【季後分析】25/26車路士球員點評 防線萬能膠布古古尼亞
(寫在最前，呢篇文喺5月尾寫嘅，當時未知古古會離隊，因為要修改嘅地方太多，我懶得改，所以可以當成25/26季後分析咁睇)
25/26球季嘅車仔，要搵形容詞我已經喺唔同嘅季後分析中搵過……但防線爛到一個點，我估無乜人事前就估到。由馬蛇元旦劈炮、麥法蘭過渡、羅生急急腳接手、再換返麥法蘭，成套戰術體系一日一小改、三日一大改。
而喺呢個傷兵滿營、人腳立立亂嘅後防入面，邊個係最穩固嘅支柱？答案可能令唔少人意外，就係曾經被笑係天價水貨、依家頂住一頭標誌性爆炸頭嘅古古尼亞。
全季各項賽事狂踢 4,302 分鐘，高居防線球員首位，邊度穿窿就去補邊度。古古，今季變成車路士防線上嘅萬能膠布。趁住佢依家去咗踢世界盃，傳媒又喺度斷章取義炒作佢回歸巴塞隆拿嘅流量新聞，今日我哋就用數據同戰術，好好講下佢今季嘅功與過。
期待值回顧：由「內切大師」到防線萬能匙嘅厚望
先回顧返我上季寫古古尼亞嗰篇文，當時佢喺馬蛇手下直情搵到人生第二春。利用佢Inverted FB嘅屬性，喺進攻時移入中場做Overload，幫車仔打出咗極流暢嘅後場組織，仲順便喺國家隊贏埋歐國盃冠軍。
經歷完一整季嘅戰術開光，所有車迷喺季前都