【車迷觀點】大球場到啟德嘅香港車迷故事 香港車迷會其實唔神秘
先講清楚，呢篇文我絕對無收過一蚊雞、亦唔係工商，絕對係小弟我手痕而寫。但只要可以令一個香港嘅車迷認識到更多，我就覺得值得。
是咁的，我十幾年前啱啱出嚟做嘢嗰陣，曾經 Join 過香港車路士官方球迷會，但我呢隻小小車迷，份人又內向，堅係唔知佢哋平時做緊啲乜。
我對上一次對於香港球迷會嘅記憶，已經要數到 2011 年。嗰陣車仔嚟香港大球場踢友誼賽，我跟住球迷會第一次親眼見到費托、林伯特，仲收到一大堆球迷會專屬嘅周邊，嗰刻真係開心到彈起。(果時支旗仔我仲有收埋係度。)
(放心，我唔係相入面)
眨下眼 15 年過去，球會連老闆都換Q埋、捧過歐聯、攞過世冠、又經歷過N咁多次換血，今年車仔終於重臨香港，仲會殺入啟德。趁住呢個歷史性嘅機會，就約咗香港車路士官方球迷會嘅副會長 Edmond 傾咗場計。
嗱，再戴多次頭盔，呢篇文絕對無收錢。 我同大家一樣，都只係一個對官方球迷會內部運作一無所知嘅小車迷。今次純粹係想揭開佢哋嘅神秘面紗，發掘下有咩實用情報同福利，覺得有價值，就無私開心 Share 畀各位巴打 Only。(兩個頭盔，夠穩陣)
球迷會究竟係做緊咩？
好老實講，「官方球迷會」五隻大字擺出嚟，好多人（包括我呢D I人）第一個反應都係：「係唔係好難入？係唔係高高在上嗰種？」
但實際上，睇嚟唔係咁。
平日嘅話，球迷會嘅核心工作相當貼地，就係 FB 同 IG 定期出 Post、每場波前追蹤正選陣容、賽後速遞。實體活動方面，佢哋會不定期搞睇波派對，仲會自己組隊，同其他球迷會踢友誼賽。簡單講，唔係得網上吹水，真係有班人定期落場踢同聚。
我估同大家最有共鳴嘅，係個會員 WhatsApp group。Edmond 話，每場波完咗，個group都會彈幾百條 message：鬧天鬧地、分析戰術、互相取暖，乜都有。而入面同我個Page差唔多，大概有兩類人：一類係幾十年老球迷，會講「嗰時XXX係點點點…」；另一類係新生代，直入：「邊個廢，收皮。」（係，我哋身邊都總有一兩個。）
我都忍唔住問：「近年車仔成績咁差，仲有新人 join 咩？」Edmond 笑咗笑，答：「有㗎。成績唔好你都嚟 join，OK 㗎你。」：我諗呢句，係對近年入坑嘅巴打絲打們嘅最高評價。
順帶一提，呢個叫你又愛又恨嘅球迷會，今年踏入成立 30 週年。1996 年由一班駐港外籍人士創立，回歸後一代傳一代交棒本地人，而家已係第五代華人會長主理。Edmond 用一句有畫面感嘅嘢去總結：「同隊波一樣，有起有跌囉。」
最大驚喜：原來經球迷會買波飛有著數？！
如果成個訪問要揀一個最令我「嘩」一聲嘅位，肯定係呢 Part。我自問都算睇咗好多年波，但我真係完全唔知原來有呢個隱藏秘技。
香港車路士官方球迷會，原來係全球百幾個分會入面，極少數嘅 32 個白金級（Platinum Tier）球迷會之一。呢個朵有咩用？最直接嘅著數就係：優先買飛。
平時大家想飛去英國朝聖，撲飛簡直係惡夢。但 Edmond 話，透過球迷會買飛，除咗季票持有人之外，佢哋個 Priority 係排第二。今季佢哋收咗四百幾個買飛申請，成功率係驚人嘅 95%。即係話，除咗超級大戰要計分（Loyalty points）之外，基本上你入紙就幾乎一定有得睇。(當然都要視乎實際情況而定，唔中都唔可以怨我)
對比下個價錢就更加誇張。
Edmond 又教路，想經球迷會買飛，首先你要自己畀大約 £35 做英國官方嘅 True Blue 會員先，買個入門票。之後透過香港球迷會買飛，就只會收返張飛嘅原價加少少手續費，主場靚飛都係大約 £60 到 £70。
