【車迷觀點】假設安素真係離車去皇 中場真空應該由誰頂上
「曾經有一段真摯嘅……」西遊記對白之前用過，再寫又會俾人話我呃稿費。事緣安素離開車仔嘅傳聞每日都會有，仲密過大公報寫移英壞處嘅每日一篇。作為車迷，自然會有興趣想知一個問題：
「仆街啦，安素真係走咗嘅話，到時邊個頂佢個位？」話就話一個問題，實際上係兩個。因為牽涉到：
一、其實安素喺車路士做緊咩角色？
二、市面上有無人可以代替佢？
不過講明，呢篇文其實有兩個主觀問題，如果你唔同意，就唔使睇落去，因為安素係咩類型嘅球員，好主觀，就算用數字去解釋都一樣有多種解法；另一樣係，安素離隊，要唔要搵一個同佢差唔多嘅人上車都係另一個疑點，古有雙防中、現有4-2-2-2，唔用中場唔係唔可能，所以，呢篇文算係建立於要搵邊個頂安素嘅前題去寫。
前言講完，去馬。
橫跨三季嘅角色進化史：從節奏大師到前插得分手
我諗，安素嘈得最多，一定係佢嘅角色問題。喺你眼中，安素到底係一個咩球員？節拍機？前插中場？萬能插？屎忽鬼？
要答呢個問題，唔可以用單一球季去講，所以更應該問，安素其實可以做到D咩，橫跨三季，我哋可以得到少少答案。
橫跨過去三季，當安素喺合適嘅戰術定位下，佢喺有波在腳時絕對係全歐洲數一數二嘅頂級球員。佢能夠做到嘅嘢，主要有以下