唯一做到嘅，就係用一場3：3，將真正嘅一隊，同一班暫時只係睇落似一隊嘅球員之間嗰段距離，照得清清楚楚。

吖漏咗，同收到少少出場費用咁，可喜可賀………

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

我其實只係嚟睇友賽，自問真係好少留意意甲，無諗過喺AC米蘭嘅教練席見到艾摩廉……而艾蛇睇完車仔今場表現，可能都會有少少感動：原來三中堅真係可以踢到有人走位、有中路配合，甚至入到波。講明，我無抽任何人水，除咗艾蛇。

講返車仔。見到正選陣容嗰刻，我本身係估尼圖左翼，帕利斯查右閘。點知開波無耐已經發現，尼圖企右邊，但帕仔居然去咗左閘；再睇多陣，拉維亞一時出現喺後場，一時走上前場，活動範圍大到痴孖根。成隊波嘅企位一路郁，郁到我開始懷疑，自己到底係估錯一個位置，定係由一開始已經睇錯成套陣。

咁問題就嚟：究竟係AC米蘭太………咳，未熱身完仲放緊假，令沙比嘅部署都自帶美顏Filter？定係去到第三場熱身賽，沙比嗰套3-4-2-1終於練成？講明，今篇臨場觀察有少少長，唔好嫌我煩。

3-4-2-1終於現形，但離「練成」仲有段距離

先答返上面講嘅嘢：唔係我估錯帕利斯查踢左閘，而係沙比今場根本無打算擺四後衛。

艾殊邦、科芬拿同哈圖組成三中堅，帕利斯查同尼圖分居兩翼；拉維亞、卡些度守住中路，彭馬同祖奧柏度就收埋喺韋碧克身後。成個陣攤開嚟，就係相當正宗嘅3-4-2-1。

但陣式本身唔係最重要，重點係呢班人終於識得點樣走位。

帕利斯查同尼圖將球場闊度拉到最盡，彭馬、祖奧柏度毋須再黐住邊線，可以直接走入中路接波。當兩個10號內收，米蘭中場就要決定跟唔跟：唔跟，佢哋就可以喺兩線之間轉身；跟入去，兩邊翼衛又會得到空位後上。上場車仔好多時係有人攞波、無人開路，今場至少開始見到每個人一郁，身邊就會帶動另一條傳球線出現，而且企位亦比之前更緊密。

最明顯嘅分別，係車仔今場終於敢由中路劏入去。拉維亞或者卡些度將波送入兩線之間，彭馬、祖奧柏度背身接應，一轉身就嘗試用直線打穿米蘭中場。未必次次都去到射門，但好幾次都成功將個波由後場直接送入進攻三區，而唔係例牌傳去邊線，再大家企定定等奇蹟發生。

不過，講「現形」可以，用「練成」兩粒字就明顯太早。

正選階段嘅進攻結構係清楚咗，但運轉仍然未算流暢。彭馬同祖奧柏度有時會走入相近位置，韋碧克亦未完全融入身後兩個10號嘅配合；上半場大部分時間，車仔雖然知道條路應該點行，真正一腳劏穿米蘭防線嘅次數仍然唔多。結果第一個入球亦要等到補時，靠角球先打開缺口。

所以今場所證明嘅，唔係沙比已經將利華古遜嗰套踢法完整搬咗過嚟，而係車仔終於砌出一副睇得明嘅骨架。至少相比之前一堆球員各自搵位，今場開始見到各種化學反應。

活動範圍大到痴孖根，拉維亞其實做緊乜？

今場其中一個神蹟，發生喺拉維亞身上。感謝主，佢居然可以踢足90分鐘，呢次亦係佢首次為車路士踢足，我有理由相信二安帶咗佢去自己教會。

但更神奇嘅係拉維亞今場嘅表現。

名義上，佢

同卡些度排成雙中場；但實際踢落，拉維亞根本無一個固定位置。後場開始組織時，佢會主動走近三中堅接波；當個波成功推過第一線，佢又會跟住向前，走入中場甚至進攻三區，繼續做下一個接應點。難怪我成場睇住佢由後面行到前面，再由前面走返後面，懷疑佢係咪偷偷地帶咗個替身落場踢多個咁。

拉維亞亦唔係為走而走，佢每次移動都係為咗將兩段本來斷開嘅進攻重新駁埋。

當三中堅攞波，佢會落去提供一條安全傳球線；當彭馬或者祖奧柏度喺兩線之間接應，佢又會移前靠近，令對方轉身之後唔使孤零零自己處理。就算前面條路突然塞住，個波亦可以交返俾拉維亞重新分配，而唔係一下子打返落三中堅，成套進攻由頭嚟過。

數據亦幾能夠反映呢個角色。拉維亞全場60次傳球成功58次，成功率接近97%，6次長傳更加全部成功。齋睇成功率，好容易以為佢只係喺後場猜猜猜刷數據；但配合佢由後場一路移上前場嘅活動範圍，意思其實係無論車仔將個波推到邊一層，附近幾乎總會搵到佢。

6次長傳全中亦相當重要。當米蘭開始向一邊收窄，拉維亞唔需要再逐格逐格慢慢搬，可以直接將個波轉去另一邊，等翼衛趁對手未企穩就繼續向前。佢今場最有價值嘅唔係某一下神來之筆，而係令每一段進攻之間少咗停頓。

而佢亦唔係淨係有波嗰陣周圍出現。8次奪回球權、地面對抗6次贏4次，反映拉維亞無波時同樣有參與回收。尤其車仔進攻斷纜之後，畫面上往往亦見到佢第一時間追返個波。呢點對3-4-2-1尤其重要，因為兩邊翼衛一推高，中路一失球權，身後空間可以大到足夠俾對手開生日會。拉維亞能夠及時回收個波，先令成隊可以繼續企喺前面圍住米蘭砌。

當然，戴返頭盔，AC米蘭今場嘅壓迫強度實在未算高，拉維亞去到英超面對更快、更惡嘅中場，仲可唔可以咁自在咁周圍駁線，仍然要再睇。但至少今場證明咗一件事：健康嘅拉維亞唔止係另一個防守中場，而係可以成為成套戰術入面嘅人肉尿袋。

至於尿袋兩邊駁住邊個？就係一個本身踢右閘、今場突然走去左邊爆；另一個明明係翼鋒，卻由後場包辦到前場嘅兩隻翼衛。

同樣係翼衛，兩邊做緊嘅完全唔同

拉維亞負責喺中間駁電，帕利斯查同尼圖就負責將成個陣拉開。

表面上，兩個都係3-4-2-1入面嘅翼衛；實際踢落，兩邊唔係倒模鏡射出嚟。帕利斯查負責直接向前爆，尼圖就要由後場包辦到前場，用兩種唔同方式撐起車仔兩條邊。

先講第一次喺車仔踢左邊嘅帕利斯查。佢本身慣踢右閘，今場調去左翼衛之後，無因為逆足而踢得縮手縮腳，反而成為正選階段最直接嘅推進點。每次左路出現空位，佢第一個反應唔係停低再交返後，而係帶住個波向前衝，甚至幾次直接一對一突破米蘭守衛。

呢種跑法對今場車仔相當重要。祖奧柏度內收之後，左邊幾乎成條走廊都留咗俾帕利斯查；佢只要肯向前推，米蘭右翼衛就唔可以放心收窄幫手封中路。換句話講，即使帕仔最後一腳未必次次交到貨，單係佢夠膽帶住個波衝，都已經可以將對手防線扯開，為祖奧柏度同拉維亞騰出活動空間。

右邊嘅尼圖就係另一種玩法。

佢今場無好似普通翼鋒咁頻繁內切入禁區，更多時間係留喺外線，防守時落返去組成五後衛，攞返個波就沿住右路推上前。呢個角色無帕利斯查咁搶眼，甚至有段時間會令人覺得佢離個龍門遠咗，少咗最擅長嗰種直接威脅；但由另一個角度睇，尼圖亦證明自己唔係一定要入禁區先有用。

第二球就係最好例子。尼圖喺右路得到空間，無多餘動作，直接送個內彎波去遠柱，祖奧柏度走到尾柱完成任務。成個配合非常簡單，但正正係3-4-2-1想製造嘅畫面：雙10號將對手吸入中路，翼衛喺外線得到時間，再由一邊直接搵另一邊嘅禁區接應點。

所以今場兩翼值得留意嘅，唔止係「帕仔踢左、尼圖踢右」呢種簡單排陣，而係沙比無要求兩個翼衛用同一套說明書。帕利斯查負責用速度同帶波將場波向前推，尼圖就負責控制成條右路，再用傳中完成最後一腳。角色唔對稱，但功能啱啱好互補。

當然，帕利斯查嘅最後一腳仍然有改善空間；尼圖長期踢翼衛，防守消耗會唔會削弱佢最有威脅嘅爆發力，呢啲都要再觀察。至少今場證明，沙比手上唔一定要有兩隻一模一樣嘅翼衛，先至砌得出呢套陣。

兩個角球開齋，積臣後備再撳變速掣

兩條邊開始識得拉扯、中路亦終於有人接應，但車仔第一個缺口最後仍然唔係靠流動進攻打開。去到上半場補時，救場嘅反而係一個角球。

第一球由卡些度主踢，車仔先用一班人塞入小禁區，擺出副準備圍毆龍門嘅姿勢，將米蘭守將注意力全部拉入門前。到個波真正開出，祖奧柏度反而喺混亂之中得到起跳空間，一頂將車仔送到領先。表面睇係一個普通角球傳中，實際上真正做到嘢嘅，係開波之前已經將對手視線同防守位置呃走。

如果話第一球仲可以當係門前混戰執到，第三球就更加似一早畫好條路線。

今次轉由拉維亞主踢，無再將個波掟入小禁區鬥人多，而係直接送去禁區頂。卡些度喺無人干擾之下，用外腳背窩利撞入。由助攻祖奧柏度，到自己喺禁區頂完成射門，卡些度一場波承包晒角球嘅送貨同收貨服務。

友賽兩下死球當然未足以話全部係Austin MacPhee功勞，但至少呢兩球唔係同一招撞彩撞中兩次。兩個主踢者、兩個攻擊區域、兩種完成方式，一球靠門前走位製造空間，一球直接伏兵禁區頂。新死球部門係咪已經正式開張，仲要再觀察；但第一批交出嚟嘅功課，至少唔似臨時抄返嚟。

而去到後備階段，車仔又展示咗另一種變化。

積臣入場之後，成隊波明顯踢得更加直接。前面有一個肯向身後空間衝、亦有速度將防線向後扯嘅中鋒，後場同中場就毋須每次都逐格慢慢駁。昆達等後備球員亦開始更早向前送波，積臣自己最後更有一次射中門框。不過好彩唔入咋…如果呢球入到，我會唔熟悉眼前呢個積臣。

呢段最值得留意嘅，唔係積臣有無能力爭正選，而係同一個3-4-2-1，換一種中鋒就可以有另一種鋒味。韋碧克正選時，車仔較多透過雙10號同中場慢慢接駁；積臣入場，就可以由組織模式直接轉成背身鳩跑。陣式無變，進攻速度同路線卻可以完全唔同。

總結：係虛火定真材實料

所以返到最初嗰條問題：係AC米蘭仲放緊假，定係沙比套3-4-2-1終於練成？我嘅答案係，前者肯定幫咗唔少，但後者至少第一次砌到連球盲都睇得明。

今場有清楚嘅三中堅骨架，有雙10號內收，有兩隻功能唔同嘅翼衛，亦有拉維亞喺各層之間走嚟走去駁線。再加上兩套角球設計，同積臣後備入場後提供嘅直接打法，沙比手上開始唔止得十一個位置，而係同一套陣入面，開始有幾種可以隨人腳切換嘅玩法。

當然，都要再強調一次，呢刻距離「練成」當然仲遠。米蘭壓迫唔強、雙10號仍然間中撞車、正選階段嘅開放進攻亦未算真正流暢。但至少今次唔再係我哋對住排陣表幻想化學反應，而係場上真係開始有火花。

至於係咪Work，就等英超開季之後先驗貨。反正今場嗰隻白老鼠，已經俾人電到嘔白泡。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

我知咸魚青菜各有所愛。一定有人到今日仍然掛住林伯當年帶住一班青訓仔踢出嚟嘅青春風暴。

無夏薩特、無得買人，曼治、艾巴咸、杜姆尼、占士一個個由青訓殺上嚟；由開季俾曼聯炒四蛋，到最後守住第四、殺入足總盃決賽。論熱血、論故事性，19/20球季可能真係近年最有「車路士味」嘅一季。

尤其經歷完後來嗰堆大手買人、體育總監抽幼幼Pool同500人大軍，回望當年幾個親生仔一齊衝出嚟，難免會覺得：嗰陣嘅車仔體系幾好。

但問題嚟喇。

當年嘅林伯，係咪真係憑一己之力將一副爛牌帶上前四？個第四係咪全部都要歸功於佢？再問得過分少少，如果林伯當年真係咁有料，點解第二季大手增兵之後搞唔掂，去到愛華頓同第二次上車更加教到一鑊泡？

66分第四，係奇蹟定執雞？

戴多次頭盔，我無打算要反任何人，只係想搵個自己覺得ok嘅結論出嚟。

先由最唔浪漫嘅數字講起。

車路士19/20球季以66分排英超第四。前一季熱刺

71分、阿仙奴70分，去到19/20就分別跌到59分同56分。如果大家仲記得，因為嗰季有Covid搞到英超停咗，原本最有條件攞走張歐聯入場券嘅李城，復賽前仲領先車仔5分，最後9場卻只攞到9分。

換句話講，當季前四合格線大跌係事實，李城季尾更加親手讓咗個關愛座俾車仔。要話完全無執雞成分，咁就真係自己呃自己。

但車路士又唔係一路排第六、第七，去到最後兩輪先發現地下有張歐聯入場券。

由大約第8輪開始，車仔已經長期留喺前四。首19場攞32分，後19場攞34分，前後半季穩定得近乎沉悶。佢哋唔係季尾突然爆Seed，只係一路維持住前四邊緣水平，最後無好似李城咁自爆。

更加重要嘅係，嗰季車仔全季錄得76.23 xG，排聯賽第二；xGA為41.09，xGD達到+35.14，排第三。按每場機會質素推算，預期積分係73.49分，同樣排第三，比實際66分仲要高7.49分。

當然，預期積分唔係真正積分，唔可以拎住73.49就話林伯其實帶出73分。模型無法完整計算門將、埋門能力、死球執行同每場波嘅戰術選擇，但至少可以推翻一個講法：

嗰季嘅車仔唔係踢住第六、第七名嘅垃圾波，純粹等其他隊逐個跌低。

正確少少講，係大家都考差咗，降低咗合格線，但張試卷始終係林伯自己做合格。個第四有執雞成分，但林伯有認真落手執隻雞。

青春風暴唔係撳掣生成，林伯到底做啱咗咩？

咁係咪代表「林伯接手一副爛牌，單靠青訓創造奇蹟」呢個故事完全成立？

又未去到咁誇張。

嗰季嘅Debuff全部都係真。夏薩特離隊，球會夏季無法註冊新球員；簡迪傷患反覆，魯迪加同占士季初同樣受傷。林伯本人更加只有一年英冠領隊經驗，就要直接接手一支歐聯球隊。

