【車迷觀點】安素轉會只剩最後24小時 £120M死線要迫嘅係邊個？
安素呢單嘢，一個月前，我仲笑住寫咗篇【割蓆聲明】。
由安素話自己將來想喺馬德里生活，到古古叫佢一齊去馬德里，再到經理人不斷研究離隊可能，成個6月幾乎每隔兩日就傳一次皇馬。最後皇馬可能真係俾人煩到頂唔順，罕有地喺官網發正式聲明，講明無直接或間接接觸安素，亦完全無意進行交易。
暗戀對象公開叫你唔好再有非分之想，正常人應該都會收拾心情，返屋企聽住失戀歌喊兩晚，然後重新做人。當時我亦以為，安素今個夏天嘅轉會故事差唔多可以收檔。
點知套劇居然可以原地換男主角。皇馬走咗，今次輪到曼城入場。
根據《The Athletic》報道，曼城成個夏天都對安素有認真興趣，佢更加係馬……那個男人補強中場嘅首選。不過去到呢一刻，曼城仍然未有正式報價，車路士亦唔打算繼續陪佢哋慢慢玩。球會已經公開落閘：英國時間星期五下午5點，即係香港時間星期六凌晨零時之前，£120m，夠鐘截單，逾時不候。
但再望清楚成件事，又有少少古怪。可能車仔今次想迫嘅，由始至終都唔止曼城咁簡單。
£120M唔係減價促銷，係唔想賣嘅價錢
首先要搞清楚一樣嘢：車路士無將安素列為非賣品，唔代表球會