【死因研究】歐聯 PSG 1：1 (4：3)阿仙奴 非兵不利戰不善弊在大巴
琴日先喺自己個 Page 度口響響咁話：「呢場波無乜技術含量，唔寫長文啦」，點知過咗唔夠廿四小時，就即刻彈篇死因研究出嚟。我知你實會問，版主你係咪精神分裂？
係，我認衰仔，今日嘅我打倒昨日嘅我，主要有兩個原因。第一，阿仙奴失落歐聯呢個「流量密碼」實在太香，香到我忍唔住要出賣尊嚴去呃 Like (好似係)；第二，亦都係最重要嘅原因，今朝同幾個朋友（包括阿迷）激辯完，再去摷返數據，同埋睇埋 The Athletic 幾篇賽後報告之後，我發現我琴日個結論錯得好緊要。
我話場波「無技術含量」，錯得交關。阿仙奴最終飲恨亦都絕對唔係單純輸 12 碼唔好彩咁表面。
如果中學你同我一樣有讀過《六國論》，入面有一句：「六國破滅，非兵不利，戰不善，弊在賂秦。」今日套用喺阿仙奴身上就係：「歐聯失冠，非兵不利，戰不善，弊在大巴。」呢種大賽保守病，同埋冠軍班底帶住 Underdog心態嘅死亡錯配，絕對值得開一個《死因研究》嘅 File 嚟好好寫下。
講明，戰術嘢，真係純觀點嚟，你絕對可以唔同意，歡迎理性討論，罵謾就咪怪我Block你啦。
案情重組：809 次傳球的羅生門
為咗令大家明白點解我話阿迪達親手閹割自己隊波，我哋先重溫下個戰局。
開波僅僅 6 分鐘，阿仙奴就憑住一次快攻，由夏維斯射破PSG大門領先。呢個夢幻開局，照計係最好嘅劇本。但入波之後，阿仙奴嘅選擇係：全面退守。
我琴日喺 Page 都讚過，單講上半場，阿仙奴嘅 4-4-2 Overload Defence係史詩級成功。佢哋好有紀律咁縮後，放棄半場逼搶，用 2v1、3v2 嘅人數優勢夾擊 PSG 兩條邊路。搞到 PSG 上半場就算空有超過 7 成控球率，但 xG (預期入球) 只有 0.23。安歷基隊波就好似撞落幅石屎牆咁，完全老鼠拉龜。
達子嘅如意算盤好明顯：「我開波插咗你 PSG 一刀，然後我就縮入個殼度，用鐵桶陣死守 90 分鐘，等你慢慢流血而死。」
睇番全場數據，PSG 傳球成功次數高達 809 次 (91% 成功率)，而阿仙奴只得 196 次。如果你係車路士或者一隊護級份子，俾對手喺中圈舒舒服服猜 800 幾次波，係實力不濟、無可奈何；但你係手揸懷斯、沙卡、艾斯嘅英超一哥。任由對手掌控絕對嘅比賽節奏，連試圖打斷對方傳控鏈嘅意圖都無，呢個就唔係實力問題，而係一個極端嘅戰術選擇。
而呢個放棄主動權嘅選擇，正正就係一切死因嘅開端。
死因分析：決定生死嘅致命傷
死因一：0.01 xG 嘅荒謬與零反擊罪名
安歷基今場控球質素係歐洲頂級，但問題係達子根本無試過去打斷佢。
好多人以為泊大巴就等如純粹死守，但頂級嘅大巴，例如摩連奴全盛時期，防線縮得幾後都好，前面一定會有一把極其鋒利嘅反擊尖刀。因為你要有反擊點，對手條防線先至會忌憚，唔敢傾巢而出。
但阿迪達今場嘅部署，就係為咗死守，連反擊嘅火苗都自己踩熄埋。睇返下半場數據，PSG 瘋狂反撲狂轟 12 腳射門；但阿仙奴呢？整個下半場 45 分鐘，射門次數係 1，而預期入球（xG）竟然係震驚全美嘅 0.01。
無錯，係 0.01。即係話阿仙奴喺下半場，要用同樣嘅攻勢攻100次先有機會入一球。當你連象徵式嘅反擊都做唔到，你其實係話緊俾安歷基聽：「我無嘢可以威脅到你，放心攻」。結果？PSG 條防線毫無顧慮咁推晒上中圈，將成場比賽變成半場攻防演練。達子太睇得起自己條防線可以滴水不漏頂足 90 分鐘，結果就係久守必失。
死因二：遲鈍嘅換人時機 與 戰術災難
去到 65 分鐘，右閘 Mosquera 喺禁區被字母哥爆過犯規輸 12 碼被追平，達子先至如夢初醒，即刻撳掣換入基奧基尼斯同添巴想反撲。但呢個調動，唔單止遲，甚至可以話係越幫越忙。