不過，呢副牌亦唔係傳說中咁爛。

陣中仍然有艾斯派古達、魯迪加、簡迪、佐真奴、高華錫、韋利安同基奧特等成熟球員，骨架始終來自上季英超第三兼歐霸冠軍陣容。

所謂「一班青訓仔」，亦唔係朝早仲踢緊U18，夜晚突然收到WhatsApp叫佢哋去史丹福橋踢波。艾巴咸喺維拉入過25個英冠入球；曼治同杜姆尼跟過林伯踢打比郡；占士亦喺韋根完成英冠鍛鍊。林伯對佢哋嘅能力同使用方法，本來就非常熟悉。

所以副牌牌面唔算靚，但亦唔係爛到任何人接手都要輸足三十番。

真正值得讚林伯嘅地方，係佢無將青訓當成轉會禁令下嘅茄呢啡，而係真係將佢哋當成主角咁用。

單計英超，艾巴咸攻入15球、曼治7球、占士2球、杜姆尼同奧度爾各入1球，一班青訓合共至少貢獻26個聯賽入球。唔係去到80分鐘領先三粒，先換入場影畢業相，係堅有貨賣。

最能夠證明林伯「真係做過嘢」嘅數據，亦唔係第四名，而係進攻產量。

沙利最後一季，車路士有夏薩特交出聯賽16球15助攻，全季錄得63.97 xG。去到林伯第一季，夏薩特已經離隊，車仔實際入球卻由63球升到69球，xG更加增加12.26，升至76.23。

林伯無可能複製另一個夏薩特，於是佢索性將進攻責任拆散。

曼治帶動前場壓迫，艾巴咸負責拉扯同接應，兩閘拉開球場闊度，中場大量後上；失去控球之後，成班人立即反搶，再製造第二次進攻。

呢套踢法唔算精密，甚至有少少「大家後生有氣有力，一齊衝咗先算」。但對於一班想證明自己、跑得、壓得，又熟悉林伯要求嘅年輕球員，好似雷系打水飛系一樣，效果拔群。(無人明嘅Pokemon梗)

轉會禁令亦唔係一面倒嘅Debuff。

禁令削弱咗陣容，卻同時降低咗球迷與管理層期望，給予林伯一般車路士領隊無可能得到嘅容錯空間。佢唔需要一上任就處理幾名高價新兵嘅角色同更衣室地位，可以直接起用自己最熟悉嘅青年球員。

環境確實幫林伯搭好咗個舞台，但青春風暴唔係轉會禁令撳一個掣就會自動生成。

將一班有潛力但未證明過自己嘅年輕球員，變成真正幫球隊攞分嘅英超主力；喺失去夏薩特後，反而建立出聯賽第二高嘅xG，呢啲始終係林伯嘅功勞。

咁啱個Project啱佢做，唔代表佢識做每一份

問題係，19/20球季踢得好嘅地方非常鮮明，踢得差嘅地方同樣早已存在。

林伯嘅壓迫夠積極，但積極唔等於完整。好多時曼治同艾巴咸已經衝咗出去，後面中場同防線卻未有同步推前，一旦第一下壓迫失敗，中路就會闊過西隧。

兩閘推高、中場後上、多人殺入禁區，的確換來大量進攻，但身後嘅Rest Defence長期漏風。簡迪在場時仲可以靠個人能力周圍救火；簡迪唔喺度，佐真奴就要單獨處理大片空間，畫面通常都唔會太適合一家大細觀看。

死球防守亦係另一個死穴。車仔當季失咗14個死球，問題唔止係球員唔夠高大，站位、分工同跟人亦長期混亂。

至於Kepa，確實將問題由「未夠穩」放大成災難。車仔全季xGA只有41.09，實際卻失54球，相差接近13球，足以證明林伯俾龍門拖累得好慘。但死球站位混亂、壓迫失位同轉換時留下大片空間，始終唔可以賴晒Kepa。佢係災難放大器，前提都要有災難發生。

面對Low Block，林伯亦唔係束手無策，但始終缺乏穩定解法。嗰季車仔主場先後輸俾韋斯咸、般尼茅夫同修咸頓，劇本往往非常相似：對手收窄空間，車仔傳球速度開始下降，兩閘不斷斬波。前面拆唔開，後面再俾人一次反擊或者一個死球收皮。

換句話講，林伯第一季嘅缺點並無消失，只係進攻產量、青春活力同低期望環境，暫時遮住咗啲裂縫。

到第二季大手增兵，份Job Description就完全唔同。

第一季嘅任務係提拔熟悉嘅青年球員、重建信心同活力，前四已經算超額完成。第二季就變成整合夏維斯、雲拿、薛耶治等高價新兵，建立豪門級位置進攻，同時處理上陣時間、更衣室地位同爭標期望。

林伯最擅長嘅，係帶住一班低期望、年輕、有衝勁，而且願意為佢跑嘅球員向前衝。

但當對手唔再同你鬥跑，轉而退後等你拆；當更衣室由「俾機會我證明自己」變成「球會用幾千萬買我返嚟，點解我唔係核心」；當球會要求由製造活力升級成控制比賽，林伯嘅能力就未跟得上。

之後愛華頓嘅失敗，同2023年第二次上車11場只贏1場，證明林伯當時仍然未補好呢啲缺口。

但故事去到高雲地利，又出現咗一個幾有趣嘅轉折。

落到英冠重新起步，林伯再次接手一支需要重建信心、釋放年輕球員同提升進攻能量嘅球隊，結果先帶隊打入升班附加賽，再贏得英冠冠軍升上英超。

呢段經歷唔足以證明佢已經進化成頂級領隊，但至少修正咗「19/20只係一次撞彩」呢個判詞。林伯嗰套方法唔係完全無法移植，只係適用範圍非常清楚。

俾一支有活力、有成長空間、需要被重新點燃嘅球隊佢，林伯真係有辦法將件事做好；但要佢接手一個高期望、球星林立、每場都要控制局面嘅豪門Project，暫時仍然係另一份工。

總結：第四唔係佢一個人抬返嚟，但無佢亦未必抬得到

所以，19/20個第四有幾多係林伯功勞？

前四門檻跌到66分，係對手集體失速；仍然擁有歐霸冠軍骨架，係前人留低嘅資產；轉會禁令降低期望、簡化選擇，係特殊環境送俾佢嘅Buff。

但將青訓由故事變成實際入球，失去夏薩特後仍然將xG由63.97推高至76.23，令一支前途未明嘅球隊長期守住前四，亦係林伯親手完成嘅工作。

所以，個第四唔應該全部歸功於林伯，但更加唔可以因為佢後來失敗，就將當年嗰季貶低成純粹執雞。

林伯唔係因為帶車仔攞第四，所以證明自己係頂級領隊。

真正答案係，嗰一年車路士最需要有人做嘅工作，碰巧就係林伯最識做嘅工作。而高雲地利嘅經歷更加證明，當另一支球隊再次需要同一種工作，佢依然識做同做得好好。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

呢次，係細查喺我筆下第七次成為主角，恐怕亦係最後一次。

一個球員可以俾我寫足七鑊，如果佢唔係彭馬咁勁，就一定係好似山齊士咁好笑。但可惜細查無呢啲賣點，佢純粹係每次我以為已經幫佢寫完結案陳詞，車路士隔幾個月又重新定義佢一次。

由青訓後備、冠軍正選、純利資產、外借棄將、臨時消防員，再踢到成為隊內上陣最多嘅中堅。細查成段藍軍生涯，明明次次都似臨時拉伕，最後埋單竟然踢咗151場。

諗深一層，佢其實就係車路士史上最成功嘅超級水泡人。

球會年年都想買個潛力更高、數據更靚、更似未來答案嘅中堅返嚟。但每逢新答案受傷、失準或者仲未識答題，最後拎出嚟頂住檔先嗰個，又係細查。

普通水泡人頂兩場就功成身退，細查就由攝位開始，攝下攝下變成正選，甚至攝埋入決賽。等到球會覺得人腳終於齊整，又將佢放返入櫃桶，直到下一次防線穿窿。

今次唔想再淨係拗細查到底夠唔夠班。反而想睇清楚，一個從來無人預留位置俾佢嘅球員，究竟點樣一路執手尾，執出151場同幾個獎盃返嚟。

外借三次，返嚟第一季就參與四場決賽

細查喺Cobham成長，但佢從來唔係嗰種被鎂光燈注目嘅天才。由

葉士域治、哈特斯菲到羅連安特，連續外借三季，踢過中堅、防中同右閘，履歷一早已經寫明：邊度缺人，佢就要搬去邊度。

2021年返到車路士，原本都只係跟杜曹踢Pre-season。點知第一場正式一隊比賽，已經係歐洲超級盃正選，仲即場捧埋冠軍。幾日後英超地標戰，佢更加一腳遠射收死水晶宮，入波之後跪喺草地喊到收唔到聲。

嗰季細查上陣30場，歐洲超級盃、舊制世冠盃、聯賽盃同足總盃四場決賽都有份入大軍，其中三場更加正選落場。歐洲超級盃同舊制世冠盃埋單都有獎牌，第一個完整一隊球季，就已經企上冠軍頒獎台。

當然，佢最初有機會，的確同傷兵、疫情同人腳空缺有關。但空位只可以送你入場，唔會自動幫你守足120分鐘，更加唔會直接送你去到四場決賽。

至少嗰一刻，細查唔再只係青訓同後備，而係一個真正落場替車路士贏過冠軍嘅一隊球員。

踢得好，唔代表球會會將你放入計劃

BlueCo入主之後，車路士先後買入高列巴尼、科芬拿、巴迪亞舒尼同迪沙施（諗返就笑撚咗）。每個新中堅身價高、履歷甜，或者符合Blue Co蘿莉控嘅年齡曲線；細查就由冠軍正選，慢慢變成陣容表上面最容易被移走嗰個。

呢個唔完全係能力問題。

新兵代表球會嘅投資同未來想像，細查就係青訓出身，賣到幾多幾乎都可以直接變成帳面純利。當體育總監同財政部一齊打開Excel，細查未必係最差嗰個，但通常都係最方便撳落「出售」嗰個。

只係落到球場，總監們管唔到邊個受傷、邊個失準、邊個突然短路派膠。

2022/23球季，細查仍然踢咗33場；到2023/24，佢因傷錯過大半季，但復出後一口氣正選踢晒最後13場英超。嗰段時間車路士由中游一路追返上第6，點都值得換嚟一次Pre-season驗貨。

結果馬蛇上任，細查連美國名單都入唔到，仲被踢離一隊操練。球會唔係睇完再決定放棄，而係一早決定要賣，再反過來砌一個無佢位置嘅計劃。

細查無成為核心，唔代表佢從來無交過功課。只係喺BlueCo嘅資產管理入面，佢踢得幾好都只係一件隨時可以套現嘅產品。

47場最後驗身，答案終於齊晒

於是，細查去咗水晶宮。

估唔到呢次外借，反而補返咗佢職業生涯最關鍵嗰塊拼圖。效力水晶宮期間，佢嘅攔截升到場均1.52次，鏟截成功率提高到82%；過去最令人擔心嘅控失，亦由上季場均0.94次減到0.34次。

以前嘅細查，係有能力追到人再落腳；去完水晶宮之後，佢開始識得早一步睇穿對手想做乜。簡直係細查人生其中一段最威嘅時刻。

到2025年1月，車路士防線傷到七彩，球會唯有提早召回細查。佢返嚟第一場對狼隊，97次觸球，無一次控失，亦無俾對手直接搶甩，仲直接搶走MOTM。之後歐協聯決賽同世冠盃決賽都係正選，最後兩隻盃一齊帶返倫敦。

不過，半年救火可以話係狀態好，踢足一季先真正無得再抵賴。

25/26球季，細查全季上陣47場、41次正選、踢足4,149分鐘兼入3球。英超完成2,074次傳球，隊內無人比佢更多，成個聯賽亦只有兩名球員排喺佢前面。

呢個數字唔代表佢突然變成派路，但高維爾長期缺陣之後，細查確實接得住後場第一點出球。佢唔再係以前嗰個一受壓就隨時喺中圈爆炸嘅計時炸彈，亦唔係齋將個波橫傳俾隔籬就當交差。

防守方面，佢英超場均有1.23次攔截，全季只被對手成功扭過7次。左右中堅都踢得，亦可以主動壓上中場；無論身邊拍住科芬拿、托辛、艾殊邦定哈圖，佢都識得因應隊友決定自己上搶定包位。

但踢足一季，亦令佢嘅上限無所遁形。

英超空中對抗成功率大約55.5%，長傳成功率亦只係約51.5%。佢可以大量接波、穩定運送，但未有高維爾嗰種一腳打穿兩線嘅長傳；可以靠預判處理大部分危機，但無辦法長期用制空或者身體對抗直接食住對手。

對列斯嘅足總盃四強，細查交出9次解圍，當中8次係頭槌，幫球隊守住1：0。當任務清晰、身邊結構完整，佢完全可以係一個值得信任嘅大賽中堅。

但對白禮頓一次錯誤落腳領紅，車路士由領先1：0變成輸1：3；歐聯兩回合對PSG，當比賽速度、個人能力同空間壓力全部推到最高，佢亦無能力獨力令一條失控嘅防線冷靜返落嚟。

兩場敗仗當然唔可以全部入佢數，但正反例子加埋，判詞已經好清楚：細查明顯高過普通後備，亦有能力喺強隊長期正選；但如果車路士要搵一個防線再亂都可以靠頂級能力撐住全場嘅核心中堅，佢唔係最終答案。

總結：可以賣，但要好好講再見

如今車路士同科木據報已經達成口頭協議，轉會費係3,000萬歐元固定金額，另加600萬附加條款同二次轉售分成。

純粹計數，呢單交易無乜理由要拒絕。細查合約只剩兩年，車路士來季無歐洲賽，中堅輪換需求下降；科木就可以俾佢歐聯、穩定正選，仲有法比加斯親自點名。對一個27歲、準備進入生涯黃金期嘅中堅嚟講，呢個唔係被清洗，甚至可能係一次遲來嘅升職。

