(會員限定)【季後分析】25/26古斯圖完成拆骨改造 進化成功但右閘本份未畢業
如果要我揀一個畫面代表古斯圖，我諗極都係會揀返世冠盃決賽對PSG嗰次。
佢喺右路單騎殺入禁區，自己起腳被擋，個波兜兜轉轉又返到佢腳下，再交俾彭馬射入。嗰一下有速度、有膽量、有少少論盡，但最後真係造就到入球，幾乎濃縮晒古斯圖最原始、亦最吸引人嘅地方。
上季寫佢季後分析，我留低咗一個問題：馬蛇將呢架右路法拉利捉入中場、逼佢停低捉象棋，究竟係削足適履，定係幫佢增加新武器？
一年後，答案終於開始浮面。
25/26球季，古斯圖各項賽事上陣49場，交出3入球5助攻；由占士身後嘅替補右閘，升格成右閘、左閘、內收中場甚至10號位都踢過嘅萬能插。佢終於打破接近100場嘅入球荒，傳球、創造同盤扭數據亦全面進步。當日逼佢學捉嘅象棋，原來真係無白學。
但如果你問我，佢係咪已經進化成一個令人完全放心嘅頂級右閘？Sor，未。
一對一防守仍然容易俾人突破，制空能力依然唔合格；作客森林3球領先都可以多手攞第二張黃牌，季尾再對森林更加直接拉人送十二碼。古斯圖嘅武器庫的確豐富咗，但架車套煞車系統，間中仍然會喺最唔應該失靈嗰陣突然收皮。
進化成功，同右閘本份仍未畢業，兩件事可以同時成立。呢個，就係古斯圖25/26球季最矛盾嘅答案。
期待值回顧：唔係解開枷鎖，而係兩套武器可唔可以共存
望返24/25球季嗰篇季後分析，當時古斯圖嘅處境幾乎係人格分裂。
球迷熟悉嘅一面，係沿住右路全速爆上、靠無球走位同速度撕裂防線嘅疊瓦閘；但馬蛇想要嘅，係一個識得內收中場、喺人堆入面接波、用短傳同位置感維持控球體系嘅偽防中。
古斯圖上季嘅傳球、向前推進同創造力都唔差，證明佢唔係完全無腦嘅跑狗；但當佢真正進入中場窄位，需要自己轉身、護波同擺脫壓迫，盤扭成功率就幾乎跌到同位置最底層。一對一防守同制空，亦一直唔可靠。
直到世冠盃決賽，馬蛇暫時放低內收執念，俾古斯圖返去右路直接衝擊PSG，先出現文章開頭嗰次單騎殺入禁區。嗰場波好容易令人得出一個簡單結論：你睇，早就話唔好玩鳩佢啦，放返架法拉利上高速公路咪得囉。
但25/26真正要驗收嘅，唔係古斯圖識唔識跑，而係佢可唔可以將右路爆發力，同上季學返嚟嘅傳球、閱讀比賽能力結合埋一齊；當球隊失去控球，佢又能唔能夠做返一個右閘最基本應該做嘅嘢？
今季要驗收嘅，係馬蛇搞咗一年嘅改裝工程，究竟完成咗未。
今季實際交貨：由占士替補升格成49場萬能插
古斯圖今季各項賽事上陣49場，當中38次正選，累積3,295分鐘，交出3入球5助攻。單計英超亦有34次上陣、26次正選同2,261分鐘。
對比24/25球季，佢當時英超只有19次正選、1,862分鐘。即係今季唔係單純多踢兩場，而係正選增加7次、上陣時間多接近400分鐘，直接由「占士傷咗先輪到佢」，升格成教練會主動搵位置塞佢落場嘅常規主力。
上半季馬蛇年代，古斯圖