【季後分析・第零篇】一季496個Post 326萬人瀏覽 我仲陪住呢舊藍色嘢嘅原因
今季最後一場波，又係失分。完場雞一吹，大家可能已經鬧完最後兩句粗口，熄咗部電視，掟低個遙控，帶住一肚氣去瞓覺。但我個身體就好似有肌肉記憶咁，默默地打開咗部電腦，望住個空白嘅 Word 檔，又準備繼續寫。
有時我都停低問下自己：經歷咗一個咁折磨嘅球季，對住一隊爛到咁嘅球隊，半夜三更唔去休息，仲咁上心喺度打千字文，我自己都唔知係咪正常。
呢篇文，並唔係咩戰術分析，單純，係作為版主嘅我嘅小小抒發，亦係一個球季完結，季後分析嘅第零篇。
今季，我做咗啲咩
打開個Facebook Page 嘅後台，睇住堆總結數字，我都忍唔住苦笑咗一下。
由開季到而家完季，呢 250 幾日入面，我總共出咗 496+ 個 Facebook Post。當中有 336+ 篇係長文，觀看人數去到 326 萬人次，觀看次數 580 萬，累積咗接近 3.8 萬次嘅心情、留言同分享。
呢個數字，唔係我一個人嘅成就，係各位車迷做嘅，而我只係負責打字果條友。
如果平均計一篇文大約係 2000 到 2500 字，保守估計，今季我喺個 Keyboard 度揼咗超過 60 萬字出嚟。呢個係咩概念？姐係話，我今季喺電腦前度橋、寫文嘅時間，幾乎已經超過咗球隊真真正正喺場上踢波嘅時間。 諗落都真係覺得有啲癲。
但係，最瘋狂、亦都係最大諷刺嘅，並唔係呢堆爆肝嘅產量，而係今季嘅流量密碼。
我寫咗幾百篇文，鬧過高層、覆盤過戰術、插過馬蛇。但去到季尾結算，成個專頁最多人睇、討論得最激烈嘅三甲文章，竟然係呢三篇：
- 拆解阿仙奴「死球 FC」套 Dark Art 點樣喺規則邊界遊走。
- 拆解夏維斯入波後指會章慶祝，果種無緣無故嘅恨意同心理迷思。
- 作客酋長球場 1-2 輸波，角球 FC 對 紅牌 FC，尼圖無腦拎紅牌嘅自爆敗局。
三篇文有咩共通點？唔講啦，心照啦。（多謝晒阿仙奴球迷。）嗯，我睇嚟仲要再努力下。
藍色嘅忒修斯之船
搞笑完，認真返。今季車仔有幾攞命，我唔使多講。車迷有幾心灰意冷，我完全明白。
直到早排，有位巴打 Jacky 喺留言區留低咗一句說話，睇完我的確停低諗咗好耐：「BlueCo 接管左 4 個 Season，我已經 no longer recognize my club。」
老老實實，我唔識反駁，因為佢講嘅，一啲都無錯。你合埋眼諗下，同十年前比：球員換晒、領隊如走馬燈、老闆換埋，連由細睇到大果種鐵血踢法，都幾乎冇晒。以前果種寧死不屈嘅車路士 DNA，而家喺場上真係搵唔到幾多滴。
唔知大家有無聽過哲學入面果個「忒修斯之船」：當一隻船嘅木板一塊一塊被換走，直到所有零件都已經唔再係原本果啲，呢隻船，仲係咪原本果隻船？
當一隊波十年未夠就已經大換血換到面目全非，呢隻藍色嘅「忒修斯之船」，到底仲有幾多塊板係當年果塊？其實留落嚟嘅，到底係咩？我哋每逢週末半夜三更起身，對住個電視機忟憎大叫嘅，究竟係撐緊啲乜嘢？
呢個問題，我諗好多車迷今季都問過自己無數次。直到我睇返後台另一組數據，我先搵到個答案。
但最多人LIKE嘅係...
