【戰術覆盤】新特蘭 2：1 車路十 輸波係領隊同高層嘅共業
我在此恭喜晒車迷，唔係因為輸波攞景贈慶而咁講，而係因為我哋終於捱完咗一個咁難頂嘅球季。如果你同我一樣，不離不棄咁支持咗呢隊柒波一年，先俾掌聲自己。
聯賽煞科日，車路十喺光明球場用一場 2：1 的敗仗，鎖定聯賽第 10 名、全季只拎到 52 分成為隊史英超第五低積分，柒到連 The Athletic 都費事為呢場波出深度戰術報導，正式由車路士變成車路十。
回顧呢 90 分鐘，呢個結果應該無一個車迷會覺得意外，一場由「場邊領隊平庸無能」與「高層四年盲目作死」聯手炮製嘅終極人禍。鬧球員心散Hea踢好易，但麥法蘭用佢自己嘅臨場反應證明自己根本未夠班坐英超帥位；而高層就用四年時間將一隊 16 億鎊嘅球隊，親手改造成下半版無慾無求嘅中游爛泥。最後一場波、最後一份戰術覆盤，心痛但都請跟我一齊睇晒佢。
比賽簡述：
開波初段，車路十以進攻階段 4 後、防守階段 3 後，試圖以控球掌控節奏，但主場嘅新特蘭為咗衝擊歐洲賽帶住瘋狂嘅氣勢，一開波就對車仔後防癲狗式逼搶。比賽去到 25 分鐘，新特蘭後場發動長傳，Luke O’Nien 頭槌二傳， Trai Hume 腳背窩利抽射入網，為新特蘭先開紀錄。
車路士上半場並非無還手之力，甚至製造出兩次黃金機會，可惜開波僅 4 分鐘彭馬嘅半單刀射得太弱被輕易沒收，而 38 分鐘斯圖嘅靚傳中，祖奧柏度門前頭槌又頂斜。車仔帶住一球落後返回更衣室。
換邊後麥法蘭未有作出人手調動，新特蘭喺 50 分鐘迅速擴大優勢。Le Fee 喺右路落底傳中，Brian Brobbey 門前一篤，個波不幸省中古斯圖入網，烏龍波。
落後兩球下，麥法蘭喺 53 分鐘用占士換走中堅哈圖，陣式變回 4-2-3-1。調動好快見到短暫成效，56 分鐘 尼圖右路內切傳波，彭馬禁區外起左腳勁射破網，打破自己 14 場嘅入球荒，幫車仔追成 2：1 的接近比數。
正當球迷看到一絲追平希望，防線危機隨即爆發。科芬拿喺 54 分鐘先因為侵犯 Brobbey 領到黃牌；僅僅 8 分鐘後嘅 62 分鐘，新特蘭入替嘅 Isidor 中路突破，科芬拿在失位下被迫拉跌對手，結果兩黃一紅被逐離場。
踢少一個嘅車路士被迫用細查換走尼圖補回防線空缺。比賽尾段陷入混亂，補時足足長達 10 分鐘，但車仔班大帝在對面拖延戰術下顯得極度急躁，安素同彭馬更因為投訴同犯規先後食黃牌。最終車路士無力回天，以 2：1 吞下煞科日敗仗。
戰術深潛
精準 Bypass，輕鬆搞掂車仔
上面講咗，麥法蘭今場排返 3-4-3，進攻時古古前插變 4-2-3-1，防守則縮回 5-2-3，試圖複製上場擊敗熱刺的套路。然而，新特蘭主帥 Le Bris 賽前已經估到。
新特蘭利用極高體能展開後場 High Press，直接切斷車仔的出球路線。車仔上半場空有 53% 控球率，但當中有 124 次傳球都在自己半場無意義咁猜，哈圖同古古尼亞在危險區域頻頻傳失，反擊根本無法帶來任何威脅。
反觀新特蘭果邊根本