【反造星運動】認識車仔青訓小將閃電麥坤 同一個Generation兩種生存之道
寫完加拿祖，諗緊有咩好寫。然後呢篇舊文嘅標題又靜靜哋咁係草稿庫篤咗我一嘢。打開，吉嘅。
無錯，因為我的的確確唔知點落筆。一個今年先得 17 碎嘅小朋友，係FA Cup對維爾港先第一次一隊上陣，到底有咩好寫，有邊個會想睇佢？無錯，我知，聽落好似無嘢好寫。但係我自己想睇。
我講緊嘅，就係佢，Ryan Kavuma-McQueen。「係咪車仔輸太多搞到你失憶呀？你上年寫過佢啦，閃電麥坤吖嘛。」我無失憶，因為今日唔諗住講佢數據，而係想借 TA 嘅一篇球員誌，俾大家認識下呢個年輕人。
(等我換返把顏聯武聲先…)
咳咳，喺同一個世代入面，原來仲有人唔靠流量食飯………
天才背後嘅「痴線佬」執念
(咪住，而家睇我文嘅巴打仲知唔知邊個係顏聯武……)
以防大家唔知邊個係麥坤，大家可以睇返呢度篇舊文。
睇完未？佢 8 歲嗰年，老豆 Dennis 成日播巴西大哨啲片俾佢睇，睇到佢雙眼發光。麥坤本身係左腳仔，為咗練到好似大哨咁雙腳左右開弓，佢居然喺
屋企後花園定咗個相當高嘅目標：只可以用隻弱勢腳，連續的波 100 下。
換轉係普通 8 歲小朋友，的兩的跌咗，道氣洩咗就返入屋打 FIFA 啦。但佢唔係，佢試咗足足幾個星期，日日喺度死練爛練。直至有一日，屋企人拍住片，佢的到停唔到，最後破紀錄的咗 118 下。喺條片入面，佢仲要串串貢咁對住鏡頭講：「只要你有心做，其實唔難（If you put your mind to anything, it is easy）。」
唔係小粉絲，而係同行者
呢幾個月，佢被抽調上一隊操練。一個青年軍，見到彭馬、占士同自己講嘢，仲要占士同佢講「你嘅時代嚟緊」，彭馬話睇過佢入波啲片。嘩，換轉第二個，實即刻影相擺上 IG，返屋企同D fd 由朝吹到黑，當正自己中咗六合彩咁。
但麥坤老母 Alison 爆料，話佢返到屋企竟然隻字不提。好多時係屋企人睇到相，問返佢：「喂，你同彭馬傾偈做咩唔返嚟講？」佢只係淡淡然答一句：「Nah（無咩特別呀）。」
就訪問去睇，佢的確從來無當自己係一個抽中獎入更衣室參觀嘅小球迷。喺佢心入面，佢覺得自己係同行者，佢覺得自己本來就應該屬於呢個地方，同大家係一個Level，僅此而已。
真正嘅勝負慾，係留俾對手嘅
咁呢個冷血殺手，係咪真係對咩都無感覺？又唔係。
老豆 Dennis 話，唯一一次見到佢返屋企極度興奮、忍唔住係咁講嘅，係一次一隊嘅射門訓練。嗰次訓練，同場仲有被球會欣賞重金收購返嚟嘅二安。結果？麥坤喺嗰次練習入面，入波多過二安。
就係呢件事，令佢開心到不得了。
收起光環，現實嘅試煉先啱啱開始
當然，心態好唔代表聽日就可以做世一。贏咗二安固然開心，但一次練習嘅威水，終究唔代表任何嘢。
佢依家得 1.79 米高，身形仲係偏瘦，要應付英超大隻佬嘅肉搏戰仲有排搞。更何況，首份職業合約只係入場券，夏天仲有葡萄牙超新星昆達正式加盟車仔，前路競爭極度殘酷。要避免步恩古莫亞同師兄佐治 (Tyrique George，以防有巴打已經唔記得佢係邊個)，下個球季先係見真章嘅時候。
希望下季麥坤可以搵到屬於自己嘅機會，再次著起車路士嘅藍色波衫，到時我哋就可以拎住啤酒學里安納度迪卡比奧咁指住電視機再大叫：「我識呢條友！」
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
鍾意我嘅文章，又有餘力支持我嘅話，記得去我Substack訂閱：
