【季後分析】25/26青梅竹馬嘅細查 值得留低但樓契唔應該寫佢名
細查同車路士嘅關係，幾乎係BlueCo年代最離奇嘅愛情故事。
球會嫌佢唔夠靚仔、唔夠高潛力，索性踢佢出集訓營，再送去水晶宮眼不見為淨。點知自己屋企一出事，第一個打電話求救嘅又係佢。
而細查真係不計前嫌，帶齊工具返嚟幫手。由臨時消防員一路做到世界冠軍，仲將一堆貴價中堅逐個壓落後備席磨櫈。上季寫佢季後分析嗰陣，我甚至覺得球會如果再賣走佢，已經唔係無情，係無腦。
25/26球季，呢段孽緣終於迎來最公平嘅驗收。正選時間、領隊信任同大賽舞台全部俾足，再無藉口話球會睇低佢。
細查唔係令你心跳加速、值得不惜一切留低嘅夢中情人，而係屋企爆水喉嗰陣，第一個帶齊工具上門幫手嘅青梅竹馬。至於佢識唔識整，就係另一回事。
當感動同浪漫逐漸退去，車路士今季終於可以認真面對一個問題：細查究竟係一直被球會低估嘅防線核心，定係大家因為佢太有情有義，一直唔忍心承認佢嘅上限？
期待值回顧：救完火之後，可唔可以接管成間屋
望返24/25球季，細查完成咗一場近乎完美嘅逆襲。
季初被踢出集訓營，外借水晶宮後反而踢出身價；一月防線傷到無人可用，球會厚住面皮召佢返嚟，佢落機無耐就直接正選，迅速穩住成條防線。
細查最大嘅價值，係可以因應拍檔改變踢法。高維爾負責出球，佢就主動上搶；隊友踢得冒失，佢就留後執屎。左右中堅、防中甚至右閘都頂得，係一塊可以攝入任何缺口嘅戰術萬用膠。
但救火成功只係半季樣本。細查嘅制空只屬一般，傳球夠勇敢但未算銳利，面對歐洲頂級鋒線嘅速度同個人能力時，佢嘅身體上限仍未經真正驗證。
所以25/26對佢嚟講，唔再係證明自己比一堆貴價後備好。當球會將全屋鎖匙交到佢手上，真正要驗收嘅係：佢可唔可以由救火隊員，升級成防線核心。
今季實際交貨：由純利資產變成防線長工
細查今季