【車迷觀點】林伯青春風暴係奇蹟定執雞 車仔19/20個第四有幾多係佢功勞
我知咸魚青菜各有所愛。一定有人到今日仍然掛住林伯當年帶住一班青訓仔踢出嚟嘅青春風暴。
無夏薩特、無得買人，曼治、艾巴咸、杜姆尼、占士一個個由青訓殺上嚟；由開季俾曼聯炒四蛋，到最後守住第四、殺入足總盃決賽。論熱血、論故事性，19/20球季可能真係近年最有「車路士味」嘅一季。
尤其經歷完後來嗰堆大手買人、體育總監抽幼幼Pool同500人大軍，回望當年幾個親生仔一齊衝出嚟，難免會覺得：嗰陣嘅車仔體系幾好。
但問題嚟喇。
當年嘅林伯，係咪真係憑一己之力將一副爛牌帶上前四？個第四係咪全部都要歸功於佢？再問得過分少少，如果林伯當年真係咁有料，點解第二季大手增兵之後搞唔掂，去到愛華頓同第二次上車更加教到一鑊泡？
66分第四，係奇蹟定執雞？
戴多次頭盔，我無打算要反任何人，只係想搵個自己覺得ok嘅結論出嚟。
先由最唔浪漫嘅數字講起。
車路士19/20球季以66分排英超第四。前一季熱刺