【季後分析】25/26追足三年嘅女神科芬拿 除低濾鏡先發現同想像有出入
如果覺得我講咗你嘅故事出嚟，先講聲抱歉。
想像一下你由中學開始追一個女神，追咗好多年，買過iPhone、送過花、送過手袋，俾身邊朋友笑你傻仔都照追不誤。你最期待嘅畫面，當然係有一日佢終於應承同你一齊。
科芬拿對車路士嚟講，大概就係呢位女神。
£70m身價、頂級速度、超強爆發力，仲有一個「只要保持健康，就會成為世界級中堅」嘅美好傳說。過去幾年無論佢傷幾耐、踢得幾少，我哋都願意等，因為大家一直相信，問題只係無機會見到完整版。
25/26球季，女神終於應承拍拖。
但真正相處多咗之後，你開始發現，眼前呢個人同自己幻想多年嗰個版本，好似有少少出入。
事到如今，送出去嘅iPhone同手袋無可能要求回水。你只可以問自己：係咪應該俾多少少時間，繼續發掘佢其他優點？定係追咗太多年，大家只係唔願意承認，自己當初愛上嘅可能係一個想像？
科芬拿今季最大嘅進步，或者唔係終於證明自己有幾勁，而係第一次俾車迷足夠時間，真正認識佢。
期待值回顧：以前以為，佢只係差一副健康身體
望返24/25球季嗰篇季後分析，我對科芬拿嘅結論相當簡單：天賦無需要再證明，最大問題只係可用性。
健康嗰陣，佢係馬蛇高位防線最理想嘅執行者。速度快、敢於前壓，亦有能力由後場帶波突破第一重逼搶。高維爾負責出球同包位，科芬拿就主動離開防線搶波，理論上係一對可以合作十年嘅中堅組合。
但科芬拿加盟車路士後，大部分時間都喺文員部打字。ACL、膝傷、Hamstring，一次又一次將球季切碎。24/25英超只踢14場、1,172分鐘，季尾更加需要接受Hamstring手術。
所以當時所有討論都離不開同一句說話：「人無事先可以做世界冠軍。」
不過，上季數據已經留低另一個警號。科芬拿雖然保留住直線回追同持球推進能力，但地面一對一表現明顯下降，主動上搶失敗後，往往需要隊友幫手包位。只係傷患問題太搶鏡，大家自然將其他缺點視為缺乏比賽節奏嘅副作用。
25/26真正要驗收嘅，唔再只係佢可唔可以留喺球場，而係當佢終於有機會連續拍拖，大家幻想多年嗰個世界級版本，究竟會唔會真係出現。
今季實際交貨：由長期文員升級成需要保養嘅正選
科芬拿今季各項賽事上陣38場，31次正選，按