(會員限定)【季後分析】25/26巴迪亞舒尼完了吧如無意外 £35m左腳刮刮卡正式失敗
「完了吧，如無意外。」講真，無帶個腦返工就人之常情，但大時大戰、仲係無帶個腦落場，有少少難令人信服。
巴迪亞舒尼喺 25/26 球季嘅表現，嗯，就真係衰運滯之餘自己又差。回望今季車路士防線經歷重組同動盪，原本仲對呢位身高 1.94 米嘅左腳中堅抱有一絲期望，盼望佢可以踢得起。但最終換嚟嘅，卻係肌肉傷患，以及屢次喺關鍵時刻斷片、將個波直接交俾對手嘅災難級演出。
究竟一個曾經被寄予厚望嘅天才出球中堅，點解會淪落到今時今日嘅地步？我哋即刻為大家揭開呢個悲劇嘅序幕。
期待值回顧：失去防護罩後嘅真實考驗
將時間線拉返去一年前，當時我對巴迪亞舒尼嘅定性非常明確：佢係一個優缺點極端分化嘅體系球員。
喺當時馬蛇極致嘅控傳體系保護下，巴迪亞舒尼轉身慢、地面防守弱嘅死穴被戰術完美隱藏。作為回報，佢交出咗猶如派牌機一樣嘅傳球視野，甚至喺高空爭頂成功率上，交出過高達 78.6% 呢個令人眼前一亮嘅數據，一度被認定為盃賽專家。
但當時亦都一早敲響咗警號，我自己覺得呢種極度依賴體系保護嘅踢法，其實隱藏住巨大危機。當球隊經歷瘋狂換帥、戰術更迭，並且越嚟越強調高位防線同快速攻守轉換時，嗰個用嚟保護佢嘅控傳防護罩粉碎。
而失去庇護後嘅巴迪亞舒尼，究竟可唔可以憑藉自身能力，真正適應英超拳拳到肉嘅高強度對抗？定還是會喺失去體系保護後徹底現形？
結果，25/26 球季嘅殘酷現實話俾我哋聽，佢唔單止現咗形，仲直接將自己推向咗萬劫不復嘅深淵。
今季實際交貨：徹底邊緣化與玻璃人嘅無盡詛咒
原本以為高維爾季初嘅重傷，會係巴迪亞舒尼上位、證明自己可以獨當一面嘅絕佳機會。但佢反而係用呢個機會，將自己推咗入職業低谷。
全季落嚟，佢喺英超僅僅上陣咗 471 分鐘，得 6 次正選，當中只係得 3 次可以