【車迷觀點】二安 4 級肌肉撕裂全解 當18歲的夢想撞上醫學現實
對曼聯嗰場，車仔嘅二安 (Estevao) 其實無踢咗幾耐，跑跑吓，射完一腳，突然之間就停咗喺度。
冇被對手兇狠飛鏟，冇任何誇張嘅肢體碰撞。唔識波嘅人，可能以為只係跑到尾段普通抽筋；但如果你對運動醫學有少少認識，見到佢毫無徵兆下突然停步，痛苦地㩒住大腿後側，可能你已經估到少少。(我估唔到。)
賽後，車仔最初話佢嘅檢查結果係正面嘅，羅生自己話佢要休息10~15日，但羅生落台之後，真正嘅結果出爐，4級拉傷。呢兩日外媒同各大球迷群組傳咗幾日，但幾乎冇人出嚟解釋過，呢四隻字背後到底代表住咩。
呢篇文當係科普文，或者只係一個二安嘅Fans嘅文，俾我解釋下發生咩事同跟住會點展開…
4級拉傷其實係乜鬼
平時睇波，我哋成日聽到球員Hamstring injury。相信呢個字對於車迷嚟講唔會陌生，佢每一季都會陪住占士/拉維亞，幾乎無離開過車仔。而一般嚟講，醫學上嘅拉傷分為幾個級別：