頭先講完最多人睇同留言嘅文章，係靠對家球迷推爆演算法。但當我再去睇返，今季成個 Page 最多人俾 LIKE、派心心嘅三篇文章，結果完全係另一個世界。
排第一嘅，係一月轉會窗果陣，我宣佈太太有喜、用「Here We Go」簽入「Unnamed Wonderkid」嘅終身合約公告。
排第二嘅，係對森林果場波，大家放低勝負同怨氣，齊齊為撞傷頭失去意識嘅 Derry 祈禱集氣。
排第三嘅，係沙比上任，BlueCo歷年第一個Manager，車路士睇嚟迎來一個全新嘅開始。
呢三篇文，無一篇係講緊馬蛇嘅戰術有幾精妙，無一篇係講緊 BlueCo 嘅失敗，甚至無一篇係真正講緊贏波。但偏偏，呢三篇文得到咗最多香港車迷嘅真正共鳴同支持。
呢個結果，正正解答咗上一節「忒修斯之船」嘅問題：當一隊波 10 年換晒人，留落嚟嘅到底係咩？
最多人俾反應嘅，從來都唔係冰冷嘅戰術分析，而係人情味。呢隻船嘅零件的確換晒，球員同老細的確面目全非，但船上果份人情味，從來都冇換過。
我哋會為素未謀面嘅新生命誕生而送上祝福；會著眼於未來而唔係聚焦於失敗；會將球員嘅生命健康放喺三分之上。
證明，人間有愛，車迷，都特別可愛。
回想當年
人情味，對我嚟講其實只係答案嘅一半。而答案嘅另一半，其實收埋喺我哋每個車迷嘅心底入面：點解當初，我哋會毫不猶豫咁行上呢隻藍色嘅船？
有時半夜三更打打下字，我個腦海會閃過好幾個以前嘅畫面。
我會諗起果幾年，每逢週末半夜，我都會靜靜地一個人坐喺電腦前面睇波，對住個起格嘅螢幕又笑又忟。我會諗起莫斯科雨夜，記得自己身處北京電視機前。果幾年，剛好亦係我自己人生過得比較艱難、迷惘嘅日子。隊波果種跌低再爬起身嘅不屈，同埋無數嘅遺憾，就咁默默陪住我捱過咗果段人生低谷。由果一刻開始，我已經知道，呢隻船，我係落唔到嘅。
所以，當 Jacky 留言話覺得對愛隊好陌生嘅時候，我回覆咗佢一句：「呢啲係個人選擇嚟，對我嚟講，呢個章就算落到英乙，意義都不變。」
無嘢係唔會變嘅。老闆會換、球星會老、戰術會過時，甚至乎連主場都可能會搬。但果份喺你最青春、或者最難捱嘅時候，同球會一齊經歷過高山低谷嘅情感羈絆，一早已經生咗根、入埋血。
作為死忠，我個心態其實好老土，但亦都好簡單：贏，我陪你君臨天下；輸，我陪你東山再起。
結語
去到最後，我想喺呢篇第零篇嘅季後分析度，再一次多謝咁多位車迷、巴打絲打今個球季嘅陪伴同支持。
496 個 Post，3.8 萬次互動……如果單靠我一個人對住部電腦自言自語，面對住隊波咁樣嘅戰績，我大概一早已經頂唔順崩潰咗。係你哋每一個 LIKE、每一次圍爐爆粗、每一個深情嘅留言，撐住咗呢個 Page，亦令我知道：「原來一直以嚟，都唔係得我一個咁諗。」
網絡世界好大，公海有好多唔同嘅風向同 Content Farm。我深知自己未必可以成為公海入面最主流嘅聲音，但我可以承諾嘅係，我會繼續堅持喺呢個小天地，盡力講出我所想，寫出屬於我哋真正嘅感受同底線。
嚟緊下季，因為屋企果位「Unnamed Wonderkid」嘅降臨，我嘅新手爸爸生活同埋寫文節奏，或者無可避免會有少少變化（可能半夜睇波要較靜音，出文嘅速度會慢咗）。但唯一可以肯定嘅係，愛車路士嘅心，絕對唔會變。
我甚至已經幻想緊，將來可以攬住佢，一齊著住件藍色波衫睇波，講佢知當年杜奧巴點樣屈阿仙奴機、夏薩特令邊個球員轉圈圈，希望佢將來，都會係一個驕傲嘅藍軍。
球季終於完結，各位巴打絲打，辛苦晒，大家好好休息。
季後分析文，等我一篇一篇慢慢出貨俾大家。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。