所以今次如果仲話賣細查等於「侮辱青訓」，我自己係唔同意。

球會上季連驗貨都唔肯就將佢趕走，肯定係錯；但今日收到合理價錢後，想搵一個上限更高嘅中堅，就未必又係錯。細查值得留低，但唔係任何價錢都唔可以賣。

只要唔好再扮佢係垃圾、係多餘，或者單靠其他人受傷先呃到151場，就已經足夠。

因為普通後備唔會踢足151場，唔會由8歲開始留喺Cobham接近20年，亦唔會每次球會認定佢已經完結，都再踢出一個新章節逼大家改口。

包括我。

寫過細查七次，我睇低過佢，吹大過佢，替佢平反過，亦鬧過佢。寫到第七篇，總算唔使再改口：佢唔係雲迪克，亦唔係垃圾。佢只係一個車路士每次出事都會諗起，偏偏平安無事時又第一個想賣走嘅人。

多謝細查。

多謝你每次喺球隊最狼狽、條防線奶晒嘢嗰陣，都肯第一個落水執手尾。亦多謝你離開過、被趕走過，返嚟嗰陣仍然肯照樣落場，無同車路士計返以前嗰盤數。

如果科木真係成為下一站，希望去到意大利之後，你唔使再等其他人出事，先輪到自己上場。

祝你今次唔再係水泡，而係由第一日開始，就有人為你留好位置。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

沙比二連敗，幫大家講定先：屌你老味、咪一鳩樣！！！

嗯，舒服晒未？可以開始聽我講下呢場波嘅睇法未？

如果上場對熱刺係季前第一次壓力測試，今場對祖雲達斯就更加似一場Apple產品發布會。沙比行上台，背後大芒幕逐張Slide轉：Show下我哋嘅新技術、Show下我哋Renew咗咩產品、最後賣下情懷Show下懷舊貨咁。

成晚新功能Show咗一大堆，現場43,000香港觀眾亦睇得幾開心。唯一問題係，部機最後仍然撻唔著。(笑)

車仔0：1輸波、連續兩場食白果，熟悉嘅進攻斷線、換人後企位混亂亦再次出現。但今場係咪真係證明沙比同羅生一鳩樣？定係一場本來就以試人、試功能為主嘅季前發布會，被我哋當成正式產品評測？

咪心急住掟部機落地。逐項功能試清楚先。

新技術第一次Demo，昆達跑得順，成套系統未連到線

發布會第一Part，當然係Show新技術。

基頓斯、祖奧柏度、昆達、韋碧克，新組合擺喺前場試手，背後仲有

16歲MNJ配卡些度。淨係睇張出場名單，確實幾有新機開箱嘅感覺。

當中Demo Run得最順嗰個係昆達。佢喺右路夠膽攞波、夠膽扭，既可以落底傳中，亦會內切起腳。車仔上半場最接近入球嗰次攻勢，正正係由佢右路送出傳中，再由韋碧克頂斜。你要問今場有邊件新產品第一眼已經睇得出有貨，答案肯定係佢。

但問題亦由呢度開始。

昆達個人運行正常，唔代表成套系統已經接通。車仔上半場嘅威脅，幾乎都係靠兩邊球員自己落底、內切或者傳中製造。祖奧柏度雖然不時收後接波，但未能真正成為前場Hub；基頓斯存在感有限，韋碧克喺中間亦收唔到幾多有效供應。四個人名義上組成一條新鋒線，實際上更加似四部啱啱拆盒嘅新機，各自開機，但互相AirDrop搵唔到對方。

呢個問題亦唔可以全部推落前場。睇返中場線，卡些度主要負責覆蓋、對抗同執漏，組織進攻嘅重任自然落咗喺MNJ身上。但要求一個16歲小將面對祖雲達斯縮後防守，負責控制節奏、打穿中場，再將前面四件新產品連埋一齊，係咪太睇得起佢？

結果車仔頭30分鐘控球尚算平穩，但一去到進攻三區就斷線。上半場零次射門中龍，最有威脅仍然只係昆達一個人撳幾下個芒、「嘩…好勁呀」，然後就無然後。

舊型號年度更新，積臣連Bug都完整保留

Show完新技術，下一Part就係介紹舊產品今年Renew咗啲咩。

半場入替韋碧克嘅積臣，出場未夠幾分鐘已經Show到點解沙比仍然要用佢。速度、爆發力、無球走位全部即插即用，祖記後衛上半場仲可以舒服企定防守，積臣一落場就立即要跟住佢周圍跑。49分鐘，佢拉到左路再交俾帕利斯查起腳，亦製造出車仔全場其中一次最清晰嘅機會。

呢啲功能其實大家一早知。當積臣有空間向前跑，佢仍然係車仔陣中少數可以單靠速度將一條平平無奇嘅進攻線，突然拉到對方禁區附近嘅球員。

咁今年個Update修復咗啲咩Bug？

嗯，無。

First Touch依然粗糙，反擊時明明左右兩邊都有隊友，佢仍然攞住個波考慮人生，最後逼到Douglas Luiz用戰術犯規幫佢作出決定。之後再嚟一下後踭傳送，個波亦準確無誤咁交返俾祖記。速度、走位、衝擊力全部保留，處理球同決定力嘅舊問題亦一樣都無少。

所以積臣呢場Demo其實非常成功，因為佢用37分鐘完整展示咗自己點解仍然有用，同時亦展示埋點解車仔叫價£65m，到而家都仲未有人撳Purchase。

你問積臣有無用，答案仍然係有；你問新版積臣同舊版有咩分別，暫時只係換咗個發布人。

新版陣容一口氣登場，防守責任就無人接手

發布會去到中段，沙比又好似上場對熱刺咁一次過將更多產品搬上台。

65分鐘，戴納、薩帕達耶夫、艾素高、拉維亞、安瑟明路、艾殊邦同37號Subuloye先後入替。車仔甚至短暫出現積臣、戴納、薩帕達耶夫三名前鋒同場，明顯唔係要維持原本套陣，而係想趁季前賽盡量試人。

試人本身無問題，一次過換七個亦唔代表實會出事。但大換血之後，邊個要接手邊個、邊個補邊個留下嘅位置，必須重新講清楚。車仔今次就係未對好分工，未夠兩分鐘已經交咗學費。

66分59秒，祖記由左路組織，Yildiz將個波交俾後上嘅Zhegrova。沙亞其實一早有做Shoulder Check，知道身後有人殺上嚟。佢無直接撲出去封鎖Yildiz，而係選擇守住內線，避免Zhegrova帶波直入禁區，呢個判斷本身唔算錯。

問題係，沙亞一收窄，外圍個人就必須有人接手。

安瑟明路同Subuloye既無補出去貼近Zhegrova，亦無封住佢接波後嘅射門線。結果對方可以喺禁區外無壓力接波、較位，再一腳彎入死角。成條防線唔係無人見到危險，而係人人都企喺附近，偏偏無人確定最後應該由邊個行出去。

嗰腳當然係世界波，彭達斯飛盡都掂唔到。但射術決定個波有幾靚，車仔嘅補位同交接，就決定咗Zhegrova點解可以射得咁舒服。

更加值得留意嘅係，上場對熱刺，大量換人後同樣出現過企位同分工鬆散。兩場波嘅人腳、陣式同失波方法並不完全相同，但症狀就一樣：正選退場之後，後備球員知道自己企邊，未必知道旁邊隊友下一步會做咩。

季前賽大換血，有甩漏完全可以理解；但連續兩場一換完人，成隊波就失去原有秩序，呢個就唔可以全部用「試陣」兩個字帶過。新產品可以逐件慢慢試，防守責任就唔可以留到正式版先再分。

One More Thing：相隔615日，我哋竟然再見到梅仔

發布會去到尾聲，台燈準備熄、觀眾以為所有產品都已經Show完，沙比突然行返出嚟：One More Thing。

82分鐘，梅迪歷入替積臣。相隔615日，佢再次著住車路士波衫落場。

老實講，當梅迪歷因為禁藥事件消失喺名單，之後一年幾無波踢，我諗唔少人都同我一樣，已經默認佢喺車路士嘅故事就咁無聲無息完結。無告別、無最後一場，甚至連幾時先會有答案都唔知。點估到今場名單突然出現佢個名，臨完場仲真係等到佢企喺場邊準備入替。

八分鐘，當然證明唔到太多。

你睇得出佢嘅速度仲喺度，攞到波仍然第一時間想向前衝。但比賽時間太短，車仔當時整體進攻亦已經相當混亂，根本無可能憑幾次觸球，就判斷佢嘅狀態係點、仲係咪沙比計劃一部分，甚至會唔會再有下一次機會，都仲係言之尚早。

不過今次本身就唔係產品評測，而係一次久別重逢。

梅迪歷喺車仔嘅三年從來無順利過。由天價加盟、踢極都對唔上說明書，到逐漸跌出正選，再突然因禁藥事件消失。你可以話佢一直未踢出身價，可以話佢有速度但無腦，甚至可以覺得球會一早應該放棄佢。呢啲評價全部都無因為八分鐘而改變。

但當佢再次追住個波向前跑嗰刻，至少提醒咗我哋：呢個消失咗615日、原本以為故事已經無聲無息完結嘅人，佢嘅故事原來仲可以延續落去。

發布會可以死機，產品出街就唔可以

所以，車路士季前賽二連敗，係咪已經足以證明沙比同羅生一鳩樣？

又未去到咁快。

占士、安素等主力未齊，沙比兩場波亦明顯以試人為先。由正選嗰套四人新組合，到下半場一次換七個，呢套根本唔係準備開季原裝出廠嘅車路士。季前賽拎嚟試新產品、撞下Bug，甚至輸埋場波，本身都無乜值得判死刑。

但可以理解，唔代表無問題。

兩場波踢完，沙比Show咗兩套前線、三個中鋒同十幾件新舊產品。昆達證明有貨、積臣繼續展示自己點解有用又點解車仔仍然想賣、大換血亦俾一班年輕球員攞到寶貴時間。唯獨最重要嗰項功能，仍然未Demo成功：到底呢隊車路士準備點樣穩定將個波由中後場送入危險位置，再製造真正有質素嘅機會？

上場對熱刺係咁，今場對祖記仍然係咁。正選陣容進攻三區斷線，換人之後就連基本企位同防守交接都一齊斷埋。呢啲未必代表沙比無解，但至少去到今日，我哋仍然未見到佢個解法。

等開季，恥辱性5連敗之後，我哋先再問係咪一鳩樣可能會更好。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

車路士相隔15年再嚟香港，8月5日晚就會喺啟德主場館對祖雲達斯。

講明先，呢篇唔係寫俾每日跟開我文、追住車仔轉會新聞、連U18後備席都背得出嘅痴線佬睇。相反，如果你平時無跟開車路士，只係今次買咗飛入場，或者俾朋友捉咗去陪睇，呢篇就啱晒你。

車路士今次有成35名球員身處香港。如果你望住名單，可能會發現一半以上都唔識，唔使懷疑自己，因為連我哋呢班日日跟住車仔嘅人，見到第56號、第76號都要撳返開個名單確認。

所以以下唔會同你逐個講出生日期、前球會同慣用腳，只會簡單答兩個問題：

佢係邊個？落場之後有咩值得望？

至於最重要嗰班，我仲會附送一句「可以同隔籬位講」，等大家即使唔熟車仔，都可以扮下識波。

點解你認得嗰班人無嚟？

開始認人之前，首先要解答一個問題：點解安素、列斯占士、古斯圖同摩根羅渣士全部唔見人？

原因唔複雜。今夏世界盃踢入最後四強嘅車路士球員仍然放緊假，未歸隊參與季前集訓；古古尼亞、加拿祖等人亦已經離隊。所以今次香港見到嘅，並唔係車路士新季最完整、最強嘅陣容。更準確咁講，呢35人係：

一部分現役主力、一大批新兵、一班準備上位嘅年輕球員，再加幾個前途有啲微妙嘅待處理人口。

波衫號碼同樣只係季前暫用，新球季開始時仍然可能改變。現場認人就得，唔好睇完即刻走去印波衫。

最值得望實，順便同隔籬認叻

10號　高爾 彭馬（Cole Palmer）

車路士目前最大嗰粒球星，亦係全隊最有能力憑一個傳送、一腳死球或者一次突然起腳改變比賽嘅人。見到佢企定定好似未瞓醒咁唔使驚，呢個未剃鬚嘅死人樣本身就係佢嘅正常模式。

可以同隔籬講：「彭馬愈似無心機，通常就愈危險。」

25號　摩西斯 卡些度（Moisés Caicedo）

車路士防中嘅掃蕩機，最擅長預早一步截斷對手進攻同埋身肉搏搶波，再將個波安全送返出去。睇佢唔好淨係追住個波，留意佢點樣移位封住傳球路線，先係真正識貨。

可以同隔籬講：「睇卡些度唔係睇佢搶到幾多球，係睇對手有幾多球根本傳唔出。」

41號　艾斯迪華奧（Estêvão Willian）

我哋叫佢二安，唔使加個新字喺前面。佢係巴西新一代最矚目嘅進攻天才之一，盤扭、變速、突然起腳全部都係賣點。今個季前熱身已經對熱刺入波，佢一對一攞到個波，就係全場最值得企起身望嗰幾秒。

可以同隔籬講：「記住呢個名，過幾年佢真係紅咗，我哋可以話香港場已經睇過。」

20號　祖奧柏度（João Pedro）

可以踢中鋒、輔鋒甚至攻中，最大優點係唔止識入波，仲識走出嚟接應同串連隊友。季前第一場對西悉尼流浪者，佢九分鐘內連中三元，狀態暫時係全隊最Sharp嗰批。

可以同隔籬講：「佢唔係傳統企禁區嘅中鋒，佢最麻煩係你根本唔知應該邊個跟佢。」

7號　柏度 尼圖（Pedro Neto）

速度型翼鋒，最大賣點非常直接：快、好快、真係好快。佢啱啱踢完世界盃先到香港會合，未必會踢足，但只要有空位俾佢跑，場波速度就會突然快一截。

可以同隔籬講：「佢最勁唔係跑得快，係高速之下仲控制到個波。」

11號　基頓斯（Jamie Gittens）

英格蘭翼鋒，鍾意喺左邊一對一推入中路，順境時可以將對面右閘扭到懷疑人生。問題係佢順境時間唔夠多，所以佢可以同一場波令人拍手，亦可以令人拍枱。

可以同隔籬講：「基頓斯一對一係真係有料，最後嗰一下就要睇佢瞓醒未。」

21號　哈圖（Jorrel Hato）

左腳後衛，可以踢左閘亦可以移入中堅，攞波同向前推進都相當淡定。對街外觀眾嚟講佢未必最搶眼，但如果想知現代後衛點解唔再只係負責解圍，望佢就啱。

可以同隔籬講：「佢踢左閘嗰陣唔一定長期企左邊，沙比隨時會叫佢入中路幫手組織。」

47號　昆達（Geovany Quenda）

今夏正式由士砵亭加盟嘅葡萄牙新星，可以踢翼鋒亦可以踢翼衛，左腳盤扭同爆發力係最大賣點。今次香港站亦係全球車迷第一次見佢著車路士波衫踢波。

可以同隔籬講：「佢唔係淨係識爆落底，左腳收入中路先係最值得期待嗰招。」

18號　韋碧克（Danny Welbeck）

係，你無認錯，真係以前曼聯、阿仙奴嗰個韋碧克。年紀當然唔細，但跑位、接應同英超經驗仍然有用，最少唔需要重新學習英格蘭足球係點樣撞人。

可以同隔籬講：「你無睇錯，車路士真係簽咗韋碧克，噢.... 噢噢噢，噢噢噢，我韋碧克降臨。」

未必最搶鏡，但新球季會繼續見

1號　羅拔 山齊士（Robert Sánchez）

車路士近年最具娛樂性嘅龍門，撲救同制空有時真係幫到手，但每次用腳出波都可以令全場車迷集體掩面。今次有輕傷在身，未必一定上陣。

13號　彭達斯（Mike Penders）

身高接近兩米嘅比利時年輕龍門，被視為球會長線培養對象。今季開始有機會正式挑戰一隊位置，大家可以留意佢腳下功夫同處理高波有幾成熟。呢次亦有可能係佢第一次著車仔波衫踢波。

