【球探報告】車仔一年前買嘅左閘Denner 今日仲係唔係當初訂嗰個？
唔知大家有無買開高達模型。Premium Bandai最仆街嘅地方，就係你今日睇見張官圖覺得好撚型，腦都未經已經撳咗預訂；然後等足一年，等到送貨通知突然彈出嚟，你已經完全唔記得自己買過啲乜。
我早排就係咁。上年落訂，今年先送到，拆盒之後發現同當初想像有少少出入。於是我打去問可唔可以退貨，對面好有禮貌咁提醒我：
「先生，張單一早扣咗數，無得退㗎喇。」
而車路士最近，亦收到咗一封差唔多嘅送貨通知。
2025年3月，車仔向哥連泰斯預訂咗一名17歲巴西左閘Denner Evangelista，等佢滿18歲先正式加盟。事隔一年幾，球員終於準備前往倫敦；但除咗BlueCo內部張Memo之外，我懷疑已經無幾多人記得自己球會買過佢。
依家€10m已經扣咗數，無得退貨。咁拆盒之前，我哋不如先翻查張訂單：車路士當初究竟睇中咗啲乜，而今日送到門口嘅，又仲係唔係當初預訂嗰個Denner？
€10m買嘅唔係履歷，而係上升曲線
Denner Evangelista喺2025年3月同車路士達成協議，當時只得17歲。由於