【季後分析】25/26車路士球員點評 安素今季勁定廢去定留
要形容 25/26 球季嘅車路士，我會話係……一套換咗四次導演嘅爛片，爛爆，要我俾錢入場睇？咪諗。
而喺呢個戰術朝令夕改、傷兵滿營嘅廢墟入面，如果要揀一個最具爭議性、最身心俱疲嘅核心人物，其中一個非安素莫屬。
好多人一見到隊波最後跌落英超第十，或者執著於佢想住係瓦努阿圖咁講出憧憬馬德里嘅公關災難，就先入為主、跟風標籤佢做垃圾 / 二五。嗯，或者係，但主觀印象同實際嘅落差我哋唔係無見過，要形容佢今季嘅表現，我會咁樣講：一個被破爛體系逼到無限超載嘅億鎊大腦，喺一片罵聲與混亂中，交出生涯最高產嘅悲情鐵人。
或者睇到呢個位已經有唔少人準備去我Facebook留言問我係咪今季無睇波，但請各位客倌聽我娓娓道來……
呢篇係我打嘅球員個別評價嘅第一篇，而家草稿區已經寫咗15篇，大家可以等我洗板。
期待值回顧：由「影子英雄」到中場大腦嘅厚望
如果大家睇返我 24/25 球季寫安素嗰篇季後文，當時我嘅主調係「逆襲」。馬蛇喺上季尾終於幫安素搵到「Box-to-Box」嘅專屬說明書，佢由季初被冷待，到季尾八面玲瓏，用不知疲倦嘅跑動同致命傳送做咗車仔中場嘅影子英雄。
當時所有車迷都一致認定，經歷完一整季嘅適應同進化，呢位世界盃冠軍級人馬喺 25/26 球季理所當然會完全接管球隊，成為車路士無可替代嘅絕對核心同節奏大師。
今季實際交貨：兩極化嘅極端數據與悲情鐵人
不幸嘅係，今季車路士經歷四次領隊更換折騰，拉維亞同彭馬輪流瞓醫院，成套戰術體系立立亂。喺呢個環境下，