【車迷觀點】當日加拿祖非車路士不嫁 一年後就性格不合鬧分手？
一年前，加拿祖為咗加盟車路士，拒絕拜仁、維拉等球會嘅追求，一副「非君不嫁」嘅姿態；車路士亦追足佢大半年，睇準佢同曼聯反面，終於喺轉會窗完結前用 £40m 將心頭好娶返屋企。大團圓結局，出字幕！
當時，我仲寫咗篇《雙向奔赴的愛情故事》，形容呢單轉會唔係普通買賣，而係一個想去倫敦、一個恨咗佢好耐，兩邊一拍即合嘅完美婚姻。
點知蜜月期都未過，今日 Romano 就出嚟爆料：加拿祖願意離開車路士，亦對加盟羅馬持開放態度；車路士同樣無打算死留，只要收到合適嘅永久轉會報價，就可以開門送客。唯一仲未傾得掂嘅，係羅馬只想先借返去「獨家試愛」，車路士就堅持要分手就正式離婚，唔接受冷靜期。
更加神奇嘅係，車路士喺7月9日展開沙比上任後第一課季前操練，球會公開嘅相片同片段入面，偏偏完全見唔到未有任何傷病消息嘅加拿祖。當然，球會無公布原因，暫時亦無證據話佢罷操或者搞事，可能只係獲准遲歸隊，又或者純粹無入鏡；但喺離隊消息滿天飛之際，人又咁啱消失於鏡頭，點都令人覺得有啲可疑……SUS。
一年前仲係非君不嫁，一年後雙方已經準備和平分手。究竟係加拿祖嫌車路士無時間陪佢，定係車路士娶咗返屋企，先發現呢位心頭好根本唔啱用？
你追我返嚟，點解又唔陪我？
首先戴返個頭盔，Romano只係話加拿祖願意離隊，無直接講佢係因為