【季後分析】25/26亂世螢火蟲祖奧柏度 20個入球照亮車路十最後尊嚴
如果要用一個畫面形容25/26球季嘅車路士，我會揀停電。
由季初高維爾ACL倒下，到馬蛇離隊、羅生上任再落鑊，戰術線路燒完一條又一條。彭馬長期養傷，戴納入球失蹤，防線就輪流派膠同領紅。成隊波由爭冠幻想一路跌到第10，史丹福橋唔止熄燈，直頭連後備發電機都壞埋。
就喺大家逐漸習慣黑暗嗰陣，祖奧柏度就變成果一點點光。
佢無施展咩主角級必殺技，亦無能力一個人將車路士由谷底抬返上歐洲賽。只係每當成隊波就快完全熄滅，佢總會喺某個角落閃一下。可能係一個近門執雞、一記頭槌、一腳遠射，間中甚至係倒掛，提醒大家呢支球隊仲未完全斷氣。
螢火蟲當然照唔光整個黑夜。
但喺一個連月光都無嘅球季，嗰點微弱嘅光已經足以令人追住望。更加值得問嘅係，當天光之後再望清楚，祖奧柏度究竟只係因為身邊所有人都熄咗，先顯得特別光？定係我哋喺黑暗入面，真係見證咗一個全新版本嘅佢？
當初買輔鋒，最後收到20球前鋒
望返祖奧柏度加盟時嗰篇球探報告，我當時用咗一個幾曖昧嘅形容：前鋒身，中場魂。
佢踢過正前鋒、假九、攻中甚至左翼，鍾意墮後接波、盤扭同為隊友製造機會。入球能力唔差，但白禮頓時期唔少產量都來自十二碼。剝走十二碼之後，佢更加似一個識入波嘅攻擊中場，而唔係可以長期承包火力嘅中鋒。
所以當車路士用超過£50m簽入佢，我理解中買返嚟嘅係一個前場問題解決者，而唔係保證每季20球嘅射手。
結果，車路士收到嘅版本同說明書有少少唔同。
祖奧柏度25/26球季各項賽事上陣50場、42次正選，交出20入球6助攻。單計英超已經有15球，更加估佢唔到嘅係，20球全部都唔係十二碼。
成件事好似你買咗部瑞士刀返嚟，原本貪佢有較剪、開罐器同螺絲批，拆盒開出嚟先發現入面仲收埋把倚天劍。
而且呢20球唔係