【戰術覆盤】FA Cup決賽車路士 0：1 曼城 站著死嘅120分準備與0分應變
球證長笛一響，0：1，車路士正式同今屆足總盃擦身而過，亦宣告今個風雨飄搖、充滿鬧劇嘅球季以四大雞胸兼徹底無緣來季歐洲賽作結。連續第七次喺國內盃賽決賽飲恨，繼續刷新呢個無人想破嘅尷尬紀錄，對車迷應該幾難吞落肚。
面對住近來狀態咁好嘅曼城，輸波一定唔開心。但對比季尾嗰段創紀錄六連敗嘅絕望感，今場決賽車路士絕對稱得上係「站著死」。就好似三刀流某劍士所講：「背後的傷痕，是劍士的恥辱。」今場車路士算係盡咗責任，同對手鍊足 70 幾分鐘，無留低背後嘅傷俾大家睇。
但成王敗寇，足球世界就係咁現實。看守領隊麥法蘭今場嘅賽前準備絕對係做足咗 120 分，成功將實力超班嘅曼城拖入泥漿摔角。但去到決勝時刻，雙方喺陣容深度上嘅硬實力差距，以及領隊臨場應變「0 分與 100 分」嘅殘酷對比，最終令車路士喺決賽功虧一簣。
比賽簡述：
講真，如果你唔係車迷或者曼城迷，呢場波你應該會覺得佢悶到爆。唔好話球迷，連 BBC 嘅首席記者都忍唔住喺賽後報導用令人沮喪嘅悶戰（dismal non-event）嚟形容呢場決賽。全場雙方加埋得十幾次起腳，甚至去到 90 分鐘時只得 14 次，創下自 2005 年以嚟足總盃決賽嘅新低，完全係一場高消耗嘅泥漿摔角。
比賽之所以踢得咁悶，除咗因為車路士成功嘅泊大巴破壞對手部署，亦要歸功於球證 Darren England 嘅寬鬆尺度。佢今場明顯拉高咗吹罰嘅門檻，容許大量嘅肢體碰撞同肌肉對抗，祖奧柏度同哈圖喺禁區內幾次 50/50 嘅跌倒全部被擰頭無比。呢種尺度令到場波充滿血肉橫飛嘅對抗，而唔係行雲流水嘅組織。
直到 72 分鐘，呢個僵局先至被一腳唔講道理嘅靚射門打破。
曼城喺右路做文章，夏蘭特走去盲眼位接應，一吓大力橫傳入禁區。接應嘅 Semenyo 喺極狹窄嘅空間入面、背向龍門兼有守衛力壓之下，竟然交出一個後腳入楔。呢腳波嘅預期入球（xG）只有極微乎其微嘅 0.09，對面走位靚、配合靚、射得更靚，喺一個充滿消磨嘅戰局入面，曼城就係靠呢種天才級嘅個人閃光帶走咗個冠軍。
戰術深潛
120 分嘅混合防守開局，與 0 分散沙變陣
賽前睇到正選名單，麥法蘭排出一個 3-4-2-1 嘅陣式。唔算驚喜，但有諗頭嘅。