【季後分析】25/26山齊士神鬼正式退場 剩低嘅普通人夠唔夠做一號
山齊士大概係我個Page最穩定嘅收視保證。
幾乎每隔半年，佢就會提供一個新理由俾我再寫多篇。以前寫佢其實好簡單：上場先救一球神仙波，下一場再派一嚿足以令全場爆粗嘅膠。「神又係你，鬼又係你」，標題改少少又可以重新用過。
但25/26嘅山齊士，反而無以前咁容易形容。
嗰隻鬼靜咗好多，個神亦無再三日唔埋兩日突然顯靈。佢終於無再場場測試車迷心臟，更多時間只係完成一個門將應該完成嘅工作。
聽落係進步，甚至可能係大家等咗幾年先等到嘅成熟。
問題係，車路士球迷對龍門嘅標準，從來唔止係「唔好派膠」。我哋見過施治同古圖斯企喺門前，好似起咗幅石屎牆，對手未射已經覺得道門窄咗一半。
山齊士今季或者終於令人無咁驚，但又有無真正令對手驚過？
當神同鬼逐漸退場，剩低嗰個山齊士，究竟係值得信任嘅正選門將，定係大家終於睇清楚，佢其實一直都只係一個普通人？
期待值回顧：唔使再做神，至少唔好突然做鬼
望返24/25球季，山齊士仍然係車路士陣中最矛盾嘅球員之一。
佢英超撲救成功率達到73.4%，高空波控制同禁區外掃蕩亦位列聯賽前列；但長傳失準、受壓下決定混亂，再加上多次直接導致射門或者失球嘅錯誤，令球迷永遠唔知道下一秒會見到山神，定係山泥傾瀉。
季尾世冠盃，佢就展示咗最理想嘅版本。六場比賽救出22次射門，決賽面對PSG完成六次撲救，協助車路士捧盃之餘，自己亦贏得金手套。
更加驚喜嘅係，佢多次用長傳越過PSG第一重逼搶，直接搵右路嘅古斯圖同彭馬，其中一次更加成為首個入球嘅起點。原本最令人驚嘅弱點，突然變成打爆歐洲冠軍嘅武器。
所以25/26真正要驗收嘅，係山齊士可唔可以將世冠盃嗰個冷靜、果斷兼識得用球嘅版本，變成每星期都可以出現嘅正選門將。
今季實際交貨：神鬼劇情收斂，成為真正全勤一號
山齊士今季各項賽事上陣50場，49次正選，按球會官方比賽時間合計4,844分鐘，錄得15場不失球，係全隊上陣時間最多嘅球員。
單計英超，佢35場全部正選，踢足3,039分鐘，完成98次撲救，取得9場Clean Sheet。對一個過去仍然需要同柏祖域、祖真遜爭位，甚至一度被馬蛇收起嘅門將嚟講，今季終於真正坐穩一號位置。
最大進步，係佢