【戰術覆盤】西悉尼流浪者 3：2 車路士U21 西悉尼流浪者 1：4 車路士
如果你傍晚無睇直播，呢一刻先見到我寫呢篇文，應該會覺得奇怪，個標題做乜撚嘢？
先講結果，車路士作客6：4反勝西悉尼流浪者，第一個反應可能係：沙比首戰就同大家玩十球入球騷，進攻足球返嚟喇。
但如果你真係睇足90分鐘，應該會有另一個疑問：我頭先中間係咪唔小心轉咗台？
因為呢場波根本唔似一場完整比賽。頭一個鐘，沙比派出一隊由U21擔正，再塞入邦仔、托辛、艾素高同戴納幾個一隊球員嘅實驗品。戰術結構有少少嘢睇，但球員質素忽高忽低，三度俾西悉尼流浪者攻破，踢成3：2。
去到63分鐘，彭馬、祖奧柏度、二安、基頓斯同一班主力後備集體落場，成場波就好似突然撳咗兩倍速。傳波快咗、走位快咗、埋門亦銳利咗，西悉尼本來仲可以同車路士有來有往，轉眼就變成每一步都慢半拍。最後27分鐘，車路士轟入四球，用最簡單粗暴嘅球員質素將比賽反Cup。
所以與其話呢場係西悉尼流浪者4：6車路士，不如將佢拆開嚟睇：
西悉尼流浪者3：2車路士U21。
然後，西悉尼流浪者1：4車路士。
問題係，63分鐘後落場嗰隊，究竟係沙比心目中真正嘅車路士，定一班解除限制器、暫時靠個人質素收拾殘局嘅一隊球員？
有戰術骨架，但幾個一隊球員要返去補課
講明，呢場波只係友賽，我無諗住用平日嘅框架去寫，只係想將自己所見所想匯集成文。而頭一個鐘，其實唔係完全無嘢睇。
沙比排出嘅名義陣式係4-2-3-1，禾殊踢10號，薩特帕耶夫同閃電麥昆分居兩翼，戴納頂喺最前。但去到無球階段，防線