【戰術覆盤】車路士 3：1 皇家蘇斯達 雙刀流被拆沙比點見招拆招
進入正式文章之前，用少少篇幅俾我發洩不滿先。車路士官方App嘅負責人，唔該先自己扣半個月人工。
今場波無賣俾第三方電視台，除咗皇蘇嗰邊，幾乎就係CFC+獨家直播。結果車路士入完第一球，官方App立即送俾大家一句：
「Stream temporarily unavailable」
Stream一斷，連帶車路士嘅攻勢都一齊斷埋。可惜下半場車仔攻勢返生，條Stream就無返生。至於我之後點樣睇到場波……唔好問，你會怕。
最終車路士主場3：1擊敗皇家蘇斯達，今場亦已經係球隊連續第三場攻入三球。齋睇數字，季前進攻火力好似相當唔錯；但同柔佛嗰場兩個十二碼加一個烏龍唔同，今場三個入球全部來自成形攻勢，至少終於見到一啲值得帶去英超嘅嘢。
不過，3：1背後其實係兩場完全唔同嘅比賽。
左手短劍，右手長劍
沙比今場繼續排出3-4-3，帕利斯查同尼圖分居兩邊，羅渣士、彭馬就喺祖奧柏度身後活動。名義上兩邊都係翼衛，但實際用法完全唔同。
左路嘅帕利斯查有盤扭能力，但速度唔算突出，所以更多係等羅渣士攞波之後再後上協助，靠配合逐步推進；右路尼圖就直接得多，留後少少都無所謂，反正只要前面有空位，佢就可以靠速度自己將個波帶入危險區域。
簡單啲講，就係左手短劍、右手長劍嘅雙刀流。
車仔早段亦靠呢把長劍先開紀錄。尼圖右路傳中，祖奧柏度頭槌被救，羅渣士及時攝入小禁區補中。成個攻勢無乜花巧，但翼衛拉開、前鋒搶點、攻擊中場後上，至少每個人都做緊自己應該做嘅嘢。
可惜去到飲水Break之後，皇蘇開始