【季後分析】25/26 車仔身價統計專員 邊個大幅升值邊個蝕到入骨
嚟到季尾，好多數字都已經定咗落嚟，作為一個鍾意數字嘅9up專家，點會放過呢種機會。如果你唔鍾意數字，咁多謝你嘅點擊，你可以返上上一頁。
25/26球季嘅車路士，喺英超簡直係一場災難。由上季第4跌到第10，2月之後戰績雪崩，最後連歐洲賽資格都無埋。
但如果我哋好似班體育總監咁，打開Transfermarkt，嘗試由「資產管理」角度重新欣賞呢個球季，你會發現件事唔止係場波踢得差咁簡單。
2025年世冠盃結束後，車路士全隊總身價約為13億2000萬歐元；去到25/26季尾，只剩約11億1000萬。按Transfermarkt未四捨五入前嘅數字計算，一季累計跌幅係2億700萬歐元，係歐洲五大聯賽跌得最多嘅球會。
無錯，唔使再用平均數掩蓋真相，亦唔使打開Excel揀靚嗰幾格。成個大盤，真係由山頂一嘢插咗落嚟。
不過都要戴返個數據頭盔：球會總身價會受買賣球員同名單變動影響，唔等於同一批資產原地跌咗2億幾。Transfermarkt估值亦唔係實際轉會費、球會帳面值或者隨時可以套現嘅現金。
所以，淨係拎住2億700萬拍枱，未足以證明每一筆投資都失敗。要睇清楚兩位總監盤數究竟搞成點，仲要逐隻股票拆開嚟睇。
占士：並列絕對升幅王（€30m → €60m，帳面增值 +€30m）
全季升得最多嘅其中一個，係今年變咗文員部副經理嘅隊長占士。
佢嘅身價由一年前嘅3000萬，直接翻倍暴升到6000萬歐元。Transfermarkt現時甚至將