【戰術覆盤】白禮頓 3：0 車路士 將帥無能累死三軍
絕望喺未開波就開始、但比賽未開始已經結束，原來世事可以荒謬成咁。
我知好多人係覺得我寫嘢尚算中立正路 (自稱) 而睇，但如果喺呢個狀況下，我仲可以好冷靜咁支持領隊，咁我一定唔係車仔Fans，我亦無資格自稱車仔Fans。
先係寫其他嘢之前俾個讚自己，同真係睇足咗全場嘅巴打們，我哋可以堅持到 90 分鐘，基本上同玩咗一次極限運動係無分別，唔使質疑自己，因為呢場波真係好西，應該係近3年、甚至係 10 年最西嘅一場，無之一，比波特更差。
如果你睇咗我咁樣放負咗兩段都仲未走，咁希望你可以睇晒我成篇文，我保證你會理解我諗咩，同點解我會咁樣放負。今次我仲要好好心機咁幫你Cap埋圖，大家唔好浪費時間睇精華啦…信我。
比賽簡述：不費吹灰之力的技術性擊倒
呢 90 分鐘嘅賽事，用毫無還擊之力嚟形容係最貼切。白禮頓贏得非常輕鬆，可以話係連汗都唔使出，就將車路士踩落腳下。
噩夢由開波前已經降臨，車仔嘅正選名單被古古尼亞嘅髮型師洩漏 (係，你無睇錯，我都無打錯)，對手早N咁多個鐘就知彭馬同柏度尼圖會因傷缺陣。
然後開波僅僅 3 分鐘，防線連一個簡單嘅角球都解唔到圍，直接被對方嘅 Kadioglu 窩利抽入。由嗰一刻起，車路士就陷入咗捱打狀態。個波根本運唔出自己半場，前場球員連波皮都掂唔到，踢到足足 40 分鐘，先至由細查喺禁區頂勉強起腳，完成全隊第一腳嘅射門、仲要係被對手 Block 走。
換邊後，羅生如夢初醒推翻自己嘅排陣，場面叫做有少少起色，但只係將 -10 分改做 0 分。56 分鐘，白禮頓一個簡單嘅反擊，輕鬆撕破防線，由 Hinshelwood 掃射成 2：0，將車仔僅餘嘅一點虛火淋熄。
去到補時階段，車仔防線更加出現終極真空。兩名白禮頓後備兵輕鬆連線，De Cuyper落底傳中，中路因為位置錯配走漏咗韋碧克，佢輕鬆抽入網頂埋齋。3：0，技術性擊倒，技不如人，但一切嘅罪魁禍首，係場邊果隻四眼仔。
戰術深潛
上面都只係頭盤，用戰術同數字你睇，你會更加絕望。
未開波先自閹，恐懼式 3 中堅與防線災難
點解話羅生今場波係未開波先認輸，我諗有睇嘅巴打都會明。The Athletic 嘅賽後分析一針見血咁指出咗個核心問題：羅生將 2 月聯賽盃對阿仙奴死守嗰套 5 後衛陣式，原封不動咁搬出嚟對付白禮頓。