6號　高維爾（Levi Colwill）

車路士青訓出身嘅左腳中堅，優點係由後場開始組織同向前傳球。佢踢得好嗰晚未必會有好多Highlight，因為最佳狀態就係令成條防線睇落無事發生。

29號　科芬拿（Wesley Fofana）

速度、侵略性同上前防守能力都相當突出，健康時係一名好很有存在感嘅中堅。真正問題從來唔係天份，而係身體可唔可以俾佢連續健康踢落去。

4號　托辛 艾達拉比奧尤（Tosin Adarabioyo）

高大、穩陣、英超經驗充足，不過佢有無短路就要睇下果晚好唔好彩。

19號　沙亞（Mamadou Sarr）

左腳年輕中堅，上季外借累積咗唔少一隊經驗，今夏返嚟爭取留隊。身體條件同覆蓋範圍仲有出波能力係賣點，但腳下功夫同集中力仍然要接受更高級別考驗。

34號　艾殊邦（Josh Acheampong）

青訓出身嘅多功能後衛，中堅、右閘甚至移入中場都踢得。佢最大價值係理解比賽同位置感遠比年齡成熟，屬於教練愈用愈容易上癮嗰類球員。

30號　安瑟明路（Aarón Anselmino）

阿根廷年輕中堅，防守風格主動，鍾意離開防線提早搶截。成功就型到飛起，失敗就會將身後成片草地送俾對手，上季有外借去咗多蒙特，今個季前熱身正正係佢證明自己可唔可以留低嘅機會。

14號　艾素高（Dário Essugo）

純防守中場，主要工作係掃蕩、對抗同保護防線。佢未必會經常交出漂亮傳送，但如果卡些度唔落場，最接近代替做防守嘅人就係佢。

45號　拉維亞（Roméo Lavia）

全隊最令人又愛又驚嘅中場之一，轉身避壓、護波同喺人群中盤扭都非常靚。但佢最大對手一直唔係對面球員，而係自己能否保持健康。

認唔到完全正常，季前賽尋寶區

28號　沙文路維（Teddy Sharman-Lowe）

今個季前兩場都獲得正選機會嘅年輕龍門，山齊士有傷之下，香港站仍然有可能繼續把關。

35號　Ted Curd

另一名車路士青訓龍門，今次主要係跟隨一隊操練同吸收經驗，落場時間未必多。唔識佢好正常，因為我都唔識。

2號　帕利斯查（Marco Palestra）

今夏由阿特蘭大加盟嘅意大利右閘，跑動能力同上下往返係主要賣點，屬於新球季可能突然搶到大量時間嘅新面孔。

42號　Calvin Diakite

車路士青年隊後衛，今次趁一批世界盃球員未歸隊獲得隨隊機會，主要目標係俾沙比睇清楚佢去到一隊強度有幾多貨。

56號　蘭頓艾拿文路（Landon Emenalo）

可以踢防線多個位置嘅青訓球員，今個季前已經獲得上陣機會。係，佢亦係前車路士技術總監Michael Emenalo個仔。

37號　Tayo Subuloye

青訓後衛，季前第一場已經正選上陣。現階段距離正式一隊仍有段距離，但香港場如果見到37號，至少你而家唔會R晒頭。

46號　禾殊（Reggie Walsh）

車路士近年最受注目嘅青訓中場之一，年紀輕但踢法相當淡定，可以負責串連亦可以去到禁區附近創造機會，預計會外借鍛鍊。

31號　屈臣（Reggie Watson）

只有16歲嘅中場，對西悉尼流浪者已經獲得正選機會。今次基本上係越級打怪，做到幾多都係Bonus，夠膽踢已經值得留意。

32號　MNJ（Mahdi Nicoll-Jazuli）

偏進攻型中場，對熱刺後備上陣後曾經送出直線製造射門機會。今場如果再有上陣時間，可以留意佢喺密集位置處理個波嘅速度。

36號　薩帕達耶夫（Dastan Satpayev）

人稱新阿古路嘅17歲哈薩克前鋒，未正式加盟報到已經提早跟隊，季前第一場更立即取得入球。佢未必已經準備好踢英超，但肯定係今次名單入面最值得偷望嘅未來股之一。

76號　麥昆（Ryan Kavuma-McQueen）

青訓翼鋒，速度同推進能力係主要賣點。今次波衫號碼大到似電視台頻道，但如果後段落場，反而可能係最無包袱、最敢直接挑戰對手嗰批。

人在香港，但前途未必喺車仔

9號　戴納（Liam Delap）

車路士陣中最接近傳統英式中鋒嘅球員，有身位、有衝刺，亦願意同中堅硬碰硬。但上季因為傷患搞到佢表現相當強差人意，雖然本人想留低爭位，但車路士前線人數太多，前途仍然未完全明朗。

15號　尼古拉斯 積臣（Nicolas Jackson）

曾經係車路士正選中鋒，但目前已經屬於外借或出售預備軍。今場即使落場，都比較似櫥窗展示，而唔係沙比新一隊嘅主角。

44號　史隆連拿（Gabriel Slonina）

一度被視為車路士未來龍門人選，但佢前面已經有多名門將，發展路線…嗯，同追女神嘅小兵一樣，相當尷尬。香港站更似係重新證明自己，而唔係正式爭一號位。

33號　基利文（Omari Kellyman）

可以踢攻中同前場多個位置，但加盟後一直受傷患同上陣時間影響。今個季前對佢而言唔止係操Fit，而係要重新證明自己仍然值得球會安排下一步。

梅迪歷（Mykhailo Mudryk），暫未列出季前號碼

停賽程序解決後，接近兩年無正式比賽嘅梅迪歷終於恢復跟隊操練。速度當然仲喺度，但身體狀態、比賽感覺同實際定位全部都係問號，今場會否上陣亦要睇沙比決定。

總結：唔使35個都記得

老實講，睇完以上35個名，我都唔預大家全部背得出。

如果只想輕鬆入場，認住彭馬、卡些度、艾斯迪華奧、祖奧柏度同尼圖已經夠；如果想睇新鮮感，就再加昆達、哈圖、基頓斯、戴納同韋碧克。

至於其餘球員，最簡單嘅判斷方法係：愈大波衫號碼，愈有可能係季前限定彩蛋。

但季前賽最好玩嘅地方，正正就係你永遠唔知今日個彩蛋，幾年後會唔會變成主角。2011年車路士嚟香港，當時其中一個最受注目嘅年輕人叫麥伊治蘭；佢最後無成為大家想像中嘅巨星。

所以今次見到任何一個陌生後生仔落場，唔使急住問佢係邊個，記住佢先。間中睇我文，遲啲可能又會見到佢個名都未定。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

世界盃完咗先兩個星期，大家見我咁勤力出文，就知我已經轉咗Channel去球會果邊，返去睇車仔買9000條友組戰狼300同沙比季前熱身。但…FIFA果邊呢兩星期嘅新聞完全無停過。

首先話恩芬天奴好似想賣世盃？又話要賣股權俾私人投資者？又話向每個成員足協派2,000萬美元？再過一陣，又話UEFA要杯葛世界盃？最後仲拉埋美國總統侵侵落水，成單嘢離奇到不行。

我唔知大家有無同感，但我得一個感想：「搞咁多大龍鳳其實做緊乜春……」

所以作為一個好奇小寶寶，呢篇文唔係嚟講咩深奧嘅大道理，你當懶人包就無錯。

恩芬天奴到底想賣乜？

大家入嚟都應該係睇我鳩up，否則應該走去問AI就有答案啦係咪？簡單講，恩芬天奴想

開一間新公司。

呢間公司叫FIFA Forward Enterprise，簡稱FFE。FIFA打算將世界盃、女子世界盃、世界冠軍球會盃等旗下賽事嘅轉播、贊助、門票、商品授權同營運生意，全部集中放入呢間公司，再以200億美元估值，出售最多20%股權俾私人投資者，預計套現最多42億美元。42億美元，即係我身家嘅1%左右，其實係閒錢嚟。(好似係)

所以新聞所講嘅「出售世界盃」，唔係聽日有個中國/沙特富豪俾錢買起座獎盃，之後想借俾邊個踢就借俾邊個踢。FIFA仍然會持有至少八成股權，亦聲稱賽制、賽程、規例同所有足球決策都繼續由自己控制，私人股東無權話事。

但人哋現兜兜俾42億美元出嚟，唔通係為咗有個名叫自己做股東同拎張世界盃VIP飛影相打卡放IG咩？佢哋買到嘅係FIFA旗下賽事未來一部分商業價值，只要世界盃轉播、贊助同門票繼續愈賣愈貴，呢兩成股權自然有機會升值，同股票一樣。

咁FIFA套現返嚟嘅42億，又準備用嚟做乜？

答案係派錢。

FIFA提出向旗下211個成員足協，各自提供最多2,000萬美元一次性發展資金，用嚟興建球場、訓練中心、發展青訓、女足同基層足球。

211乘2,000萬，答案係42.2億。無錯，差唔多就係成筆賣股收入。

換句話講，恩芬天奴成個計劃就係將未來世界盃嘅部分商業價值提前套現，再將筆錢派俾今日嘅211個成員足協。聽落又唔係完全無道理。特別對一啲細國足協嚟講，2,000萬美元隨時足以改變成個國家嘅足球基建。

照計大家有錢收應該好開心，咁點解最後反而嬲到要杯葛世界盃咁奇怪？

2,000萬都唔收貨？

因為成單交易最大嘅問題，唔係個銀碼，而係恩芬天奴收收埋埋，差唔多傾掂晒先通知大家。

FIFA已經搵咗美國銀行JP Morgan幫手設計交易，定好200億美元估值，搵埋主要投資者，甚至連42億點樣派俾211個成員足協都計好晒。但UEFA、亞洲足協同中北美洲足協全部表示，事前根本無被正式諮詢，部分FIFA Council成員以至內部高層，一樣全部「柒撚懵懵食甜筒」。

即係恩芬天奴已經搵好地產經紀、傾好價錢、印埋臨時買賣合約，最後先返屋企通知全部有份嘅屋企人：「我諗住賣咗兩成祖屋，人人有錢分，無問題吖嘛？」嗯，實無問題啦笑死。

更加有趣嘅係，準備帶頭投資FFE嘅Thrive Eternal公司，係由侵侵女婿個親細佬Joshua Kushner創立。簡單講，侵侵唔係買家，準備帶頭買嘅係佢女婿細佬間投資公司。(汗……我睇咗三次先明。)

單憑呢層關係，當然唔足以證明有咩枱底交易；但恩芬天奴近年同侵侵Friend過打Band，世盃世冠盃都孖公仔咁形影不離，突然又想同侵侵家族有關嘅投資公司做一單42億美元生意，呢個畫面點都係唔好睇。

不過真正令成員足協反枱嘅，仲唔只係觀感。

因為負責批准呢項計劃嘅，正正就係有機會收到2,000萬美元嘅211個成員足協。而2027年FIFA主席選舉，決定恩芬天奴能否連任嘅，亦係同一批人。

我唔會就咁話2,000萬係買票，始終細國足協真係需要資金發展足球。但當恩芬天奴將「批准我單交易」、「收取2,000萬」同「出年投票俾邊個做主席」三樣嘢放喺同一張枱上面，你話佢無心咁做真係跳落黃河都洗唔清…

UEFA旗下55個成員甚至話，只要方案一日存在，就杯葛世界盃及其他FIFA賽事。亞洲同中北美洲足協亦加入反對，連FIFA內部都有高層辭職，另有高層公開倒戈，形容成件事係恩芬天奴「一個人嘅Project」。

結果方案公開短短三日，恩芬天奴就宣布收回。

你以為咁就完？太天真啦……飲啖水繼續講。

無權話事，又點樣影響世界盃？

講到呢度，仍然有一個問題未答：FIFA明明話私人股東無權干預賽制同賽程，點解大家仍然認為，賣走兩成商業股權會改變世界盃？

FIFA對呢個問題嘅答案好簡單：唔會，諗下都知佢哋會咁答啦。

按照官方講法，私人投資者最多只係持有FFE兩成股權，唔會參與日常營運，亦無權決定世界盃踢幾多隊、幾時舉行、賽程點排。FIFA繼續控制所有足球決策，總之大家俾錢就得，波壇嘅事唔使你理。

技術上，呢套講法無錯。但我諗極都唔明，人哋俾42億美元買你兩成股權，唔通真係純粹想支持世界和平咩？

私人投資者唔需要直接坐入會議室大叫「我要64隊世界盃」，先可以影響世界盃。只要FFE嘅價值來自轉播、贊助、門票同廣告收入，FIFA以後每一個決定，自然都會多咗一條問題：

「咁樣做，間公司會唔會賺多啲？」

而其實唔使等私人股東入場，呢個方向大家今屆已經睇到。

世界盃由32隊加到48隊，賽事數量大增；球員本身已經踢到過勞，依家仲有人研究2030年再加到64隊。因應高溫而設嘅飲水時間，我明係保護球員需要，但同時亦成功將原本連續嘅比賽切開，變成一個又一個可以插入廣告嘅時段。去到決賽，連中場休息都可以加插大型表演，足球愈嚟愈似向Super Bowl條路進發。

以上全部都係私人股東出現之前，FIFA自己已經做緊嘅事。

咁當外面再多一班俾咗42億美元、等住盤生意升值嘅股東，你覺得佢哋會唔會捉住恩芬天奴隻手溫柔咁講：「天奴，夠啦，球員會攰，球迷睇得舒服最重要，我哋少賺啲唔緊要。」

至於你信不信，我反正信了。

賣嘅唔只係兩成股權

講到呢度，就已經差唔多滿足到我嘅好奇心，舒服晒。

當然，商業化本身唔係原罪。世界盃一直都靠轉播同贊助賺錢，無收入亦無可能向細國足協派發發展資金。問題係足球最獨特嘅地方，正正係球證一吹雞之後，場波可以連續流動45分鐘，而唔係每隔幾分鐘停低賣廣告、睇表演，再提醒你今節賽事由邊間汽水公司全力贊助。

