【車迷觀點】兩個平行時空嘅車路士 洛杉磯的承諾與倫敦街頭的怒火
距離車路士主場迎戰曼聯嘅大戰仲有兩日。不過波未踢，場外嘅戲碼已經好睇過Netflix。
因為琴日，車路士嘅世界出現咗兩把截然不同嘅聲音。一把嚟自陽光明媚嘅洛杉磯，BlueCo 巨頭 Eghbali 喺CAA體育大會嘅演講台上揸住支咪，氣定神閒咁大談球會願景兼派定心丸想安撫人心；同一時間，另一把就係嚟倫敦街頭，準備緊聽日大遊行嘅車路士球迷信託基金（CST），佢哋掟出咗一封措辭強硬、要求明確嘅公開信俾車仔高層。
兩邊都係講緊車路士嘅未來，兩邊都話自己好緊張球會。但將兩份宣言拍埋一齊睇，個畫面就好似一對瀕臨分手嘅情侶喺度隔空鬧交：雙方都喺度各自表述，永遠唔喺同一個Channel，對方講緊乜都完全聽唔入耳。
反正粒花生咁大粒，所以呢篇文就唔加油添醋，唔幫高層洗白，亦唔做球迷打手。純粹做個無情嘅整合機器，將呢個相隔近 8,700 公里嘅「平行時空」對話，原汁原味咁攤開俾大家睇。由你地定奪佢哋邊個講得啱。
第一回合：關於個 Plan
Eghbali 喺洛杉磯演講最多人引述嘅一段，係佢用咗三個「Plan」字，仲要不斷Repeat，好似當年董太叫人洗手洗手洗手咁款：
「我哋有計劃。我哋反思計劃。如果計劃行唔通，我哋就調整計劃。(我哋想表達嘅) 信息係：我哋係有承諾嘅。」
簡潔有力，聽落係幾有說服力。仲加多一句足球比喻，話現在進度係「第 40、50 分鐘」。意思係：比賽過半，方向清晰，請球迷放心。
但係另一邊把聲音就問：個計劃，係乜X嘢計劃？
CST 喺公開信入面用咗一句好準確嘅說話去形容：「車路士球迷被要求，以一個從未清晰、一致地解釋過嘅長遠願景為名，接受史無前例嘅巨大改變。四年之後，呢個願景依然未能贏得球迷嘅信任。」
用人話講，姐係：呀大佬呀，唔係話你冇計劃，而係我哋球迷從來唔知你個計劃係咩。點跟你呀？
至於「第 40、50 分鐘」呢個比喻：CST 可能最想問嘅係：呀大老闆，你果場係英式足球呀可？踢緊係幾多分鐘嘅比賽呀？
第二回合：關於馬蛇離任同近期低潮
Eghbali 喺台上嘅另一個重點，就係解釋點解車仔依家會踢到咁掙扎。佢個語氣，聽落有少少委屈：
「六個月前大家仲好開心架，只係最近成績令人失望。」
然後，佢提到馬蛇嘅突然離任係一個重大外因：馬蛇元旦日突然跳船。佢強調，季中突然無咗個教練，戰術同人腳大兜亂，絕對唔係球會想發生嘅事。言下之意：成績差係因為突發嘅天災人禍，大家體諒下啦，我哋絕對撐依家嘅領隊羅生。
聽落都幾合情合理吖？但 CST 嗰邊嘅公開信，完全唔食呢一套。
CST 封信講得好白，直接拆穿呢個公關包裝：「呢次行動（遊行），絕對唔係對單一賽果或者近期狀態嘅過度反應。」
佢哋仲拎埋今年 1 月份做嘅民意調查出嚟鞭屍：超過 90% 球迷對球會嘅足球決策無信心。
呢度轉用人話講，即係：老闆，唔好喺度轉移視線兼瀨地硬啦。我哋唔係因為呢兩場輸波先遊行，我哋係忍咗你哋四年，忍到對你哋成個決策結構同眼光徹底死心呀！你講到六個月前大家好開心咁，會唔會只係你哋高層自己喺度自我感覺良好？
嗯，果然好似一對情侶鬧交。(笑)
第三回合：解決方法：買「即戰力」定係交出問責制？
去到最後，點樣解決依家個困局？Eghbali 喺台上用咗足球老闆最經典嘅一招：轉會窗買人。
但佢唔係淨係話「買幾個即食球員」咁簡單，佢仲描繪咗一個宏大嘅長遠藍圖：「我哋嘅目標，係有一班場上精英球星、場外品格上佳(加拿祖：嗯？？？)、可以同球迷產生深厚感情、未來十至十五年都喺球會嘅球員，成為真正嘅球會傳奇。」佢仲親口點名心目中嘅核心：彭馬、卡些度、安素、高維爾、二安、占士。意思係：班底已成型，夏天微調方向，加入現成即食戰力助陣，穩定向前行。
藍圖係唔錯嘅。問題係：CST 同佢問緊嘅，根本唔係同一個問題。
CST 封信最後射出咗四條直接質詢，原文係咁：
「你哋係咪承認球迷信心已跌至不可接受嘅低點？你哋會做咩具體改變，以提供更大嘅透明度同問責制？你哋同球迷嘅溝通機制係咪真係有效？你哋點樣證明依家嘅策略，可以帶嚟持續成功、財務穩定，同可以辨識嘅車路士身份？」
留意：呢四條問題，無一條係問夏天買邊個。
即姐係話：Eghbali 嘅答案係陣容，CST 嘅問題係制度。老闆認為出路喺球場上贏波；球迷話問題喺球場以外嘅決策唔透明。一個想用戰績去撲火，一個想用問責去講數，兩條問嘅唔係同一件事，答嘅自然係牛頭唔搭馬嘴。
當然，佢哋唔係同一個場合做對答，好難可以要求佢哋對得上Channel，但同時亦代表住，球會同球迷各自重視嘅地方都完全唔同…呢下先難搞。
結語：大戰前夕嘅平行時空
下場英超比賽車路士就會喺史丹福橋迎戰曼聯。球場內，係英超爭奪歐洲賽資格嘅大戰；球場外，NotAProjectCFC 嘅球迷大遊行亦會如期上演。
洛杉磯嘅演講廳入面，高層嘅答案係陣容、係成績、係夏天嘅轉會窗；倫敦街頭嘅球迷就覺得，如果你個決策機制唔改、透明度唔增加，買再多球星都只係死路一條，佢哋追求嘅係一個解釋清楚嘅願景。
呢兩把聲音，到底有冇真係傳達到對方耳邊？定係，洛杉磯同倫敦，注定好似我同橋本環奈咁係兩個永遠唔會相交嘅平行時空？
反正粒花生咁大粒，聽日入到球場最後係用一場勝仗大和解，定係繼續互炳？嗯，留俾時間說話好過。(咬花生)
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
鍾意我嘅文章，又有餘力支持我嘅話，記得去我Substack訂閱：
