【季後分析】25/26車路士球員點評 彭馬人無事先做到世界冠軍
曾經有一個好笑嘅名放係車迷面前，但我哋無珍惜到。彭馬FC，直到失去先後悔莫及……人世間最痛莫過於此。如果上天俾我一次機會……我其實唔介意車仔變成彭馬FC。
回望過去兩季，彭馬簡直就係車路士嘅救世主。上季大家仲興致勃勃咁討論佢點樣喺馬蛇手下由右路自由人成功轉型做古典10號，滿心期待佢喺 25/26 球季將天賦同戰術完美結合。點知去到今季，劇本迎來咗災難級嘅大反轉。入球同助攻數字斷崖式下滑，季尾被杜曹踢出英格蘭世界盃大名單，彭馬，由天才跌落凡間。
無所不能嘅戰術核心，變成固執拒絕手術、帶住殘軀嘅悲情天才；佢嘅跌watt，係自身醫療決定失誤與球隊病態依賴嘅雙重反噬。25/26，或者係彭馬唔想再諗起嘅一年都未定。
期待值回顧：曾經嘅巨星…
睇返上季（24/25）嘅季後分析，彭馬當時喺馬蛇手下經歷咗轉型嘅陣痛，由肥普時期無拘無束嘅「右路自由人」，被改造成 4-2-3-1 體系下嘅古典 10 號位。雖然當時入球數字因為十二碼減少同把握力正常化而回落，但大家都睇到佢創造射門機會不跌反升。車迷甚至英格蘭球迷都一致寄予厚望，覺得佢只要完全適應咗呢個指揮官角色，25/26 球季一定可以將天賦同戰術完美結合，甚至順理成章咁成為英格蘭國家隊出戰 2026 世界盃嘅絕對正選。
今季實際交貨：數據斷崖式暴跌與世盃夢碎
但無諗過，劇本同實際演出可以差咁多。今季彭馬嘅英超上陣時間，由上季嘅 3,191 分鐘暴跌至 1,955 分鐘（出勤率僅 57.1%）。全季聯賽淨係交出 10 個入球，當中一半，即係 5 球仲要係十二碼，助攻亦只有 1 次，直接由上季嘅神變成隱形人。
呢個斷崖式嘅下滑，源自