【球壇風向室】球證唔俾紅有冇做錯？城阿大戰後車迷嘅天人交戰
先戴定頂頭盔做個利益申報：眾所鳩知我係理性車路士球迷。而大家亦知道BB車最近踢到Pat屎咁，所以琴晚曼城對阿仙奴呢場天王山之戰，邊個贏邊個輸、甚至邊個奪冠，對我來講完全無切身利益關係，我作為花生友睇頂級對決。
而呢篇文，我亦無諗過幫加比爾洗白，亦都無興趣幫主球證安東尼泰萊或者 VAR 團隊打圓場。錯就係錯，球例寫喺度就係寫喺度。
我知你一定會想問：「咁你篇文寫嚟托？」
問題就喺呢度，琴晚睇完場波，再同身邊幾個波友激烈爭論完之後，我發現自己陷入咗一個極度精神分裂嘅狀態。作為一個熱愛戰術同比賽觀賞性嘅球迷，面對 83 分鐘加比爾撼頭落夏蘭特度嗰一幕，我個腦入面出現咗兩個完全相反嘅聲音瘋狂對鬧。今日呢篇文，我唔打算做判官去定奪對錯，只係想誠實咁剖析呢場發生喺我心入面，相信亦發生喺部份球迷心入面嘅天人交戰。
案情重組：83 分鐘嘅「世紀之撼」
為咗確保大家喺同一個時空傾偈，我哋先快鏡去返事發嗰一刻。
曼城對阿仙奴時間去到 83 分鐘，當時曼城憑住夏蘭特嘅入波啱啱反超前 2：1。阿仙奴急於反撲，中場一陣埋身肉搏之後，加比爾同夏蘭特呢對冤家由開波第一分鐘就纏鬥到甩皮甩骨，連夏蘭特件波衫袖都扯爛埋，係呢個時間點終於擦出咗終極火花。加比爾一時火遮眼，行埋去直接一個撼頭動作，將額頭隊咗落夏蘭特度。
嗰一刻，全世界隔住個 Mon 都唔敢呼吸，目光集中係主球證安東尼泰萊身上，正當大家以為佢隻手會直插心口個袋，攞塊紅牌出嚟趕加比爾出場。點知，泰萊大老爺施施然行埋去，各打五十大板，一人派一張黃牌了事。而 VAR 房嘅 John Brooks 亦都出奇地爽手，好快就 Confirm 咗唔介入，維持黃牌原判。
賽後，英超賽會官方 Match Centre 仲特登喺 X 出咗個聲明解畫，死撐話 VAR 覆核過，認為加比爾嘅動作「唔係過分侵略性或暴力」。
呢個判決同埋呢張官方解說，即刻點著晒各大論壇同名宿。而我個腦入面嗰場「法官 VS 球迷」嘅辯論，亦都喺呢一刻正式開波。
理性我：法理上，佢絕對應該直紅
先講下我個腦入面嗰把「法官」把聲。如果撇除所有情感、賽果同比賽氣氛，單純拎住本球例去判，加比爾呢下動作，
我諗唔到一個可以為佢爭辯嘅理由。
英超賽會個官方聲明話加比爾「唔夠過分暴力」，呢句嘢應該睇到唔少人反晒白眼。前英超球證 Andy Davies 喺 ESPN 個專欄度，已經直接兜巴星落去呢個官方解釋度。Davies 講得好清楚，加比爾呢下係一個「嘗試性暴力行為」。根據球例，紅牌唔係淨係睇你有冇撞爆人哋個頭，只要你有意圖、嘗試做出暴力侵犯，就已經符合直紅嘅標準。
如果球例唔夠說服力，我哋可以請埋「過來人」阿倫柏祖（Alan Pardew）出庭作證。呢位前紐卡素領隊睇完場波之後都忍唔住出嚟抽水，佢話自己 2014 年喺場邊做過類似嘅撼頭動作，結果點？「我當年因為咁俾人重罰咗 15 萬鎊兼停賽，你話我點睇？佢絕對將個頭放咗喺唔應該放嘅位置。」
柏祖做就罰 15 萬鎊兼停賽，加比爾做就袋張黃牌繼續踢？
所以我非常明白，琴晚同我拗到面紅耳熱嗰位波友，佢嘅想法係 100% 企得硬嘅。法治精神，就係一視同仁。球例入面從來無一條叫「保護大戰氣氛」嘅條款，球證唔應該、亦無權力去做導演去干預劇本。如果因為係天王山之戰就可以手鬆，咁英超嘅執法公信力就會蕩然無存。
所以，「理性我」得出嘅結論好簡單：法理上，加比爾係應該被罰出場。呢個唔係一個可以各打五十大板嘅討論，而係一個鐵一般嘅事實。
睇到呢個位，我估已經有阿迷準備好一份名單，等住話我「咁之前某場某球員又係咁點解唔紅？」你講嘅，我唔反駁：英超執法不一係公認事實，呢個同今次嘅文章無關。如果阿迷覺得我有錯，歡迎去我Page留言，講下其他你覺得唔紅嘅理據。
感性我：但我真心唔想見到呢張紅牌
雖然理智上我知加比爾抵死，但當「感性我」：即係嗰個純粹熱愛足球、享受緊頂級戰術對決嘅球迷靈魂接管大腦嗰陣，我心底入面其實暗自Yeah咗一聲，甚至私心慶幸安東尼泰萊眼盲睇唔到下頭鎚。