關於呢點，TA 嘅戰術大師 Michael Cox 喺賽後報告都有寫。我同Cox嘅諗法一樣，認為阿迪達抽走奧迪加特換入基奧基尼斯係其中一個敗筆。因為原本夏維斯喺前面做支點、停波其實做得非常出色，包括開波 6 分鐘入嗰球已經係。但基奧基尼斯入替之後，夏維斯被逼墮後，而基奧基尼斯喺前線完全護唔到波。
結果，阿仙奴連唯一可以喺前場 Hold 住個波俾自己防線抖吓氣嘅出路都自己塞死埋。Michael Cox 篇文寫得好直接，換人之後阿仙奴「created almost nothing」（幾乎創造唔到任何攻勢），而對方門將 Safonov 喺阿仙奴換人之後，的確係連一次撲救都無做過，係龍門口打邊爐都無問題。
自己主動放低把槍任人魚肉，到失波想抆刀互斬嗰陣，先發現自己把刀已經鈍鈍哋，你話奶嘢唔奶嘢？
死因三：Overload Defence 嘅體力雙刃劍與 12 碼悲劇
防守，尤其是係高質量嘅防守，係極度消耗體能嘅。你見阿仙奴上半場條防線好似滴水不漏，其實背後係靠球員瘋狂嘅無球跑動、遮線同埋單對單夾擊去支撐。
睇返全場跑動距離，阿仙奴全場跑咗超過 146 公里，足足比 PSG 跑多 5 公里。你以為 5 公里分落 11 個人度好少？絕對唔係。有做開運動都明，呢種不斷無氧衝刺、急停轉向去填補空位嘅 Overload 踢法，對大腿同小腿肌肉嘅負荷唔講得笑。
Overload Defence 用嘅體力，最終變成雙刃劍斬返自己。去到 65 分鐘失波之後，達子想換人反撲？後面班兄弟其實已經跑到氣咳，莫講話推上去支援進攻，連基本嘅 Form 都只係勉強Keep到 。
甚至去到互射 12 碼階段，好多人話加比爾射高嗰一球係心理質素差或者唔好彩。但有踢過波嘅人都知，當你守足 120 分鐘，對腳好似重到乜咁，大髀肌肉過度疲勞之下，你提腿同鎖腳腕嘅技術動作多少都會變形，一發力個波就自然飛上山頂。
當然，體力有可能係因素之一，但實際射失嘅原因我哋永遠唔知，只係可以肯定，體能儲備越充足，技術執行嘅成功率就越高。
總結：冠軍班底與護級心態嘅死亡錯配
2012 年車路士贏歐聯，對住拜仁全場泊大巴。但大家應該記得，當年車仔傷兵滿營、幾名主力停賽，兼且唔係當時嘅英超冠軍，殘陣作客安聯球場，縮後完全係弱勢之下嘅無奈之舉。
但今日嘅阿仙奴呢？應屆英超冠軍，手揸英超最頂級、最豪華嘅陣容。擁有世界級嘅人腳，但去到歐聯決賽嘅大舞台，阿迪達依然擺出一副弱隊求生嘅 Underdog 心態。
蘇洵寫《六國論》，話六國之所以亡，唔係因為兵馬唔夠強、打仗唔夠勇，而係「弊在賂秦」，主動將土地送俾秦國，以為換到安穩，最終係養大咗敵人，自斷退路。
今日阿仙奴，其實係差唔多。唔係手上嘅牌唔靚，懷斯、沙卡、艾斯、夏維斯、基奧基尼斯，隨便一個拎出嚟都係世界頂級；唔係冇能力出刀，而係達子主動選擇唔出牌，將反擊嘅主動權雙手奉上俾安歷基，以大巴換防守安穩，以為「我只要縮後等你流血死就OK」。
防守唔係罪，但面對安歷基呢種控球狂魔，你為咗死守而完全放棄反擊威脅，將比賽主動權 100% 雙手奉上，呢個格局同戰術思維，唔可以話錯，只係有少少失身份Only。阿仙奴今場唔係輸人腳，甚至唔係輸 12 碼運氣，而係輸喺領隊嘅大賽心態，阿迪達太睇得起自己球員嘅防守極限，自己主動放低把槍，到最後要互斬嗰陣先發現已經無力拔刀。
六國因賂秦而亡；阿記因大巴而亞。
好啦，長文寫完。我知呢篇文一定會激嬲唔少阿迷，但請容我重申一次，我唔係以車迷身份去寫，而係用一個球迷心態去講。如果你係阿迷，睇完覺得嬲嬲地，歡迎理性留言反駁我；如果你覺得我講得有道理，記得 支持下。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。