恩芬天奴今次想做嘅，就係將未來世界盃嘅商業價值提前套現，準備今日派俾211個成員足協；至於將來要點樣加比賽、加廣告同加收入，滿足私人股東對回報嘅期望，就留俾下一代球員同球迷慢慢找數。

好彩今次就算每個足協最高有2,000萬美元，恩芬天奴都換唔到足夠支持，方案公開三日就玩完。但成件事至少令大家睇清楚，恩芬天奴想賣嘅唔只係FFE兩成股權，而係世界盃未來可以被改造成一件點樣嘅娛樂產品。

如果恩芬天奴真係打算繼續加隊、加比賽、加廣告位，再加插中場表演，將世界盃改造成一件美式娛樂產品，我不如返去睇大谷翔平仲好。至少棒球本身就係一節節停低，唔會有人為咗播廣告，突然斬開一場原本唔應該停嘅足球比賽。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

呢篇，又係我深夜發作寫出嚟嘅文。梅迪歷禁賽結束，上一文我已經將成單案拆到連WADA份技術文件都譯埋，其實真係無咩好再深究。但當四周靜落嚟，我個腦仍然停咗喺梅迪歷身上。

講明，我唔係Gay，老實講，我唔算好鍾意梅迪歷。佢唔係我最欣賞嗰類球員，見到佢帶甩個波、射上觀眾席、去到最後三分一突然腦斷線，對住阿仙奴又口出狂言，我一樣照笑、照鬧，從來無特別留手。

但唔知點解，每次真正慢落嚟寫佢，筆觸總係會有少少唔同。

可能係因為自己嘅人生都唔算一帆風順，所以見到一個同樣被命運推落谷底、明明已經好努力掙扎，卻仍然唔知幾時先爬得返上嚟嘅人，總會忍唔住望多兩眼。唔一定因為鍾意佢，只係希望佢捱得過，證明人生遇到幾多唔如意，靠努力仍然可以行出另一條路。

英足總解除咗梅迪歷嘅禁賽，還返佢踢波嘅自由。新聞稿一句「即時恢復參賽資格」，睇落就好似監倉大門終於打開，呢場折磨亦正式完結。

但行出監倉、返到屋企，唔等於真正得到自由。前面仲有一道又一道高牆，等住呢個接近20個月無踢過正式比賽嘅人逐道爬過去。

第一道高牆：有操練，唔等於準備好踢波

之前我有寫過，禁賽期間，梅迪歷無放棄過自己。

佢唔可以入車路士訓練場，亦唔可以

接受球會職員指導，於是自己出錢請私人教練、租用Uxbridge FC球場，甚至請龍門陪練。之後再去奧地利開訓練營，流出嘅片段入面，佢仍然跑得、扭得、射得，至少無任由接近20個月將自己由職業球員變成普通人。

但足球員嘅體能，從來唔係身形無走樣、跑得快就代表準備好。

私人訓練可以控制每次衝刺、動作同休息時間；真正比賽就唔會就住你。急停、轉向、碰撞、迫搶，再拖住疲勞嘅身體作出判斷，呢種負荷唔係對住雪糕筒同攝影機可以完整複製。

梅迪歷可能保住咗最引以為傲嘅速度，但能唔能夠連續90分鐘承受頂級比賽，無人知道。佢最缺少嘅唔係訓練，而係十個會逼佢去到極限嘅對手，同十個需要佢配合嘅隊友。

佢努力保住咗自己副身體，但要重新變返一個可以落場比賽嘅球員，呢一道牆，仲要係最矮嗰一道。

第二道高牆：比賽節奏，唔會停低等佢

就算副身體捱得住，雙腳同個腦亦未必記得點樣比賽。

梅迪歷最後一次正式上陣，已經係2024年11月對海登咸。長期無比賽，失去嘅唔止係落場時間，仲有球員對空間、壓力同危險嘅直覺。

私人訓練入面，佢大概知道個波會由邊度傳過嚟、下一步要做啲乜；真正比賽入面，空位可能只存在半秒。對手一貼近、隊友突然改變走線，原本準備好嘅答案就要立即推倒重來。

偏偏呢啲一直係梅迪歷最需要改善嘅部分。

佢從來唔缺速度同天賦，真正拖住佢嘅，係去到Final 1/3之後，幾時傳、幾時射、幾時繼續推進嗰一下判斷。呢種能力唔會因為一個人射多幾百球就自動升級，只能靠真實對抗、犯錯同修正慢慢磨出嚟。

東拿利停賽10個月期間仍然可以跟紐卡素操練，復出前亦踢過閉門賽；即使係咁，賀維仍然預計佢需要大約一個月先回到最佳狀態。梅迪歷停得更耐，亦無呢啲緩衝。

當其他球員不斷累積經驗，佢只能停留喺原地，努力保住離開前嘅自己。但時間唔止無停低等佢，仲將佢熟悉嘅足球世界一併帶走。

第三道高牆：球隊已經換咗一套玩法

梅迪歷離開嗰陣，車路士仍然由馬蛇執教；到佢獲准復出，羅生已經嚟過又走埋，坐喺教練席嘅人變成沙比。

沙比嘅戰術，唔係簡單喺陣容表左邊搵個空格，再將梅迪歷個名放落去。進攻中場要識得喺half-space接應、轉身、串連；邊線球員就要包辦闊度，反覆上落兼處理防守。幾時拉邊、幾時切入中路、失去控球後由邊個首先迫搶，全部都有指定答案。

偏偏梅迪歷過去最擅長嘅，係企闊少少，利用速度直接衝擊對手。佢可以改造成左邊進攻中場、退後變成翼衛，抑或只適合球隊轉打反擊時後備上陣，全部都要重新試過先知。

其他球員至少已經一齊經歷Pre-season、團隊操練同熱身賽；梅迪歷就連最基本嘅戰術課堂都要由第一頁追起。

體能可以靠訓練追回，比賽節奏可以靠上陣適應。但如果搵唔到新體系入面嘅位置，就算梅迪歷仍然跑得同以前一樣快，亦未必知道應該跑去邊。

第四道高牆：桃花依舊，人面全非

就算梅迪歷學識沙比套戰術，佢仲要重新認識身邊每一個人。

佢最後一次代表車路士上陣，正選隊友係祖根遜、迪沙施、托辛、巴迪亞舒尼、維加、卡沙迪亞、KDH、辛祖、安宮古同古爾。去到今次亞洲巡迴名單，十個人入面只剩返托辛。

車路士嘅人腳早已面目全非。佢而家要合作嘅，係基頓斯、艾斯迪華奧、昆達、祖奧柏度、戴納同羅渣士，一班從未同佢踢過比賽嘅新隊友。

足球場上嘅默契，唔係互相Follow Instagram就會自動生成。隊友幾時想要波落腳、幾時會overlap、幾時準備攻前柱，全部都要靠操練同犯錯慢慢建立。

更何況，呢班新隊友亦係佢爭取上陣時間嘅直接對手。當梅迪歷仍然要追趕體能、節奏同戰術，其他人已經早一步向沙比證明自己。

所以，外借史特拉斯堡未必係再次流放，反而可能係最人道嘅復健方法。相比立即同一班已經起跑嘅人爭位，先喺壓力較低嘅環境重新適應比賽，或者先係真正俾佢一次機會。

監倉門已經打開，門牌亦仍然寫住Chelsea。但梅迪歷返到嘅屋企早已重新裝修過幾次，甚至未必再有一間房預留俾佢。

刑期完咗，真正嘅復出先啱啱開始

寫到呢度，可能有人會問：咁多道高牆，梅迪歷仲有無可能爬得過？

老實講，我答唔到。

英足總可以用一紙判決還返佢參賽資格，卻無辦法將被偷走嘅時間一併歸還。但我仍然相信，梅迪歷值得一次真正嘅機會。

所謂機會，唔係8月24日立即將佢塞入正選，再用三場波、幾次帶甩同幾腳飛機判佢生死；亦唔係因為佢經歷悲慘，車路士就有義務無限期等落去。而係俾佢合理時間重新適應職業球隊，再睇清楚佢仲可以成為一個點樣嘅球員。

如果最後答案係外借史特拉斯堡，甚至最終無法喺車路士搵到位置，亦唔代表呢次復出失敗。返唔到原本嗰間房，可能就要行出去，重新搵另一個容得下自己嘅地方。

人生從來唔係努力過，就一定可以攞返原本應得嘅結果。有啲時間失去咗就係失去咗，有啲高牆亦未必真係爬得過。但重獲自由嘅意義，或者從來唔係保證你可以沿住原路行返去，而係終於有資格再揀另一條路。

監倉門已經打開。梅迪歷嘅刑期正式結束，但屬於佢嘅足球生涯，先啱啱重新開始。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

一年前，我寫過一篇巴高嘅球探報告。

當時佢由白禮頓去咗史堡，踢咗半季就由一個防守甩甩漏漏嘅左閘，突然變成中場核心。創造力爆升、對抗數據大幅改善，連一向最令人擔心嘅防守都好似突然開咗竅。於是我相當勇敢咁，將佢形容成一個擁有「精英級組織能力＋精英級單防能力」嘅完全體，仲話佢遲早有機會上車。

一年後，巴高真係上車。照道理，我而家應該cap返舊文，將「一早講咗」四隻大字貼上額頭，再喺大家面前跳返兩轉草裙舞。

但係，講係講中咗，唔代表成份報告都啱。而家25/26球季踢完，樣本由半季變成完整一季，巴高嘅輪廓終於清楚得多。

戴返頭盔先，我唔覺得自己當時係吹大咗。用返嗰半季嘅數據同表現去睇，巴高確實展現過頂級創造力，單防同對抗亦的確比白禮頓時期進步得非常誇張。問題只係，我當時摸到咗一條象鼻，就太快判斷成隻大象應該長成點。

原來我當時摸到嗰條象鼻無錯，甚至比想像中更粗更長；但摸唔到嘅另一邊，仍然有幾個相當明顯嘅缺口。

所以今次唔係要推翻舊文，亦唔係借佢正式加盟車路士嚟認叻。只係想將當年嗰份報告重新擺上枱，順便同大家介紹下呢個上咗車嘅阿根廷人。

當時摸到嘅，究竟係邊一忽？

第一樣，呢樣一定無錯，巴高已經唔再係一個普通左閘。

白禮頓時期嘅佢，最大賣點係

技術同膽量。鍾意攞波、敢向前推進，左腳亦有一定創造力；但無波在腳嗰陣就勁牙煙，企位、判斷同對抗全部睇到人標冷汗。你可以話佢有天份，但點睇都似一件未砌好、說明書又唔見埋嘅零件。

去到史堡，教練索性將佢推入中場。結果好似終於有人搵返本說明書：巴高開始由中後場負責推進、轉邊同送出最後一傳，甚至接管球隊一部分組織工作。

所以我當時嘅判斷，並唔係「呢個左閘傳波幾好」，而係巴高嘅真正身份，可能根本就係一個借咗左閘身體出世嘅Playmaker。

同古古相比，呢個分別更加明顯。古古收入中路，主要係幫球隊保持平衡，安全咁將個波由後場運上去；巴高收入中路就唔係為咗穩陣，而係想直接搵位落刀。

第二樣摸到嘅，就係佢嘅防守確實進步咗。

由白禮頓時期一撞就散，到史堡突然交出相當誇張嘅對抗同單防數據，呢個轉變唔係我幻想出嚟。當一個本身已經識組織、識推進、識創造機會嘅球員，連最大弱點都突然由紅字變成綠字，我自然會開始腦補佢嘅完全體形態。

去到呢度，其實我摸到嘅每一忽都係真嘅。巴高真係變成中場核心，真係有精英級創造力，對抗亦真係大幅改善。

真正出事嘅地方，係我見到三塊Puzzle全部都啱位，就太快當自己已經砌完整幅圖。

組織嗰邊，我反而睇少咗

完整一季之後，最先可以維持原判嘅，係巴高嘅組織能力。

25/26球季，巴高交出6.42 xA、創造38次機會，當中包括13次黃金機會，全部都排喺同位置球員最前列。

呢組數字最有意思嘅地方，唔係佢最後有4次助攻，而係實際助攻仲要比xA少。即係巴高唔係靠隊友射入幾球神仙波刷出靚數據；相反，佢持續將個波送到應該產生入球嘅位置，只係史堡班隊友大晒鬼浪費晒。

數據入面，13次黃金機會特別重要。

好多所謂「組織型」球員，傳球數字可以好靚，但實際只係喺中後場左右橫傳，掂足一百次波都未必真正傷到對手 (望向某個小跳步意大利人)。但巴高唔同，無論由左路斜傳入禁區、喺Half-space送直線，定係突然轉去弱側，佢嘅目的都唔係保持控球，而係直接將對方防線劏開。

不過，佢亦無因為踢得成熟咗，就突然變成一部只識安全駕駛嘅車。

佢嘅傳球成功率由82.1%升到86.3%，證明穩定性確實有改善；但過人成功率仍然只有41.4%，有時見到條窄路都照樣一腳隊入去，嗰種「我見到機會就一定要試」嘅性格仍然喺度。

只係而家嘅巴高，開始識得將風險用喺更值錢嘅地方。佢唔再係每次掂波都亂咁掟銀仔，而係將籌碼集中落真正有機會劏穿防線嘅一腳。

所以組織呢一邊，我當時唔止無睇錯，甚至係摸細咗。巴高唔係一個進攻幾好嘅左閘，亦唔只係另一款內收閘。佢係一個真正嘅Playmaker，只不過起步位置啱啱好喺左邊。

不過防守嗰邊，就無咁好彩喇。

防守嗰邊，我將局部當咗全貌

先講清楚，當時話巴高防守大幅進步，無錯，真係無錯。

25/26球季，佢每90分鐘贏得6.14次對抗，成功率57.4%，兩項都排喺同位置球員前列。至少對手真係埋到身嗰一下，巴高已經唔再係白禮頓時期嗰塊一撞就穿嘅思覺老師紙皮。

問題係，單防只係防守其中一部分。

完整一季之後再睇，巴高每90分鐘只有3.36次防守貢獻，屬同位置球員偏低水平；截球同解圍數字亦排得相當後。呢啲數字唔代表佢懶，始終一個主要負責推進同創造機會嘅中場，本身就唔會好似掃蕩型防中咁四圍填窿。

