【車迷觀點】如何理解BlueCo個Project 點解老行尊話死局我話「未係」
早兩日喺 Facebook 出咗個 Post 講球會財報，有巴打喺下面留言問我一個好直接嘅問題：「其實 BlueCo 呢個 Project 係咪真係玩爛咗？」有人敲碗問問題，我當然樂意解答。
但諗深一層，啱啱先寫完上一篇講高層同球迷 CST 嘅「平行時空」隔空大戰，跟手又1：0輸俾曼聯，大家滿肚怒火，呢個問題確實係時候要正正經經咁攤開嚟講。獨樂樂不如眾樂樂，倒不如索性開篇新文，同大家深度梳理一次我對呢個 Project 嘅完整理解。
喺開始入正題之前，照舊戴定頂頭盔先。
寫呢篇文，唔係要做高層嘅打手，亦唔係想幫 BlueCo 啲蘇州屎護短或者洗白，同時我亦想跳出球迷「贏波就讚、輸波就屌」嘅情緒，嘗試企喺一個客觀少少嘅圈外人角度，去還原車仔呢個「Vision 2030」背後嘅原始設計邏輯。
而剛好，近日前車路士、利物浦高層 Christian Purslow (CP) 喺 YouTube 提出咗一連串行業老手嘅警告。無可否認，佢睇到嘅系統裂縫的確係血淋淋咁真實。但聽完呢啲「死亡警告」之後，我又係咪覺得車路士已經萬劫不復、步入死局？
又唔係。接下來，請各位客倌擔好櫈仔 (因為堅長)，聽小弟娓娓道來……
油王種落嘅棋局，三大緊箍咒嘅綑綁
好多人鬧 BlueCo 入主之後亂咁嚟，當正自己玩緊 FM。但其實成件事，要由油王賣盤嗰一刻開始講起。