(會員限定)【季後分析】25/26佐真遜巴黎74分鐘 一次派膠閂埋自己正選之門
如果你問我佐真遜今季踢過幾多場，我可能要打開資料先答到。但如果你問我最記得邊一幕，我幾乎完全唔需要諗已經有畫面有埋時間。
對巴黎，74分鐘，比分2比2。佐真遜喺後場接波，面對PSG壓迫仍然嘗試短傳，結果一腳送到巴高拿腳下。幾秒之後，域天拿笠入空門；再過十幾分鐘，2比2已經變成5比2。
門將就係一個咁殘酷嘅位置。前鋒可以射失十球，再用一個入球成為英雄；門將可能安穩踢足74分鐘，最後所有人只記得一次錯誤。更加慘嘅係，呢一腳失誤摧毀嘅可能唔止一場比賽。
佐真遜等咗大半季，先真正得到挑戰一號門將嘅機會。然後佢用自己理論上最出色嘅腳下功夫，親手將道門關返埋。
由完美二號，變返真正後備
望返24/25球季，佐真遜其實係一個相當完美嘅二號門將。佢各項賽事上陣24場，歐協聯更加幾乎由頭踢到尾。作客海登咸完成11次撲救，決賽亦獲馬蛇信守承諾安排正選，最後協助車路士反勝貝迪斯捧盃，仲入選埋賽事最佳陣容。
當時佢嘅定位好清晰。山齊士負責英超，佐真遜就利用歐協聯同盃賽累積經驗。一個守住聯賽正選，一個喺相對次級嘅對手身上慢慢升級。
問題係25/26無咗呢條練功路線。歐協聯升級成歐聯，對手由海登咸、艾斯坦拿變成歐洲最頂級球隊，教練自然唔可能再將整條戰線交俾二號門將試腳。世冠盃亦提前重設咗順位，佐真遜只踢一場，山齊士就一路正選，決賽更加封鎖PSG兼贏埋金手套。
佐真遜由一個歐洲賽正選門將，變返真正意義上嘅後備。佢需要把握每次盃賽同臨時上陣，證明自己唔止適合對住次級對手。
可惜，佢無做到。
機會唔多，交出嚟嘅答案亦唔夠好
佐真遜今季各項賽事上陣12場、10次正選，合共964分鐘。對比上季超過20場同接近1,900分鐘，使用量幾乎腰斬。
單計英超，佢只得5次上陣、3次正選同379分鐘。而且呢5場入面，有一次係