【戰術覆盤】車路士 1：3 諾定咸森林 六連敗與不設防嘅紙紮防線
如果幾日前足總盃殺入決賽係一場短暫嘅美夢，咁今場重返英超賽場，就係一盆兜頭淋落嚟嘅冰水，將所有車迷扯番落最殘酷嘅現實。
1：3 主場不敵諾定咸森林，車路士正式錄得英超六連敗，創下自 1993 年以嚟球會最長嘅聯賽連敗紀錄。但呢個都未算最侮辱…望下對手，佢哋為咗留力打歐霸盃四強，今場正選足足輪換咗 8 個人。面對一隊排 16 嘅半力陣容，車路士竟然由頭到尾都被撳喺地下一直摩擦。
隨住今場全失三分，球隊落後前四足足 10 分，季前定落嚟重返歐聯嘅目標正式宣告死亡，恭喜晒Blue Co，亦希望高層可以考慮下捉晒班體育總監傾下計。而呢場，就例行公事咁寫下啦。
比賽簡述：
呢 90 分鐘嘅戰局，可以用由頭柒到落尾嚟形容，過程仲要極度慘烈。
開波僅僅 97 秒，防線已經集體夢遊，被阿旺尼輕鬆頂入。去到 13 分鐘，防線再次崩壞，古斯圖禁區內扯衫輸 12 碼，VAR 睇完無俾紅牌已經算好彩，Igor Jesus 操刀射入，15 分鐘內車路士已經連輸兩粒。
去到半場補時，本來係追近比數嘅黃金機會。18 歲小將 Derry 禁區內搏到 12 碼，但代價係同對手恐怖相撞，重創被擔架抬離場直接送院，好彩嘅係賽後證實清醒無大礙；點知狀態跌落谷底嘅彭馬親自操刀，但宴客被 Sels 撲出，白白浪費咗Derry嘅犧牲。
換邊後短短 7 分鐘，森林後備入替嘅 Gibbs-White 輕鬆打穿防線，助攻 阿旺尼 梅開二度拉開到 0：3。隨後連門將山齊士都同對手頭槌相撞爆缸退下火線。
比賽仲有15分鐘但已經有大批車迷心灰意冷提早離場，直到補時 93 分鐘，全場唯一仲有鬥志嘅祖奧柏度轟入技驚四座嘅倒掛金鉤，射入個人今季第 20 球，總算終結咗球隊長達 634 分鐘嘅英超入球荒，為呢場恥辱性嘅敗仗寫下一個淒涼嘅句號。
戰術深潛
被屈的 £250M 中場，與真正嘅進攻黑洞
賽後唔少英國傳媒將矛頭直指由卡斯度、安素同拉維亞組成嘅 £250M 豪華中場，話佢哋被對手嘅工兵 Yates 同 Dominguez 徹底食住。但睇真啲數據，冤枉呀大人……！
中場三子其實