但反過來講，佢亦證明唔到自己係一個完整嘅精英防守球員。

真正完整嘅防中，唔只要埋身時搶得贏，仲要識得預判傳球路線、封鎖空間、保護禁區同處理第二點。巴高最強嘅係見到人、見到波之後嗰一下對抗；但喺危機發生之前，佢未必係最早察覺，亦未必係最穩定幫球隊閂門嗰個人。

全季5黃1紅，仲輸過一次十二碼，亦反映佢嘅判斷仍然有躁進嘅一面。不過見到有1紅，你就好有信心佢可以極速融入車仔嘅大家庭啦……

另外，舊文引用嘅「一對一攔截成功率85%」，同今次嘅57.4%對抗成功率並唔係同一項指標，唔可以直接當成一年間突然倒退。真正改變嘅唔係巴高，而係我手上多咗一整季資料，終於睇到單次對抗以外嘅部分。

所以呢度唔係推翻自己，而係……嗯少少修正。

巴高確實係一個對抗能力強、落腳唔差嘅組織中場；但佢唔係可以獨力保護防線、包辦所有善後工作嘅精英防中。當時我摸到佢皮厚，就以為成隻象都刀槍不入。

「精英級單防」仍然有討論空間，但「完全體」三個字，就要正式收返。

唔係完全體，先更加需要說明書

收返「完全體」三個字，唔代表巴高唔值得上車。球員極端本身唔係問題，真正問題係教練有無睇清楚佢極端咗乜春。

當年我分析巴高，出發點仍然係馬蛇嘅內收閘體系。但一年之後，馬蛇已經離開，巴高亦證明繼續叫佢做「識踢中場嘅左閘」，其實已經有少少本末倒置。

今日真正要問嘅，唔係佢可唔可以取代已經離隊嘅古古，而係沙比會將佢當成左閘、翼衛、中場，定係遊走三者之間嘅混合角色。

如果要求巴高好似傳統左閘咁沿住邊線上落，當然唔係用唔到。佢識傳中、肯推進，對抗亦足以應付邊路。但咁樣做，等於買咗把開山刀返嚟切生果，斬到係斬到，只係有少少浪費。

巴高最值錢嘅畫面，始終係由左路進入中場之後發生。佢可以喺較後位置接波，再用長傳轉去弱側；亦可以喺左邊Half-space搵直線或者斜傳劏入禁區。佢需要嘅唔係一條固定邊線，而係足夠自由度去揀角度落刀。

但既然佢唔係一個會自動封鎖空間、執齊所有第二點嘅防中，身後就必須有人幫佢閂門。可以係左中堅拉闊補位，亦可以係另一個中場留後保護。總之，唔可以一邊要求佢負責劏開對手，一邊又幻想佢可以瞬間回防，順手執埋自己留下嘅空位。

所以巴高最合理嘅定位，唔係古古嘅後備，亦唔係卡些度嘅替身。佢更加似一個由左路起步嘅進攻型中場，一件可以隨住控球階段改變位置嘅特殊武器。

去到沙比手上，與其將巴高塞返入左閘個框，不如直接承認佢最接近嘅身份，本身就係Playmaker。

佢唔係萬能插頭，但只要接啱條線，巴高可以提供嘅創造力，偏偏又係而家車路士陣中無乜人能夠複製。

球探報告，從來唔係預言書

寫球探報告最令人上癮嘅地方，就係想比其他人早一步睇到球員會變成點。但球員唔係一條寫好晒嘅成長曲線，報告亦只係某個時間點，用有限證據影低嘅一張相。

真正值得重睇嘅，唔係當年有無估中轉會，而係當新證據出現，我哋仲肯唔肯承認張相影唔到嘅地方。舊判斷有根據，唔代表永遠唔使改；後來發現缺口，亦唔代表當初睇到嘅全部都係錯。

一年之前，我摸住半隻象寫低答案。一年之後，隻象行近咗少少，輪廓自然同想像有出入。但巴高真正會變成一個點樣嘅球員，其實到今日仍然未有最終答案。

嗯，我幫自己答辯嘅部分差唔多，希望巴打們高抬貴手，唔好再cap返我舊文出嚟鞭屍，THX。

姑且睇下巴高上車之後，踢唔踢得返史堡嘅實力……又或者會唔會變成第二個黑工山度士。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

各位來賓，歡迎蒞臨 25/26 年度車路士騎呢頒獎典禮。係，你冇睇錯，今年呢個欄目又返嚟。呢度有紅地氈、有頒獎嘉賓、有掌聲，只係無大家想要嘅獎盃。

今個球季，車路士由世界冠軍出發，以聯賽第十收場，中途換咗三個領隊、輸足 13 場、最終連歐戰資格都無埋。呢個球季可以留低嘅，除咗藍色球衣同埋傷心，仲有海量嘅統計數據，忠實地記錄住每一個令我哋眼角抽筋嘅精彩時刻。

花生，唔一定要係慶功時先食。今晚，我哋就用最騎呢嘅眼光、最On9嘅數據，將今季一個個令人眼角抽筋嘅精彩時刻重新搬上頒獎台。佢哋唔一定係最差，只係……各自在某個範疇騎呢得特別出眾。掌聲有請。

禁區旅遊大使獎

一聽就知，呢個獎係用作表揚一班極具打卡精神嘅前場球員。你以為佢入禁區係準備大開殺戒，實質上佢只係熱衷於衝入進攻心臟地帶，親切咁幫大家介紹球場景點。

得獎者：

基頓斯

得獎原因：

量度禁區廢柴有個好簡單嘅自創指標：xG ÷ 禁區觸球次數。呢個數字最能夠精準反映出，到底球員每次成功殺入對方最危險嘅腹地時，實質上可以轉化到幾多起腳威脅。

而基頓斯嘅數據，就將呢個獎嘅騎呢精髓發揮到淋漓盡致。佢每場平均喺對方禁區入面錄得高達 3.59 次觸球，唔講我仲以為自己睇緊美斯嘅數字，但佢最終換返嚟嘅場均 xG，只有可憐嘅 0.082。

用數學公式簡單換算返，等於佢每次喺禁區核心地帶掂波，只能夠產生大約 0.023 xG。再退一步講，佢要喺禁區重複同樣嘅觀光動作足足 44 次，先至可以喺統計學上累積到 1.0 xG。

嗯，44 次到底要踢幾多場先儲到？照佢每 90 分鐘 3.59 次禁區觸球計，大概要完整踢足 12 場。人哋入禁區係搵食，佢入禁區好似儲印花，儲夠十幾場都未知換唔換到獎品。

佢從來都唔係突破唔到，亦唔係帶唔到波去危險區域，而係每一次辛辛苦苦衝到入禁區之後，佢就突然好似中咗降頭咁，由殺手退化成最愛鳩嗚嘅觀光客。每次入去禁區都純粹係想影張相打個卡、話俾大家知「我到此一遊」，多過真正想一腳將個波轟入網。呢個旅遊大使頭銜，佢絕對當之無愧。

YouTube 球王大獎

顧名思義，呢個獎係用作表揚一眾精華片段型球員。單睇網上啲 Highlight 片段，佢哋嘅腳法可能勁過比利，但現實係佢哋往往只有扭波過人嗰一幕，扭完之後嘅推進威脅同創造力完全不成比例，永遠冇下文。

得獎者：基頓斯

得獎原因：

係，又係佢。我呢位評審都覺得好尷尬。

今次唔需要發明太複雜嘅公式，只要將盤扭量，同盤扭之後帶嚟嘅推進威脅及創造力擺埋一齊睇，就已經足夠殘忍。

而基頓斯嘅數據，再次為我哋帶來極強嘅畫面感。佢每 90 分鐘錄得高達 6.24 次盤扭，數字上絕對係隊內最頂級、最鍾意扭波嘅球員。如果你平時只係開 YouTube Shorts 或者 Reels 睇佢，佢每段片都好似新夏薩特降臨一樣，假身內切極度清脆。

但當你拉返 90 分鐘嘅數據出嚟，就會發現好多突破其實只係靚仔地推前兩步，對大局毫無幫助。佢每 90 分鐘嘅 xT Carry 只有可憐嘅 0.047，關鍵傳球更低見 0.31。換言之，佢唔係唔扭，係扭完之後個故事通常去唔到下一集。

相比之下，陣容入面盤扭次數差唔多嘅加拿祖，xT Carry 達到 0.097，關鍵傳球更有 1.01。人哋扭完波起碼真係撕開到防線、帶動隊波向前走。反觀基頓斯，有波喺腳就一定要玩個人主義，結果下下無以為繼。呢個活喺精華入面嘅「YouTube 球王」，佢當之無愧。

最佳冗員大獎

一聽個名就知道，呢個獎係用作表揚一班「睇落態度滿分、實際產能另計」嘅球員。呢類球員喺球場上跑動好多、逼得好盡，但實質上往往徒勞無功。情況就好似公司入面成日話自己好忙、行嚟行去嘅同事，看似為公司鞠躬盡瘁，但當你問佢今日到底完成咗咩，佢又完全答你唔到。

得獎者：戴納

得獎原因：

量度呢種盲目奔跑，可以將幾組數據擺埋一齊睇：前場壓迫次數極高，但實際奪回球權同成功防守動作偏低。即係有態度、有體能，但最後記落佢自己本數嘅成果往往唔多。

先戴返個技術頭盔，Pressing Duel、奪回球權同成功防守動作唔係同一條流水線。一次壓迫可以逼到對手傳失，最後由隊友搶返個波；一次球權回收亦未必直接來自壓迫。不過，將幾組數字放埋一齊，至少可以睇到佢嘅壓迫投入，同個人防守產出有幾唔成比例。

睇返數據，戴納今季每 90 分鐘大約有 2.70 次 Pressing Duel，喺一班前場攻擊手之中係最高嘅，證明佢真係好落力、絕對唔係企喺前場扮工。但問題係，佢每 90 分鐘奪回球權只有可憐嘅 1.25 次，成功防守動作亦只有 2.56 次。

對比之下，同樣好肯壓迫嘅彭馬，每 90 分鐘有 2.85 次奪回球權同 3.92 次成功防守動作；而祖奧柏度嘅回收球權亦高達 2.91 次。兩組數字一比，戴納就顯得極之尷尬。佢喺呢批前場球員入面壓迫得最積極，但實質記喺自己名下嘅成果居然係最少。

佢喺場上Call會、覆 Message、CC 全世界做足全套，有追、有逼、有跑，但往往只能夠喺空氣中撲空，產出完全追唔上同事。呢種勤力但無用嘅表現，呢個大獎佢當之無愧。

防線恐怖分子大獎

呢個獎顧名思義，係要搵出邊個係「每次自己半場失波都特別容易變大鑊」嘅炸彈人。我哋引入一個指標叫危險轉化率（自己半場危險失誤 ÷ 自己半場總失波）。淨睇總數你只會知邊個甩波多，但加埋呢個轉化率，先至會知邊個唔爆猶自可，一爆就搞出人命。

得獎者：艾殊邦

得獎原因：

可憐嘅邦仔，明明出場時間已經唔多，但居然得獎。不過先戴頭盔，出場時間唔多代表樣本細，但佢嘅 Per 90 數字依然觸目驚心，呢個先係真係恐怖嘅地方。

邦仔每 90 分鐘有 3.86 次自己半場失波，單睇數字雖然唔係全隊最高，但佢每 90 分鐘錄得高達 0.94 次危險失誤，直接高居全隊第一。最恐怖嘅係佢嘅危險轉化率高達 24.4%，代表佢每喺後場甩 4 次波，就有 1 次會直接將整條防線送入險境。

用人話講，佢未必係場場爆炸，但一著火就多數要消防車到場。呢種一甩就大鑊嘅特質，令看台球迷同門將心臟都 Keep 住瘋狂跳動，呢個恐怖分子頭銜絕對實至名歸。

不過講到後場驚嚇，今次典禮必須加設一個特別獎項，叫做

後場玩火大獎，得主係科芬拿。

科芬拿嘅數據非常奇特，佢每 90 分鐘喺自己半場失波高達 5.21 次，全隊最高，直頭係無時無刻都喺後場點火。但神奇在佢嘅危險失誤得 0.56 次，危險轉化率只有 10.7%。

即係話，佢係屬於「長期玩火、但未必次次引爆」嘅高空鋼線人。雖然佢失波多，但未必每次都即刻變災難場面。不過，正如大家季尾所見，長期咁樣喺危險邊緣試探，總有一日會出大事。季尾條防線頂唔順集體崩潰，呢位玩火大師絕對有不可磨滅嘅功勞。

史丹福橋和平獎

呢個獎唔係懲罰射得少嗰班，而係表揚最擅長將高質素機會射到冇晒威脅嘅前場球員。每當隊友辛辛苦苦送到個波去危險區域，佢總能用最和平、最不具殺傷力嘅方式，親切地幫對面後防化解危機。

得獎者：加拿祖

得獎原因：

要量度邊個最叻幫對面解圍，可以睇一個進階數據：PSxG - xG。xG 代表呢腳射門起腳前、個機會本身有幾大威脅；而 PSxG 則代表射完之後，個波實質中龍嘅威脅有幾高。如果兩者相減得出負數，即係你用自己嘅業餘射術，將一個原本好有威脅嘅攻勢，射到完全冇晒威脅。

而加拿祖今季就交出咗一組非常神聖嘅數字：PSxG - xG = -1.56。

呢個累積數字代表咩？代表佢唔係冇人傳波，亦唔係去唔到靚位置。相反，佢成日都會出現喺你覺得「有啲嘢睇喎」嘅核心地帶。但下一秒，原本仲有少少殺傷力嘅機會，只要經佢隻腳一射，個威脅值就會瞬間被消滅。每次起腳，對面門將即刻安心，後衛即刻拍手，車迷就即刻抱頭。某程度上，佢比對面中堅更加有效率，因為對面仲要跑去封位攔截，佢自己一腳已經幫人完成清波解圍。

當然，最後都要理性戴返個技術頭盔。PSxG - xG 出現負數，往往會受到被迫急射或者對手極限封位影響。睇返加拿祖今季嘅場均 xG Per Shot 其實有 0.11，證明佢平均起腳位置都有一定質素，雖然未去到祖奧柏度嗰種真正黃金機會，但起碼都有板有眼。

去到全季累積 -1.56 呢個幅度，當然未足以判定佢成世都係射門廢柴，但至少喺 25/26 球季，佢最後一腳嘅處理確實長期出事。呢個和平獎，唔係終身成就獎，但今年由佢攞走，絕對冇得投訴。

最強人肉沙包大獎

呢個獎簡單爆，只計一件事：每 90 分鐘到底輸幾多次防守對抗。因為如果一個球員全場只係對抗一兩次，就算輸晒、勝率係 0% 都未必真係影響大局；相反，就算勝率唔差，輸咗嘅對抗次數依然可以多到嚇你一跳。

