【戰術覆盤】FA Cup 車路士 1：0 列斯聯 換領隊+捱打半場入決賽
正如我喺Facebook所講，我估大家好難想像，眼前呢隊傳波行雲流水、有猜波有走位嘅車路士，同幾日前經歷「百年恥辱、聯賽五連敗兼零入球」嗰隊，竟然係同一班人。
賽後網上當然好多車迷熱烈討論，「成班友仔根本為咗趕走羅生Hea踢。」「你睇佢哋今日幾精神幾熱血。」我明白，講呢種造反論或者內鬼論好吸引，一兩句就可以解釋晒所有嘢，大家聽落又覺得順理成章。
但用陰謀論去抹殺球員喺場上流過嘅汗水與跑動，話一班頂級職業球員，會為咗逼走個領隊而特登踢到一Pat屎咁，甚至連基本傳接球都連環失誤，呢個講法其實好侮辱球員嘅專業同智商…當然，我唔會一口咬定世上無呢種事，但與其話係球員造反，不如回歸戰術層面：看守領隊嘅戰術調整，令球員們可以踢得更乾脆俐落。
當戰術枷鎖解除，無咗過去幾場「明明有快速反擊，都要強行拖慢回後」嘅死板規定，球員自然會搵番踢波嘅節奏同自信。
比賽簡述：
呢 90 分鐘嘅戰局，五個字講得完：冰火兩重天。
上半場嘅車路士完全係壓倒性姿態，踢出咗久違嘅統治力同侵略性。戰至 23 分鐘，球隊終於打破各項賽事對英超球隊長達 498 分鐘嘅入球荒：祖奧柏度前場果斷逼甩對手球權，尼圖落底傳中，造就後上嘅安素頭槌破網。隨後祖奧柏度仲有一次起腳中柱，上半場嘅車仔可以話係撳住列斯聯嚟砌，將對手壓死喺半場。
但換邊之後，戰局風雲突變。列斯聯半場果斷變陣，推高節奏同壓迫線，車路士瞬間失去中場控制權。看守領隊麥法蘭展現出臨場應變嘅極限，令到球隊下半場只能夠全面退守，陷入單方面捱打嘅局面。
好在，神經刀山齊士今場大爆發化身守護神，屢救單刀同遠射；加上整條防線築起血肉長城，最終車路士成功力保 1：0 勝局，驚險守住溫布萊嘅決賽門票。贏得肉酸，但能夠捱過近期最黑暗嘅低潮殺入決賽火併曼城，保守歐戰嘅最後一絲希望。
戰術深潛
告別便秘推進，祖奧柏度嘅支點價值
麥法蘭接手之後做嘅第一件事，唔係咩驚天動地嘅戰術大改造，而係將羅生嗰套嘅 3 中堅陣式排番球員最熟悉、默契最好嘅 4-2-3-1。
陣式只係表面，真正令球隊「曉飛」嘅，係