但如果你自己去公海搵 Agent 或者黃牛呢？Edmond 話今年有會員問過價，出面閒閒地收你 £200（成兩千幾蚊港紙）一張，仲要隨時食炒價。一來一回，個差價接近 2 倍！用三百幾蚊港紙買個 True Blue 會籍做保險，換個 95% 嘅原價買飛機會，仲有其他會員優惠，如果你本身真係有計劃飛去史丹福橋朝聖，呢個渠道確實幾值得留意。
為咗證明張飛有幾值，Edmond 分享咗佢季尾親自飛去睇施華大哥最後一場嘅經歷。完場嗰陣，施華帶住全隊繞場喊住告別，我隔住Mon都感覺得到，何況係現場？
今次嚟香港！應援區係點搞出嚟㗎？
講到眼下最切身嘅話題，肯定係車仔去啟德嘅香港友誼賽。如果大家有留意，今次車仔球迷係有設立「應援專區」，背後其實係點爭取返嚟嘅呢？
Edmond 話，原本佢哋只係同英國官方傾緊 30 週年有咩福利，點知突然收到風車仔會嚟，跟住就被邀請咗去主辦單位嘅 Press Con。主辦方亦有將北看台劃咗做車仔球迷區，但如果你自己上網公售買，啲位係 System 亂派嘅，即係話好難將一班死忠坐埋一齊。
球迷會心諗：「難得嚟到，無理由散修修㗎？」於是佢哋即刻發功，帶住「白金級球迷會」個朵，透過英國官方介入同主辦單位談判。結果真係俾佢哋爭取到：北看台正中間龍門後面、頭 15 行嘅超級靚位，劃做專屬應援區。只要經佢哋買，就 Guarantee 喺呢個範圍入面。
至於大家最關心嘅價錢問題：正價飛 $1999，點解球迷會個 Package 係 $2350？
Edmond 都解釋得好均真：呢個數已經包咗 $1999 張飛、第三方售票網手續費（約 $160）、會計師樓手續費、一份 30 週年專屬紀念套裝，仲包埋你下季（26/27）嘅球迷會會籍。
等等，買張波飛點解要出動到「會計師樓」交收咁誇張？
Edmond 坦白到好好笑：「大佬，幾百張飛咁大嚿錢突然揼入嚟，一陣話我洗黑錢點算？就算大家信我，我都驚筆錢入咗我戶口，我會忍唔住夾帶私逃啊，哈哈哈！」講笑還講笑，用註冊會計師樓處理，其實係為咗保障所有買家利益，大家交收都安心啲。
至於現場氣氛？大家都知史丹福橋主場平時出名係圖書館，難得車仔 15 年後重臨香港， Edmond 話今次都考慮緊安排人出嚟領唱帶動氣氛，希望成個北看台可以嘈到拆天。
另外，Edmond 都有提到一個好現實嘅位：香港車迷其實唔少，但要由網上吹水變成現實參與，始終差最後一步。球迷會平時搞睇波、踢波、約戰其他球迷會或者參加比賽，反應有時未必如想像中熱烈；但對英國官方嚟講，一個地區球迷會嘅會員數字同活動參與度，正正係衡量當地球迷基礎嘅重要指標。換句話講，如果香港車迷想將來爭取更多名宿活動、官方資源、甚至更多香港訪問之旅，唔可以淨係靠網上 Like 同留言，真係要有人願意行出嚟，等球迷會有更多「牙力」同官方講數。
總結：
今篇係一次車迷角度嘅解說同訪問整理。去唔去、Join 唔 Join，當然大家自己衡量。但如果你一直覺得香港車迷會好遙遠，或者以為佢哋只係間中出吓 Post，咁今次訪問起碼俾我知道：背後真係有一班人，默默幫香港車迷儲緊同官方講數嘅籌碼。同埋，要搵到同聲同氣嘅巴打，其實遠在天邊近在眼前都唔定。
如果你想跟大隊一齊入啟德叫破喉嚨，又或者想為將來去英國朝聖鋪定路，可以自己去 Facebook 或者 IG 搜尋「香港車路士官方球迷會」搵佢哋報名（25/26 現有會員優先）。
今次我就因為個仔就出世去唔到香港睇（係，呢件事比車仔去香港仲係大件事。）所以今次就交俾大家搞旺個場，代我叫多幾聲。
由2011大球場到2026啟德，十五年過去，車仔返嚟香港。希望今次唔止係一場季前熱身賽，而係香港車迷重新聚埋一齊嘅一次機會。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。