得獎者：古古尼亞

得獎原因：

要量度邊個食得最多拳，公式係用每 90 分鐘防守對抗次數乘以輸嘅百分比。

而古古尼亞今季嘅數據就極之矛盾。佢每 90 分鐘要進行高達 7.56 次防守對抗，參與量係全隊最高級別，證明對手經常搵佢嗰邊做突破口，或者隊友失位要佢出手補鑊。雖然佢嘅防守對抗勝率有 61.72%，表面睇絕對合格甚至算係唔錯，但因為基數實在太大，換算落嚟，佢每 90 分鐘仍然大約會輸 2.89 次防守對抗，無奈地成為全隊輸對抗次數最多嘅球員。

呢個獎頒畀佢其實有少少悲情。佢唔係最軟弱，但佢係全隊最常被迫進入埋身戰嗰個。當你日日都要上擂台打交，總會有幾拳食正落面。古古尼亞今季就係咁：好勤力、好搏命，但數據上輸防守對抗嘅絕對量，仍然令佢無奈成為全隊最強人肉沙包。

總結：騎呢獎唔等於最差球員榜

典禮到此結束，六個正式獎項各有得主，基頓斯更加一晚梅開二度，另外仲有科芬拿勇奪特別獎項。

不過笑完都要戴返頭盔。呢份名單唔係今季最差球員排行榜，更加唔代表所有得獎者都應該即刻清洗。有啲獎反映真缺點，例如基頓斯扭完冇下文、加拿祖將機會射到和平收場；有啲就同角色、工作量或者樣本有關。古古正正係最好例子，佢唔係對抗最差，只係打得最多，結果連食拳都食得比人多。

但呢啲騎呢數據，仍然忠實記錄咗 25/26 球季最荒謬嘅一面。BlueCo 用天價買返嚟嘅年輕未來，今季最先集齊嘅唔係獎盃，而係禁區旅遊大使、YouTube 球王、最佳冗員同史丹福橋和平獎。人就真係買咗好多，至於幾時先砌得成一隊波，評審團仍然等緊答案。

希望下年同樣時間，候選名單可以短少少。最好短到連篇文都寫唔成，我絕對願意犧牲呢個年度傳統。

不過照 BlueCo 個買人速度睇……嗯，下年再見。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

沙比帶隊第二場公開嘅熱身賽，不敗金身就正式被破。但係令車迷最失望嘅係，熱刺下半場只係得10個人，車路士圍攻大半場都入唔到，最後補時反而俾李察李臣絕殺。

我知你想講咩，我幫你講：「垃圾沙皮狗Out！Blue Co Project失敗！車路士降班！」

嗯，如果你真係咁諗，咁可能我哋唔太啱傾……

熱身賽贏波當然開心，但輸一場就拎嚟決定領隊生死，認真就輸了。相比起上場對住澳職包尾嘅西悉尼流浪者，今次面對熱刺先係沙比套新系統第一次真正接受英超強度測試。

結果雖然輸咗，但無必要急住幫佢搵藉口；因為熱身賽真正有用嘅地方，本來就唔係保住條不敗紀錄，而係睇下架車踩快少少，究竟邊粒螺絲會首先飛出嚟。

諗法頂得住，對抗未得

沙比今場大致沿用上場嘅組織方式。車仔控球時，

拉維亞會向左邊外推，哈圖就由左閘位置內收，同中堅拉開成五人第一線。艾素高就游走成條中場線，負責掃蕩同第一時間向熱刺持球者施壓。

單睇頭十幾分鐘，呢套諗法其實算頂得住。車路士逼搶力度唔低，熱刺亦無乜真正威脅到防線；但要話場面五五波又有少少勉強，因為車路士雖然守得住，進攻就未算入肉，兩邊都搵唔到缺口，但熱刺明顯踢得更從容。

差別就出喺對抗強度。拉維亞復出表現對辦，幾次接波、轉身同帶球推進都證明佢有能力將個波由後場帶生；但佢加艾素高對住東拿利同加拉加，中場硬度始終輸蝕。尤其艾素高，上場對住西悉尼可以搶完再慢慢傳，今場熱刺一埋身就唔俾佢舒服處理，表現立即狼狽咗好多。

上半場約83%傳球成功率亦反映到問題。唔係每次都有人傳失，而係好幾球傳嗰個以為隊友會走位，接嗰個又完全無呢個意思。

到呢個位，睇得出架車嘅零件大致裝啱位置，但一踩快少少，唔同零件之間就開始有吱吱聲發出…

兩球折射，反映出兩種精神面貌

架車響咗無耐，第一粒螺絲就真係鬆咗。17分鐘，艾素高喺中場失去控球，熱刺反擊，加拉加隨即向前插，車路士後防唔追又唔得，結果禁區頂被拉空，俾東拿利有空間起腳。射門省中高維爾改變方向，車仔門將舒曼路維完全反應唔切，車路士就此落後。

呢球有折射成份，但又唔可以全部推俾運氣。由中場失去控球，到無人及時填補禁區頂，熱刺只係一次簡單前插，就將車路士幾個仍未磨合好嘅位置全部扯開。

不過，同上季下半季唔同，今次失波之後，班球員無流露出「又嚟喇，今場追唔返㗎喇」嗰種氣氛。幾分鐘後，拉維亞先喺後場自己扭過對手，將個波帶生再交上前；哈圖入侵Half-space拉開空間，基頓斯先有位置喺左邊傳中。

我本身係自己筆記度先寫完兩翼未製造到威脅，點知基頓斯就即刻用個傳中打我臉。個波省中賓戴維斯再飄去後柱，過程的確有少少運氣，但拉維亞點樣破壓、哈圖點樣走位、二安點樣甩開羅拔臣攝到後柱，全部都係有意識嘅進攻。

一球折射令車路士落後，另一球折射就幫車路士追平。運氣一人一啖，但沙比車失波後無斷電散架，先係兩球之間最值得留意嘅分別。

唔係拆唔開，只係射唔入

49分鐘，丹素領紅，熱刺等於突然讓出條快線，俾車仔可以上高速踩盡油門。由原本連主導權都搶唔實，變成長時間圍住熱刺禁區進攻。

打多一人嘅車仔亦唔係齋喺外圍慢駛。祖奧柏度帶住前場運轉，左路亦幾次成功落底傳中；二安先接應祖奧柏度傳送起腳，被堅斯基神反應救出，之後車仔前場搶返控球，二安再次獲得單刀機會，但又過唔到同一個人。其後彭馬禁區內射門被封，祖奧柏度亦有近門起腳被救。

所以問題唔係車路士拆唔開十人熱刺嘅防線。無論靠邊路落底、前場反搶，定係趁對方未企穩直接衝入禁區，車仔其實製造到足夠機會。只係熱刺守將封鎖射門路線做得好，堅斯基又突然上身，硬係將成條高速公路封到得返一條罅。

當然，龍門上身係一回事，車仔自己射唔入又係另一回事。製造機會呢份功課算合格，但架車油門就算踩到底，去到堅斯基面前仍然要急煞。唔係拆唔開，只係由門前去到入網嗰幾米，過唔到就係過唔到。

換完零件，連記憶都換走埋

去到80分鐘，沙比一次過換入大批後備同年輕球員。熱身賽本身就係用嚟驗貨同分配上陣時間，呢個安排無問題；但奇怪嘅係，架車換完零件之後，好似連架車嘅導航系統都換走埋。

換人前，車仔至少知道邊個向前壓、邊個留後保護、失去控球之後又由邊個執漏。換人後，成隊波嘅站位同工作分配變得鬆散。熱刺明明少打一人，反而接連搵到反擊空間，甚至兩度射中門柱。

到補時階段，熱刺再次由後場反擊。第一腳起腳後，沙亞同安瑟明路都無跟實李察李臣，結果中柱之後就俾佢趕到門前執雞絕殺。呢球唔係純粹黑仔，而係車仔由限制第一腳射門，到追蹤第二點都做得唔完整。

當然，臨時將一批年輕球員砌埋，無可能要求佢哋立即運作得好似原裝出廠咁。但換完零件之後，架車連自己應該行邊條線都唔記得，呢個就係沙比要由今場帶返訓練場處理嘅另一份功課。

總結：友賽唔使判死刑，只負責驗車

Well，講到底，沙比當然未需要Out，Blue Co Project亦未至於因為一場熱身賽就宣告破產。相反，今場輸得幾合時。上場對住西悉尼，架車慢駛之下都可以撞開對手完全無問題；今場一踩上英超嘅速度，對抗、埋門同換人後嘅分工就全部露晒底。

至少，套骨架證明係有得砌。拉維亞可以將個波由後場帶生，哈圖、基頓斯同二安嗰次配合亦見到進攻雛形；即使失波，班球員都無即場死機。問題係去到真正英超強度，條中場仍然唔穩；即使多打一人製造到足夠機會，架車亦始終衝唔過堅斯基；到大量換人之後，連最基本嘅防守分工都一齊消失。

贏波負責令人開心，輸波就負責將問題放大。熱身賽從來唔需要怕輸，反而係贏完之後以為自己已經無嘢要改，咁更加可怕。

真正要判沙比生死嘅唔係今日個賽果，而係去到正式開季，當架車再次踩盡油門，今日發出吱吱聲嗰幾粒螺絲，究竟收緊咗未。

下場，喺香港再講。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

車路士班體育總監個辦公室，應該收埋咗一個轉盤同十支飛鏢。轉盤上面密密麻麻寫住成堆妖人個名，每朝返工就蒙住眼掟十次，總之飛中邊個，就向邊個埋手。至於開價幾多，就睇支鏢插得有幾深。

今次被飛鏢選中嘅幸運兒，係般尼茅夫中場阿歷斯史葛。

22歲，上季英超3球1助攻，唔係咩入球助攻雙雙上雙嘅中場怪物，亦唔係一望就知值成億嗰種天選之人。結果車路士一開價就去到£64m，般尼茅夫仲要Say No，據報要接近£80m先肯坐低傾。

嗱，見到呢度，你第一個反應係「車路士又俾人劏」，完全合理。畢竟£80m呢個價，唔知嘅仲以為般尼茅夫打算連史葛、訓練場同埋海灘使用權一齊賣俾我哋。

但既然傳得，例牌都要做下功課。當我撳開佢嘅比賽片段同數據，件事開始變得有少少麻煩。因為史葛最值錢嘅工作，偏偏全部都係Fantasy無分、Highlight未必會剪，但現代大會球探最鍾意嗰類嘢。

所以，今次先唔好急住笑車路士又亂使錢。真正要問嘅係：

阿歷斯史葛到底有咩咁吸引大會，令一個3球1助攻嘅中場，可以令車路士出到£64m，般尼茅夫仲夠膽還價£80m？

£25m買英冠神童，頭兩年先忙住交醫療報告

史葛唔係突然喺般尼茅夫彈出嚟嘅一季貨。早喺布里斯托城年代，佢已經

係英冠其中一隻最搶眼嘅妖人。17歲踢一隊，19歲拎到英冠年度最佳年輕球員；當時吸引球探嘅亦唔係入球助攻，而係佢喺中場受壓之下照樣敢接波、轉身，再自己帶個波穿過第一道防線。

2023年，般尼茅夫用大約£25m將佢買上英超。對一個未踢過英超嘅19歲中場嚟講，呢口價本身已經唔平。換句話講，史葛身上嗰張「英格蘭高級妖人」價錢牌，唔係車路士班體育總監臨時印上去。

問題係，件貨送到之後，頭兩年大部分時間都只係喺文員房打字。

加盟時佢已有膝傷，到2023年11月，另一邊膝頭又出現二級MCL傷患。翌季好不容易開始企穩，半月板再出問題，需要接受手術，休養超過三個月；季尾對維拉又撞斷下顎，再做多次手術。

下顎骨折屬於碰撞意外，但連續兩季出現唔同膝部傷患，就唔可以一句「後生仔好快好返」輕輕帶過。史葛頭兩年喺般尼茅夫嘅最大敵人，甚至唔係英超節奏，而係點樣連續踢到十場波。睇到呢度，相信你已經明白車仔文員部點解想搵佢加盟幫手打字。

直到25/26球季，佢先終於交出一季完整履歷：37場英超、34次正選，正式由「有天份但唔知幾時又入廠」變成般尼茅夫中場主力。

一季健康當然唔代表舊患自動Delete，但至少證明目前頂得住完整英超球季。只不過以佢過往嘅膝傷密度，車路士醫療團隊最好今次真係由頭摸到落腳，摸清楚先好簽。

唔係新卡些度，係一個人打N份工

見到史葛上季奪回球權6.14次／90分鐘，先唔好急住幫佢改名做「新卡些度」。兩個人都識搶波，但搶法同位置完全係兩回事。

卡些度擅長留喺中場底部閱讀危險、正面拆彈；史葛就似個周圍走嘅執屎專員，靠反迫搶、橫移同追第二點，邊度出現甩漏就衝去補位。放喺雙中場，佢可以係高活動量嘅第二防守者；但如果叫佢單人坐鎮中路保護三中堅，嗯，唔好咁期待好啲。

史葛真正值錢嘅地方，係搶完個波之後唔使再等人接應。

佢上季有1.55次前進帶球／90分鐘，敢喺中場最擠迫嘅位置背身接波，用身體頂住第一下壓迫，再轉身帶過中場線。其他人搶返個波，第一個反應可能係交俾隊友處理；史葛就可以自己由資源回收做到送貨，將一次解除危機直接加工成反擊。

面對高位壓迫，傳球路線可以預先封死，但一個中場突然連人帶波穿過第一線，對方成套迫搶就有可能即時hang機。史葛未必交到最後一刀，但可以親自將個波由最危險嘅位置，送到可以進攻嘅位置。

而且佢並非淨係識帶。史葛每90分鐘亦有4.44次前進傳球，識得喺吸引對手埋身之後，將個波向前交入空位。只不過，識向前傳同識控制一場波始終係兩回事。安素係用傳球慢慢扯開對方防線；史葛就係見到條罅，連人帶波撞入去。

至於3球1助攻，只能證明佢偶爾可以踩入禁區完成攻勢，未去到10號或者創造王級數。大會買史葛，唔係買一招練到S級嘅必殺技，而係買一個可以由搶波、接應到推進，幾道中場工序一條龍做晒嘅Package。

問題只係，呢套一條龍服務放入車路士，究竟係正選級新武器，定係一個£64m嘅豪華後備？

£64m買新武器，定買第四個中場？

將史葛放入車路士，最容易想像嘅用法係拍住卡些度。卡些度留喺防線前執手尾，史葛就向前追波、反迫搶，再用持球推進撞穿第一道防線。面對逼得高、唔俾你慢慢組織嘅對手，呢個組合會相當有效，至少個波唔會永遠困喺後場互傳，等山齊士控波控到甩咗出醜先。

