【車迷觀點】波特之亂 2.0 惡夢正式終結 羅生光速下台普天同慶
「啵！」各位車迷，聽唔聽到？係開香檳嘅聲呀。
經歷咗連續五場全敗兼零入球嘅地獄級災難，車路士再一次經歷咗好似複製貼上嘅波特之亂2.0。好彩，去到今日 4 月 23 日，史丹福橋終於宣佈重光！
當見到官方出 Club Statement 宣佈羅生光速下台嗰一刻，相信大家嘅 WhatsApp 群組同討論區都已經全面暴動，普天同慶。
講明先，今篇文只係一篇普天同慶嘅淺打短聞。你要我依家即刻寫幾千字去拆解羅生戰術點解死、或者長篇大論痛批高層點解又重複犯錯？唔好意思，等我飲晒手頭上呢支香檳先再講！
所以今篇文絕對唔係咩深層分析，淨係講吓個未經證實嘅離婚費笑話，同埋八卦吓新鮮滾熱辣嘅新帥候選名單，大家一齊輕輕鬆鬆開心吓就算！
Btw，琴日篇文先講完，話「如果後備席果位四眼仔仲有少少羞恥心，唔該自己遞信辭職」，出文都唔夠24小時就炒咗。唔確定係我神預言定係球會有參考我諗法，總之顧問費另議。(講笑)
6 年半合約嘅笑話？好彩今次分手費夠平
大家都記得，今年 1 月高層搵羅生接手嗰陣，簽咗份長到嚇死人嘅 6 年半 合約俾佢。嗰陣大家心諗：「死啦，又嚟 Trust the process？萬一教到 Pat 屎咁要炒佢，咪又要賠到破產？」結果，呢個 process 堅捱得三個月貨仔就宣告死亡。
內部嘅嘢就未有人可以證實，有部份傳媒就話車仔賠足6年，足足2400萬鎊。但根據《衛報》（The Guardian）爆料，好似話高層今次學精咗，合約入面寫明，就算炒佢都只係需要賠 1 年薪酬。(姐係400萬鎊)
當然，呢個消息暫時只係留於傳聞階段，要證實恐怕要等財報出嚟或者有內鬼爆料先知，但以清湖嘅邏輯加上近期車仔嘅財務狀況，落得手炒人應該都諗過度過…應該。
新帥大熱門盤點：邊個敢坐呢個帥位？
羅生一走，史丹福橋個帥位又變返吉位，賠率盤亦隨之光速起變化。目前跑出嘅候選名單明顯係走