【季後分析】25/26嘅艾達拉比奧尤 唔係水貨點解一樣令人失望
艾達拉比奧尤加盟車路士嗰陣，成單交易睇落幾乎無得輸。
免費、當打、有英超經驗、身高接近兩米，仲係曼城青訓出身。喺成隊波平均年齡低到作客都要家長簽回條嘅情況下，球會終於搵返個成熟中堅，理論上應該可以提供經驗、穩定同領導力。
我哋對佢嘅要求亦唔高。唔需要變成泰亞高施華，只要班後生仔開始派膠嗰陣，佢可以企出嚟執返好條防線，已經算完成任務。
一年之後，如果你問我艾達拉比奧尤今季做過啲咩，我又唔係完全答唔出。但要搵一場真正令人覺得「好彩有佢」嘅比賽，我就要諗一陣。
免費簽入無可能叫做水貨，但免費球員一樣可以令人失望。
呢篇文，一齊睇下艾達拉比奧尤25/26球季，究竟有無做到球會最初搵佢返嚟嗰份工作。
期待值回顧：免費簽返嚟嘅成年人
好難得地，艾達拉比奧尤上季無獨立季後分析，加盟前我亦無寫過球探報告，所以今次直接由球會簽佢返嚟嗰刻嘅定位講起。
2024年夏天，車路士由富咸免費簽入當時26歲、累積接近80場英超經驗嘅艾達拉比奧尤。泰亞高施華離隊後，球隊需要嘅唔止係另一個有潛力嘅中堅，而係一個可以處理高空波、穩定傳球兼提醒隊友企位嘅成熟角色。
上季佢各項賽事35次上陣、28次正選，仲喺足總盃同歐協聯取得入球，基本上符合免費實用兵嘅定位。
所以25/26對佢嘅要求好簡單：需要輪換時頂得上、混亂時夠穩、班後生仔出事時幫手執屎。
唔需要驚喜，只需要少啲驚嚇。
今季實際交貨：由可靠輪換變成盃賽專員
艾達拉比奧尤今季