【車迷觀點】古古尼亞離車加盟皇馬 水貨笑話進化成世界級嘅故事
話說，我原本寫好咗大半篇《25/26車路士球員點評，古古尼亞篇》，諗住排期出稿同大家一齊回顧下呢位爆炸頭今季嘅功過。點知我手腳慢，稿都未砌好，車路士同皇馬就啪一聲官宣轉會。
我篇球員點評就咁胎死腹中，可以直接掉入垃圾桶……不過，舊嘅唔去，新嘅點嚟。點評出唔成，就換黎呢篇古古轉會嘅深層剖析。
古古去皇馬，呢單新聞對好多車迷黎講，情感真係相當複雜。由當初人人喊打嘅£62m水貨，到後黎默默耕耘做左路最可靠嘅守護神，幫我哋捧起歐協聯同世冠盃，甚至做埋西班牙主力奪得歐國盃。佢用四年時間，喺史丹福橋演繹咗一幕最勵志嘅逆襲故事。
但偏偏喺佢達到頂峰嘅黃金期，高層就選擇將佢趁高位套現。到底呢單交易，係古古本人尋求職業生涯終極躍升嘅自主抉擇，定係 BlueCo 喺 PSR 壓力下嘅會計操作？
去講其他嘢之前，我想先講返少少溫情嘅嘢。有一直 Follow 呢度嘅巴打都知，古古係一個極度顧家嘅好爸爸。兩個月前，我先寫過佢大仔 Mateo 因為自閉症需要喺倫敦特殊學校安頓，所以佢最渴求生活上嘅穩定。今次決定轉會去西班牙，要重新適應新環境，我可以想像到古古在決定轉投皇馬嘅時候，背後為屋企人考慮嘅嘢，真係比一般球員多好多……所以，先收起謾罵，容我娓娓道來。
商業足球操作，賣古古到底有無賺？
Well，作為一個土生土長嘅香港人，唔情願我都會承認，我第一秒的確係向錢看先。
「2022年用6200萬鎊買番黎，依家最高5180萬鎊（約6000萬歐元）賣出去，帳面上咪要蝕成千萬？車仔轉會部又做水魚？」
嗯，單計出入咁講無錯。但 BlueCo 班華爾街狼人，喺現代足球會計嘅攤銷（Amortization）原則下，呢單交易