上一篇研究完五個中堅點樣配對，寫到最尾，我望住幅點都填唔滿嘅雷達圖，忍唔住講咗句：「爭咩吖，溝埋做瀨尿牛丸，踢三中堅呀笨。」
本來純粹係一句電影對白用嚟笑下。兩個中堅畀唔晒咁多功能，咁咪加多個人，左邊負責出波、中間負責頂波、右邊負責搶前，大家將技能夾埋一齊，Perfect池，收工。
但回頭望返季前賽，沙比原來真係已經煮緊呢粒瀨尿牛丸，留意，係煮緊，已經唔係整緊。
對AC米蘭，佢試過哈圖、科芬拿同邦仔；去到對皇蘇，高維爾、拿確斯同科芬拿更加直接排成三人防線，占士就移上中場。即係三中堅唔係我為咗呃多篇稿費夾硬作出嚟嘅IF線，而係開季真係有機會沿用嘅方案。
之不過，加多一個中堅只係解決咗人手數目，未代表成套答案已經完成。三個人可以各自負責一份工作，亦可以因應控球同防守不停轉位；同一張正選名單，甚至可以一時三後衛、一時四後衛，踢踢下再有人行埋入中場。
所以今篇唔再問邊三個中堅能力最強，而係問另一樣更加貼近沙比玩法嘅問題：
「沙比需要嘅，究竟係最完整嘅三中堅，定係一套可以隨時變返四後衛嘅三中堅？」
三中堅唔係多一個人，而係每個人終於打少份工
上一篇幅雷達圖最麻煩嘅地方，唔係無一個中堅可以包辦所有工作，而係五個人夾埋都仲有死角。有人識出波但對抗唔算頂級，有人頂得撞得但未必適合控制進攻，亦有人鍾意搶前攔截，但身後一定要有人準備執手尾。
放落四後衛，兩個人就要將呢堆工作分晒。左邊一個出波，右邊一個搶前，咁邊個留後包抄？中間擺個大隻佬頂高波，另一個就要同時負責帶波、長傳同追擊。無論點揀，總有一份工作要搵人兼職。
三中堅真正解決嘅，首先就係