寫到第五篇，終於輪到全隊最多人、亦最難扮簡單嗰個位：中堅。
車路士現時可以擺入討論嘅人選有科芬拿、高維爾、拿確斯、哈圖，再加埋間中可以客串嘅占士。五個人爭兩個位，齋睇數量直頭鬆動到可以開兩枱麻雀，點砌都應該有一對啱用。我仲要無計到位置未定得實嘅邦仔同上季傷到九彩嘅安瑟明路，唔係件事會更痴線。
今篇會先用四後衛去諗。唔係因為我已經偷睇到沙比本戰術筆記，而係季前踢法仍然可以轉完又轉，依家連佢實際會長期用四後衛定三中堅都未估得準。簡單就是美，先當左右各有一個中堅位，再睇下點樣配搭。（懶就懶啦，講到咁好聽。）
而且中堅同翼鋒唔同，唔係單純將五個人逐個排能力次序。有人負責出波，有人鍾意搶前攔截，有人專門留後包抄；一個人做唔到嘅嘢，本來就應該由身邊嗰個補返。
所以今篇真正要問嘅係：「四後衛之下，車路士點樣將兩個各有缺點嘅中堅，砌成一對完整防線？」
五個人夾埋，原來幅圖都仲有窿
同之前一樣，雷達圖唔係