但一去到對住Low Block，問題就會360度反轉。史葛可以將個波帶到前場，但暫時做唔到安素咁，用傳球慢慢扯開一條收窄咗嘅防線。

簡單講，史葛唔係前線版卡些度、唔係青春版安素、亦唔係健康版拉維亞。佢係另一種中場武器，強項係令車路士多一條由守轉攻嘅快線。

呢種變化當然有價值，但車路士中場又唔係無人。安素、卡些度同拉維亞各有角色，仲未計有硬淨嘅艾素高做大後備。史葛同佢哋都唔完全重疊，但亦未去到「無佢就踢唔到」嘅程度。問題唔係佢有無能力，而係車路士準備俾佢幾多上陣時間。

£64m本身未算完全亂嚟。史葛得22歲、英超驗過貨、有Homegrown身份，般尼茅夫當年亦已經用大約£25m買入，根本無理由平放。

但£80m就係另一回事。呢個唔再係史葛嘅能力評分，而係般尼茅夫叫車路士補償佢哋點解要賣。

更何況，史葛仍然有膝傷履歷，亦只係啱啱完成第一個完整英超球季。去到£64m甚至£80m，買返嚟已經唔可以話「大家良性競爭，等佢慢慢適應」。呢啲係正選價，唔係第四中場價。

總結：球員無問題，問題係張訂單寫住咩用途

所以成單交易其實好簡單。

如果安素離隊，或者沙比指定要一名正選級持球推進中場，史葛可以為車路士提供完全唔同嘅解法。佢得22歲、英超驗過貨，仲有Homegrown身份，只要膝頭頂得住，£64m雖然貴，但至少講得通。

但如果安素留隊，拉維亞仍然喺計劃之內，車路士只係想搵個第四中場分擔傷病風險，咁用£64m買史葛返嚟坐後備席，就同用林寶堅尼送外賣差唔多。唔係做唔到，不過建議返車仔財政部去驗下個腦先。

至於般尼茅夫叫到£80m，車路士更加無必要證明自己支飛鏢插得有幾深。史葛要證明自己值一個正選位置；班體育總監亦要證明，佢哋唔係再一次用正選價錢，買件自己都未諗好擺喺邊嘅玩具。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

屌，真係唔好再嚟喇。

兩個鐘前，英格蘭足總先突然公佈車路士油王年代74項違規嘅判決，搞到我即刻放低原本準備好嘅文，臨急臨忙寫多篇解釋文。唔夠兩個鐘，我以為終於可以收工餵奶瞓覺，英足總又突然掉份聲明出嚟：

「梅迪歷，禁賽結束，即時可以復出。」

嗯，好，咁我再出多一篇突發啦。但如果再有第三單，麻煩大家當無睇到，我想休息。

講返梅迪歷，今次我又要厚顏無恥咁讚自己。今年4月30日，梅迪歷被判停賽四年嗰晚，我曾經計過一個最樂觀劇本：「最快喺今年夏天，佢就可以甩難，光明正大咁行返入車路士嘅訓練場，甚至隨時趕得切參與季前熱身賽。」

三個月後，梅迪歷真係即時解禁。根據Nizaar Kinsella報道，佢甚至預計會直接前往香港，同車路士大軍會合。

係咪好神？係咪應該將我由球壇燈神個LIST度除名？

唔好意思，睇嚟唔可以。因為我同紫霞仙子一樣，估中咗個開頭，估唔到個結局。

估中一部份，但個龍門搬咗去火星

我當時條公式其實好簡單：梅迪歷已經捱咗16個月，如果佢嘅律師團隊可以照辦煮碗，說服體育仲裁法庭將四年刑期劈到同普巴一樣嘅18個月，咁佢最多再等兩個月，就可以喺今個夏天復出。

結果，18個月無出現，CAS亦無正式推翻判決。真正救返梅迪歷嘅，係

WADA直接拆走成個龍門，再搬到去火星。

根據英格蘭足總最新聲明，梅迪歷喺2024年10月接受藥檢時，樣本入面驗出低濃度嘅Meldonium。今年1月，獨立紀律委員會裁定佢違反禁藥規例，正式判處四年禁賽。梅迪歷其後向CAS提出上訴，原本大家都以為，下一場仗會係爭論佢有無蓄意服藥、責任有幾大、刑期又應該減到幾短。

但喺上訴期間，WADA更新咗一份叫做TD2027MRL嘅技術文件，為Meldonium加入新嘅最低呈報水平。

簡單啲講，以前實驗室驗出極低濃度嘅Meldonium，仍然可能需要舉旗報告；新標準就將條界線大幅搬遠，低過指定濃度嘅結果，連成為禁藥個案嘅呈報門檻都掂唔到。

而英足總份聲明最爆炸性嘅一句，就係佢哋親口承認：如果梅迪歷嗰個樣本係今日先收集，當中嘅Meldonium濃度根本唔會被呈報，亦唔會構成任何禁藥違規。

即係話，梅迪歷唔係靠律師證明自己清白，亦唔係CAS突然大發慈悲幫佢減刑。佢只係坐咗接近20個月波監之後，球證先行過嚟同佢講：

「唔好意思，球例更新咗。你當日嗰球原本判入，但VAR睇完最新條界線，發現個龍門已經搬咗去火星，所以入球無效。」

當日足以判佢停賽四年嘅濃度，放到今日，連開案都未必開得成。梅迪歷估唔中個龍門會搬咗去邊，我估唔中條算式應該點計，但最終大家居然都撞中同一個答案：今個夏天，佢真係可以復出。

龍門搬走咗，但張黃牌無取消

不過，呢度有一點非常容易令人誤會：梅迪歷唔係上訴得直，亦唔係獲判無罪。

WADA份新技術文件並無追溯力。換句話講，雖然同一個樣本放到今日，低濃度到連舉旗報告都唔需要；但喺2024年接受檢測嗰刻，佢確實踩中咗當時條界線。龍門今日搬咗去火星，唔代表足總會返轉頭，將前年嗰張賽果重新改寫。

所以，梅迪歷最終接受咗自己違反禁藥規例，英足總亦無撤銷原本嘅違規裁定。雙方只係喺WADA同意之下，根據《世界反禁藥規章》第10.8.2條達成和解：梅迪歷承認違規，刑期就改為等同截至和解當日已經服完嘅時間。

翻譯成人話，就係：「你仍然有罪，但你已經坐夠。」

於是，原本仲有超過兩年先完結嘅四年禁賽，喺一紙協議之下突然變成服刑完畢。梅迪歷唔需要再等CAS開庭，唔需要再等法官逐項拆解牛牛幹細胞、烏克蘭隊醫同舒夫真高嗰堆羅生門，亦唔需要證明自己究竟係點樣攝取到Meldonium。

至於成件事嘅真相係乜？唔知道。

英足總份聲明只係含糊咁提到，除咗WADA修改技術標準之外，和解亦考慮咗案件嘅「其他情況」。究竟係污染、醫療失誤、無心服用，定真係有一隻啪咗藥嘅牛，官方一樣無交代。

所以大家暫時唔好急住幫梅迪歷寫成沉冤得雪嘅主角。佢無洗脫罪名，牛牛劇本亦無獲得官方認證。唯一可以肯定嘅係，對住一個以今日標準連案都未必開得成嘅低濃度結果，英足總、WADA同梅迪歷最終都同意，無必要再將餘下兩年幾刑期執行落去。

PS，如果你唔知我講緊咩牛牛劇本，建議睇返舊文：

【車迷觀點】梅迪歷禁藥羅生門背後　牛同錢加名宿嘅驚天奇案

總結：刑期完咗，失去嘅時間無得還

對英足總同WADA嚟講，呢單案或者已經正式結束。更新技術標準、簽署和解協議，再用一句「即時恢復參賽資格」，所有法律程序就可以整整齊齊咁放入檔案櫃。

但對梅迪歷嚟講，事情無可能就咁一筆勾銷。

由2024年12月被臨時停賽開始，佢已經失去接近20個月。對一個普通人嚟講，20個月可能只係轉兩次工、換兩部電話；但對一個依賴速度同爆發力、正值25歲黃金年齡嘅職業球員嚟講，呢段時間可能就係成個生涯最珍貴、亦最無可能補返嘅部分。

更何況，解禁只係代表佢重新獲准踢波，唔代表沙比會自動喺陣容入面留返個位俾佢。

梅迪歷離開嗰陣，車仔左路仲有辛祖；到佢準備返嚟，辛祖走咗，加拿祖亦同佢擦身而過，基頓斯同一班新兵已經進入球隊。接近20個月無正式比賽嘅佢，體能、節奏、判斷力仲剩低幾多？沙比又願唔願意花時間，重新教呢架一直有速度、但未完全學識轉彎嘅跑車？

全部都係未知之數。但至少，佢終於有資格親自回答。

以前佢只能夠喺Uxbridge嗰塊空蕩蕩嘅人造草地上面，一個人對住攝影機重複跑動同射門；依家佢或者可以飛去香港，重新行入真正嘅車路士訓練場，同隊友一齊爭一個位置。

四年禁賽曾經幾乎斬斷佢嘅職業生涯，WADA搬走個龍門亦還唔返失去嘅20個月。但同辛祖、加拿祖擦身而過之後，梅迪歷嘅前路未必已經封死，可能只係要由另一個方向重新開始。

嗰把喺黑夜入面磨咗接近兩年嘅刀，終於可以再次出鞘。至於仲利唔利，今次唔使再等英足總判。交返俾梅迪歷自己證明。

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。

油王阿巴莫域治留低嗰盤舊帳，今日終於正式埋單。

英格蘭足總宣佈，車路士承認油王年代涉及經理人、中介人同第三方付款嘅74項違規，判罰1,000萬鎊，另外加一個暫緩執行嘅兩個轉會窗禁註冊令。

我估有唔少巴打係見到我標題寫「禁轉會」三個字，而入嚟，亦相信唔少非車迷已經開咗香檳，慶祝緊萬惡嘅金錢足球又被正義制裁，不過我有個壞消息要同大家講：車路士唔係即時禁止買人，今個轉會窗依然可以繼續鳩買。

而且相比起最初可能面對嘅扣分，今日呢個結果，已經算係執番身彩。

油王年代到底做過乜？

先嚟回帶一下，雖然已經講過無數次，但都係要重提以免無跟開嘅巴打唔知。今次74項指控，涉及2009年至2022年期間嘅球員交易，無錯，就係你哋最鍾意吹奏果位同Blue Co唔同、純白無垢永遠唔會做錯商業決定嘅油王爸爸年代嘅嘢。

話說當年

部分收購並無完整申報經理人、中介人同第三方付款，當中包括使用未獲授權嘅經理人、隱瞞交易安排，甚至透過其他公司支付無申報款項。

BBC報道提到，同一批歷史交易牽涉約4,750萬鎊秘密付款；而FA今次處理嘅，就係當中涉及經理人、中介人、隱瞞交易同第三方投資等違規。

想睇詳細名單、付款方式同邊幾單交易出事，可以睇返我之前兩篇舊文。今次唔再由頭拆多次，否則呢篇文隨時又變成萬字考古報告。而FA果邊都有原文可以睇，我會放喺最底大家自己參詳一下。

最重要係，呢啲全部都係油王年代嘅舊帳。BlueCo喺2022年收購車路士期間發現問題，之後主動向FA申報，亦一直配合調查。

換句話講，唔係FA突然捉到今日嘅車路士出術，而係新班主買樓驗樓嗰陣，發現前業主喺牆入面埋咗一堆違規水喉，唯有自己報告兼找數。

原本差啲要扣六分

今次最值得慶幸嘅，其實唔係1,000萬鎊罰款有幾平，而係車路士避過咗扣分。

原審判決本來包括暫緩扣六分，生效期去到2027年6月30日。車路士其後提出上訴，最終上訴庭取消呢項處分，改成同樣暫緩執行嘅兩個完整轉會窗禁註冊令。

點解可以成功上訴？

FA果邊嘅原審委員會認為，舊管理層透過違規操作搶球員，目的之一確實係取得競技優勢；但上訴庭認為，無足夠證據證明車路士實際取得咗幾多競技優勢，更加無證據證明呢啲交易改變過比賽結果、聯賽排名或者獎盃歸屬。

加上案件由新班主主動揭發，涉事行為基本上亦來自舊管理層，要今日嘅球員同球迷用聯賽積分找前朝條數，的確唔算合理。

所以最後結果係：唔扣分，罰1,000萬鎊，再留低一個暫緩禁令作為警告。

對車路士嚟講，呢1,000萬鎊當然唔係碎銀，但能夠用錢解決一單橫跨十幾年、涉及74項違規嘅歷史案件，已經可以講句：無扣分，我哋贏。

暫緩禁令之後會點？

等等，咁又話「最重可能要被禁轉會一年」？吹水？

實際文字其實係「暫緩兩個轉會窗禁註冊」，唔係話車路士由今日開始一年內唔可以買人。

車路士目前仍然可以正常收購同註冊球員。只要去到2027年6月30日前，球會唔再犯下同今次相同或者類似性質嘅違規，呢個禁令就唔會執行。計嘅係違規行為幾時發生，即使過咗期限先被揭發，FA仍然可以追究。

如果期間再出事，FA先可以申請啟動全部或者部分禁令，而新違規亦可能另外再罰。

所以呢把刀主要係掛喺車仔頭上，提醒BlueCo唔好再重複油王年代嗰套黑箱玩法。至於體育總監們，仍然可以繼續上網抽幼幼卡，暫時無人阻止到佢哋。

另外，FA表示仍然會調查案件涉及嘅個人責任。即係球會層面嘅主要罰則已經落實，但當年有份參與嘅個別人士，未必已經完全甩身。

總結：輝煌係真，黑帳亦係真

今日呢張1,000萬鎊罰單，就係車路士為油王年代嗰套不惜一切代價搶人嘅模式正式找數，亦可能係油王時代留低最後一批需要清理嘅舊帳。

我哋無必要因為呢批違規，就抹走當年球員喺球場上贏返嚟嘅一切，因為判詞亦無證明秘密付款改變過任何賽果或者獎盃。

但同樣地，亦唔應該將件事講成普通文書錯漏，或者又係FA專登針對車路士。舊管理層確實長期使用過唔見得光嘅交易方式，今日只係由完全無參與其中嘅新班主同球會代為埋單。

£10m，無扣分，轉會禁令暫緩。

肉赤就一定有少少，但能夠用呢個價錢清走油王留低最後一批蘇州屎，車路士今次已經算係執番身彩。

THE FA 原文
舊文1：【車迷觀點】FA向車仔發74項指控　舊業主嘅黑歷史要而家還
舊文2：【車聞短打】多謝油王爸爸嘅黑手交易 車仔被罰10m加禁止買人一年

========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up

本文亦同步刊登於我的主場：

車迷狗up天地

一個專為厭倦罐頭足球新聞嘅球迷而設，提供最貼地、最有觀點嘅廣東話深度分析。

如果想第一時間收到新文通知，或者支持我繼續寫車路士長文，可以到 cfc9up.com 免費訂閱。