【死因研究】社區盾 阿仙奴 3：0 曼城 該冒險時保守該保守時裸跑
當一個人由你間公司過檔競爭對手，第一日正式返工就俾人打到體無完膚，正常人都難免望多兩眼。
當然，作為一個成熟、有修養、絕不記仇嘅車迷，我無意落井下石。最多只係開一份《死因研究》，睇下那個男人發生咩事。至於點解叫那個男人？知道講緊邊個就可以，冇必要畫公仔畫出腸。
講返場波。開賽只係23秒，卡拉費奧利已經替阿仙奴打開紀錄；28分鐘夏維斯頂成2比0；換邊後僅僅三分鐘，奧迪加特再將當拿隆馬Fake到瞓低，輕鬆射入第三球。由比賽開始到失去懸念，曼城連半場休息都未能夠替自己爭取到一次重新開始。
究竟阿仙奴做咗啲乜，令曼城嘅控球變成一堆冇殺傷力嘅數字？曼城又係點樣由落後一球，逐步將自己所有逃生門關上？
驗屍報告，正式開始。
案情重組：曼城點樣死？
阿仙奴開賽23秒就由卡拉費奧利先開紀錄，28分鐘再由夏維斯頂成2比0。曼城上半場曾經由科頓同夏蘭特起腳，但都被拉也救出，半場落後兩球。
換邊後，曼城以基亞利殊入替杜古，但48分鐘再被奧迪加特攻入第三球。球隊隨後陸續換走夏蘭特、奧懷利、科頓同安達臣，仍然無法改變戰局，最終以0比3落敗。
曼城全場錄得更多射門、禁區內觸球同進攻半場傳球，但預期入球只有0.77，黃金機會亦只有一次。控球同進攻次數都有，真正威脅就無。
死因一：前面想搶，後面裸跑
曼城第一個死因，唔係無搶迫，而係搶迫得太過天真。
由企位上睇，曼城並無打算