(會員限定)【季後分析】25/26柏度尼圖由玻璃變成鐵 把快刀磨準之後反而無咁鋒利
如果兩年前有人同我講，柏度尼圖會成為車路士其中一個最健康、最穩定出勤嘅球員，我一定會建議佢盡快求醫。
呢個加盟前平均每季缺陣過百日、幾乎為車路士文員部度身訂造嘅玻璃翼鋒，25/26球季竟然各項賽事上陣52場，43次正選，累積超過3,700分鐘。醫學奇蹟，無得彈。
表面睇，佢仲交出10入球10助攻，成為球隊助攻王。健康、勤力、左右翼都踢得，肯回防兼且不惜體力，張成績表幾乎無得挑剔。
但由玻璃人變成鐵人、由神經刀變成供應者嘅過程，亦令佢失去咗部分最原始嘅殺傷力。尼圖25/26球季唔係退步，亦唔算真正突破，而係一次有得亦有失嘅戰術馴化。
呢篇文，一齊睇下呢把曾經周圍亂斬嘅快刀，被磨得更加精準之後，點解反而無以前咁鋒利。
期待值回顧：萬能Key可唔可以由神經刀變成穩定主力
望返24/25球季嗰篇季後分析，當時我對尼圖嘅評價係「Chaos Creator」。
佢左右翼甚至假九都踢得，速度同引球推進可以瞬間改變比賽。每90分鐘雖然有5次帶波推進，但盤扭成功率只有32.7%，傳球成功率亦只得78.4%。好多攻勢都係睇住佢高速起步，Dup低頭撞入人堆，場面好刺激，最後乜都無發生。
另一個疑問係傷患。加盟前平均每季缺陣超過100日，上季即使無再次長抖，球會仍然要小心控制負荷，大家始終唔知副偈幾時又會熄火。
所以今季要驗收嘅，唔係尼圖把刀夠唔夠快，而係佢可唔可以健康踢足一季、改善最後一腳，真正成為任何教練都敢長期使用嘅武器。
今季實際交貨：醫學奇蹟背後嘅10入球10助攻
尼圖今季各項賽事上陣52場，43次正選，累積3,756分鐘，交出10入球10助攻。單計英超亦有34次上陣、30次正選、2,631分鐘，錄得5入球6助攻。
單論出勤，幾乎可以俾個勤工獎佢，一年120蚊自己向會計部申請啦。
以前喺狼隊跑幾場就要返文員部報到，今季