【季後分析】25/26占士繼續限速80 S級能力只交出B級球季
列斯占士係S級球員。呢句我唔打算戴頭盔，其他隊球迷要笑鳩我，我都唔打算改。
當佢健康企喺右閘位置，單靠一個人已經可以提供成條右路嘅安全感。對手想硬撞，佢夠力；想鬥速度，佢追得到；縮後防守，佢又可以用世界級長傳劏開半個球場。再加埋嗰腳直飛死角嘅自由球，睇到球迷嘩嘩聲之餘，亦只會再次感嘆：如果占士真係健健康康，英格蘭根本唔需要煩惱右閘揀邊個。
25/26上半季，我一度以為期待多年嘅「Reece James Season」終於嚟咗。
佢連續踢足90分鐘，右閘、防中甚至中堅都照踢，2入球4助攻之餘，仲用力量、Vision同定位球控制比賽。球會更加用一份去到2032年嘅長約，確認佢仍然係車路士嘅隊長同核心。
點知續約幾日後，Hamstring又響警報。缺席季尾關鍵賽程，趕及復出踢世界盃，同一位置又再次出事。
最殘酷嘅地方係，占士最強嘅踢法，可能正正係副偈最承受唔起嘅踢法。留喺右閘，先可以完全釋放佢嘅S級能力；移入中路，負荷係低咗，但亦好似將最鋒利嘅武器一件件拆走。
占士今季證明咗自己仍然係世界級。問題只係，車路士仲有無辦法真正使用呢份世界級實力。
期待值回顧：等咗多年嘅Reece James Season
望返24/25球季嗰篇季後分析，占士當時已經展現復甦跡象，但兩次Hamstring傷患同一次感冒，仍然令佢缺陣111日、錯過22場比賽。即使復出後協助球隊反勝贏得歐協聯，大家對佢嘅期待仍然只敢加上一句：「如果健康」。
戰術上，馬蛇開始將占士由傳統右閘改造成內收防中。除咗增加中場力量同出球，亦希望減少邊線折返，保護佢條長期出事嘅Hamstring。
去到25/26季中，占士連續幾個月無傷無痛，右閘、中場輪流踢，面對巴塞同阿仙奴等強敵亦交出統治級表現。我甚至喺12月底另外寫咗一篇文，討論佢距離世一右閘仲差幾遠。
當時得出嘅結論係，佢欠缺耐用性、華麗進攻產量，以及一個可以定義生涯嘅完整球季。所以下半季嘅驗收標準好簡單：占士可唔可以將半季S級表現，延續成真正屬於自己嘅Reece James Season。
今季實際交貨：世界級復活，但完整球季仍然爛尾
占士今季各項賽事上陣39場，29次正選，按FBref合計2,667分鐘，交出2入球6助攻。單計英超則有29次上陣、20次正選、1,963分鐘，錄得2入球4助攻。
對比上季英超只踢19場、1,063分鐘，今季上陣時間接近翻倍，證明