【戰術覆盤】利物浦 1：1 車路士 多謝利物浦嘅止血一分
經歷完上場主場被森林副選大炒、創下 33 年最長六連敗嘅百年恥辱後，車路士今場作客利物浦，包括我在內，相信好多人都打定輸數。但足球神奇嘅地方係，你永遠估唔到佢實際係會點發展。
經歷咗你攻我守嘅一人半場90分鐘戰鬥，車路士居然可以係晏菲路拎走一分，順便終結6連敗走勢，你望下賽後科芬拿笑得幾開心，就知拎到一分有幾咁難能可貴。
距離硬撼曼城嘅足總盃決賽只剩一個星期，如果帶住七連敗嘅頹氣去溫布萊，恐怕球員未出更衣室已經腳軟。看守領隊麥法蘭今場喺臨場應變上依舊被對手食住，但開局嘅殘陣戰術部署的確有諗頭；加上球員算係擠到少少咁多鬥志出嚟，總算為風雨飄搖嘅車路士挽回一絲尊嚴。
比賽簡述：0.04 xG 神仙波對決與 VAR 嘅心跳遊戲
呢 90 分鐘嘅戰局，話精彩又唔係，話悶又講唔上……
開波短短 6 分鐘，倒戈嘅青訓小將恩古莫亞左路發難，助攻 Gravenberch 喺禁區頂轟入死角。
但去到 35 分鐘，隊長安素喺 35 碼外處理罰球，個波離奇地貼地穿過人群，慢溜遠柱彈入，為車路士幸運地扳平 1：1。最有趣嘅係，呢兩球波嘅預期入球（xG）都只有極微乎其微嘅 0.04……咁樣有兩個入球可以話係奇蹟……
換邊之後，就輪到雙方球迷嘅心臟輪流承受考驗，上演咗一幕詐糊大交換。49 分鐘，古古尼亞左路傳中引起混亂，彭馬門前補射入網，點知高興咗幾秒，VAR 劃線話古古尼亞越位在先，空歡喜一場；轉個頭唔到 10 分鐘，利物浦嘅鍾斯近門頂入，同樣因為隊友越位被吹走。
去到比賽尾段，利物浦開始㩒住車路士半場嚟狂攻，蘇保斯禮遠射中柱，跟住雲迪克頭槌再中楣，真係睇到車迷一額汗。好在門柱兩次幫手，最終雙方以 1：1 握手言和，順利喺晏菲路帶走1分。
戰術深潛
無翼陣嘅 4-3-3 變種，戰術正確但彭馬撻唔著
賽前睇出場名單，車仔所有翼鋒全部傷晒出唔到，個個都以為麥法蘭今場排 3 中堅死守。但實際踢落先發現，原來係佢藝高人膽心咁將