首先，容我解釋下點解我眼中呢場波係一件藝術品，而唔係普通嘅例行聯賽。由賽前部署你估我我估你嘅心理戰，到實際落場大家做微調，哥帥用杜古加奧懷利去爆阿記右線、半場大家再轉換，阿記用更多高波、曼城節奏再快少少，呢啲一切一切，係戰術與個人才華喺極限環境下碰撞出嚟嘅火花，已經超越咗波，去到係一種競技藝術。
因為如果果一刻出咗張紅牌，佢摧毀嘅唔單止係阿仙奴追平嘅希望，更加係會偷走成場比賽嘅 Narrative。
試諗下，如果加比爾 83 分鐘被逐離場，剩低嗰十幾分鐘阿仙奴踢少個，戰局就會即時瓦解，變成一場毫無懸念嘅攻防演練。然後，第二朝全地球體育版嘅頭條、各大論壇嘅討論，甚至你同朋友食晏時嘅話題，全部都會變成「加比爾腦殘斷送追和機會」同埋「安東尼泰萊又做主角」。
我啱啱先花咗幾千字去寫一篇戰術分析，讚嘆卓基個扭盤有幾通透、阿迪達嘅高位逼搶有幾高深、仲有貝拿度施華嗰個令人動容嘅 50 碼狂奔回防。但如果加比爾紅咗，所有極限拉扯都會被抹殺，成場天王山之戰嘅主角就焗住要變成一張紅牌，連我篇戰術文嘅焦點都會被逼轉移。
而令到我呢份「感性」變得更加有自信嘅，係當事人夏蘭特嘅反應。
喺現代足球呢個「掂一掂就成個被雷劈咁碌地」嘅大環境下，夏蘭特被撼頭之後，佢連退都無退半步，更莫講話掩面瞓低。賽後佢接受訪問講嗰番話，直頭係呢場對決嘅靈魂：「我唔會跌低，除非真係有人攻擊我（原文：I will not fall on the floor, which I will not do unless someone really attacks me）。」
呢種強者之間「我要喺球場上正面擊潰你，而唔係靠你博紅牌被趕出場」嘅武士精神，真係型到震。佢拒絕倒地，其實係對呢場頂級球賽質素嘅一種最大尊重。諷刺嘅係，連前球證 Andy Davies 都承認，正正因為夏蘭特無順勢碌地，先至拯救咗安東尼泰萊，俾咗個藉口佢用所謂「更宏觀嘅角度」去出示黃牌了事。
喺「感性我」嘅眼中，夏蘭特嘅硬淨，保住咗呢件藝術品嘅完整性。我知係有問題，但感性嘅我覺得足球有時候需要嘅唔單止係冷冰冰嘅球例，仲有一種純粹嘅浪漫。
天人交戰收尾：得罪全世界的「精神分裂」
寫到呢度，我諗應該唔少巴打都會發現我完美咁跌入咗一個「兩面不是人」嘅死胡同。
「理性我」堅持加比爾應該直紅，呢番說話無疑係將阿仙奴球迷得罪得徹徹底底，佢哋一定會覺得我係度抽水，想阿仙奴死，想阿仙奴失冠；但另一邊廂，「感性我」又大言不慚咁話慶幸球證無俾紅牌，呢個浪漫主義論調，絕對會辣㷫晒所有曼城球迷，覺得我幫球證同阿仙奴洗白，無視咗佢哋應得嘅競賽公平，搞到佢哋餘下嘅 10 分鐘踢得咁痛苦。
所以，我成功用一篇文章，同時得罪晒曼市同北倫敦嘅球迷，我有時都幾佩服自己……
但其實，呢場喺我心入面嘅天人交戰，邊有對錯可言？「理性我」係一個盡責嘅法官，佢答緊嘅係「根據球例，呢個動作應該點判？」；而「感性我」係一個純粹嘅球迷，佢答緊嘅係「作為一個熱愛足球嘅人，我想睇到一場點樣嘅比賽？」。所以，最開頭我同個Fd嘅討論，永遠唔會有結果，因為我哋想講嘅嘢，根本唔係同一個平面上。
我亦相信，呢種矛盾絕對唔係我獨家專利，而係每一個真正熱愛足球嘅球迷，出廠嗰陣都已經原裝配備嘅Bug。我哋一邊屌球證執法尺度唔一致、執法水平參差；但另一邊廂，當一場世紀大戰因為一張爭議紅牌而提早收檔，我哋又會揼心口覺得浪費咗 90 分鐘。
今日寫呢篇文，唔係想說服你加比爾抵死定抵放，只係想誠實咁面對呢種足球帶俾我哋嘅極端矛盾。下次再有呢啲世紀大戰同世紀爭議，我哋可能又會經歷一次同樣嘅精神分裂。不過，呢樣就係足球令人又愛又恨嘅地方，唔係咩？
========================================
Facebook 同 Threads 已經開咗啦！如果鍾意我的文章可以入黎按個讚！
⭕️ 車迷狗up天地 ❌
https://www.facebook.com/profile.php?id=61566593983419
鍾意我嘅文章，又有餘力支持我嘅話，記得去我Substack訂閱：
