【球壇風向室】應鬧嘅唔係阿仙奴而係球證 養出黑魔法嘅制度先有罪
所謂嘅黑魔法，我諗對今季嘅英超球迷唔會陌生，泛指利用球例灰色地帶去策動嘅死球戰術。
今季有球隊靠呢種方法，喺角球區度瘋狂擦數據，取得大量嘅死球入球。Well，老老實實，場面真係唔好睇。唔好睇，但極之有用。
因為呢套戰術唔單止幫佢哋長時間霸佔榜首，仲極度接近幫阿迪達拿下今屆英超冠軍。
能夠將死球變成大殺傷力武器，阿仙奴嘅死球教練 Nicolas Jover 當然功不可沒。但喺佢哋邁向冠軍嘅路上，其實仲有一班人喺背後為阿仙奴「默默付出」。
無錯，就係嗰班場場判決準則都唔同嘅盲人協會……打錯，係英超球證們。
阿仙奴作客韋斯咸，去到補時 95 分鐘，韋斯咸喺角球混戰中入波。結果？VAR 突然如夢初醒，用顯微鏡睇足幾分鐘，最後以韋斯咸球員阻擋拉也為理由，將個絕平入球吹走。阿仙奴有驚無險贏 1-0，三分袋穩。
我之前喺上篇 Dark Art 嘅文度，詳細拆解過阿仙奴究竟做緊咩。但經過尋晚嗰場波，今篇文我哋要問一個更深層次嘅問題：點解佢哋做得到？
車仔今季試過，結果？即刻食牌。
尋晚韋斯咸想用，結果？入波吹走。
同一招，A 隊用就無事，C 隊同 W 隊用就吹犯規。呢個已經唔係戰術嘅問題，而係執法災難。
專利黑魔法：你做就係戰術，我做就係犯規
我之前喺舊文度拆解過，阿仙奴套 Dark Art 之所以一直合法，係因為佢哋將球例玩到極致。球例寫明「處於對手移動路線上」係合法嘅。所以阿仙奴班球員好聰明，永遠都係早一步行過去、背對龍門、隻手唔郁，做一個籃球式嘅靜態單擋，等你個龍門自己撞埋嚟。法理上，佢哋無犯規，呢個係 Jover 嘅功力，我直頭想俾個讚佢。
但韋斯咸被吹走嗰球絕平，事後球評同傳媒點樣解畫？佢哋話慢鏡顯示，韋斯咸球員 Pablo Felipe 喺爭位嗰陣，手臂橫跨咗拉也胸前，屬於動態拉扯兼影響門將起跳。
老老實實，如果純粹講球例，我絕對同意韋斯咸呢球係犯規，阿仙奴尋晚贏 1-0 係無問題嘅。
但真正令全英超球迷睇到火滾嘅問題喺邊？