【戰術覆盤】車路士 2：1 熱刺 以無為勝有為嘅倫敦打吡
先恭喜阿仙奴。嗯，我都唔明點解車路士對熱刺嘅戰術覆盤我要恭喜第三隊波先，但因為曼城失分，阿仙奴確定咗成為今季嘅英超冠軍。
恭喜完，講返場波，呢場倫敦打吡對車路士嚟講，算係喺經歷完足總盃決賽嘅心碎之後，搵到一個勉強可以宣洩嘅出口。雖然因為曼城和波，令我哋正式宣告無緣下季歐聯，但可以喺史丹福橋將熱刺推向煞科日護級呢個漩渦，果種攬炒嘅快感呢………嗯~~~舒服。
更重要嘅係，沙比阿朗素即將喺 7 月接掌帥印。今場驚險保住嘅 3 分，正好為呢個百廢待興嘅新時代打咗支強心針。
比賽簡述：
開波初段，只需一分就護級成功嘅熱刺明顯表現得更為主動，早段已經有 Tel 接應右路傳中頭槌中柱，令車迷心跳加速。18 分鐘安素喺一腳技驚四座、帶有強烈下墜同轉向嘅遠射世界波，直接收死對方門將。隨後安素甚至有一腳罰球中楣，差啲半場就將熱刺打落十八層地獄。
換邊後戰況一度膠著，直到 67 分鐘，彭馬策動攻勢，安素助攻山度士近門撞入成 2：0。正當大家以為大局已定，熱刺好快就憑一次幸運嘅後腳傳送，由李察利臣追番一球，重新為熱刺帶來希望，令最後 15 分鐘變成攻防大戰。
既然係倫敦打吡，場面混亂之餘，火藥味亦越來越濃。特別係倒戈嘅加拉加，佢同古古尼亞、卡些度之間不斷發生肉搏同口角，令球賽末段火花四濺。去到完場前，古古尼亞拉跌雲迪雲引發極大爭議，但球證以球例為由裁定無犯規，令車仔驚險逃過 12 碼一劫。車路士最後以 2：1 成功保住 3 分。恭喜恭喜。
戰術深潛
4-2-3-1 嘅 Overload，雙防中體系能力解放
麥法蘭今場明顯因應球員體能同對手踢法做咗調整，放棄咗足總盃決賽嘅三中堅陣式，改排番 4-2-3-1。面對熱刺一開波嘅前場逼搶，車路士今次無再盲目踢快或者大腳放上前場，而係針對性咁安排