【車迷觀點】無跟開車仔都完全無問題 35名訪港球員睇波指南
車路士相隔15年再嚟香港，8月5日晚就會喺啟德主場館對祖雲達斯。
講明先，呢篇唔係寫俾每日跟開我文、追住車仔轉會新聞、連U18後備席都背得出嘅痴線佬睇。相反，如果你平時無跟開車路士，只係今次買咗飛入場，或者俾朋友捉咗去陪睇，呢篇就啱晒你。
車路士今次有成35名球員身處香港。如果你望住名單，可能會發現一半以上都唔識，唔使懷疑自己，因為連我哋呢班日日跟住車仔嘅人，見到第56號、第76號都要撳返開個名單確認。
所以以下唔會同你逐個講出生日期、前球會同慣用腳，只會簡單答兩個問題：
佢係邊個？落場之後有咩值得望？
至於最重要嗰班，我仲會附送一句「可以同隔籬位講」，等大家即使唔熟車仔，都可以扮下識波。
點解你認得嗰班人無嚟？
開始認人之前，首先要解答一個問題：點解安素、列斯占士、古斯圖同摩根羅渣士全部唔見人？
原因唔複雜。今夏世界盃踢入最後四強嘅車路士球員仍然放緊假，未歸隊參與季前集訓；古古尼亞、加拿祖等人亦已經離隊。所以今次香港見到嘅，並唔係車路士新季最完整、最強嘅陣容。更準確咁講，呢35人係：
一部分現役主力、一大批新兵、一班準備上位嘅年輕球員，再加幾個前途有啲微妙嘅待處理人口。
波衫號碼同樣只係季前暫用，新球季開始時仍然可能改變。現場認人就得，唔好睇完即刻走去印波衫。
最值得望實，順便同隔籬認叻
10號 高爾 彭馬（Cole Palmer）
車路士目前最大嗰粒球星，亦係全隊最有能力憑一個傳送、一腳死球或者一次突然起腳改變比賽嘅人。見到佢企定定好似未瞓醒咁唔使驚，呢個未剃鬚嘅死人樣本身就係佢嘅正常模式。
可以同隔籬講：「彭馬愈似無心機，通常就愈危險。」
25號 摩西斯 卡些度（Moisés Caicedo）
車路士防中嘅掃蕩機，最擅長預早一步截斷對手進攻同埋身肉搏搶波，再將個波安全送返出去。睇佢唔好淨係追住個波，留意佢點樣移位封住傳球路線，先係真正識貨。
可以同隔籬講：「睇卡些度唔係睇佢搶到幾多球，係睇對手有幾多球根本傳唔出。」
41號 艾斯迪華奧（Estêvão Willian）
我哋叫佢二安，唔使加個新字喺前面。佢係巴西新一代最矚目嘅進攻天才之一，盤扭、變速、突然起腳全部都係賣點。今個季前熱身已經對熱刺入波，佢一對一攞到個波，就係全場最值得企起身望嗰幾秒。
可以同隔籬講：「記住呢個名，過幾年佢真係紅咗，我哋可以話香港場已經睇過。」
20號 祖奧柏度（João Pedro）
可以踢中鋒、輔鋒甚至攻中，最大優點係唔止識入波，仲識走出嚟接應同串連隊友。季前第一場對西悉尼流浪者，佢九分鐘內連中三元，狀態暫時係全隊最Sharp嗰批。
可以同隔籬講：「佢唔係傳統企禁區嘅中鋒，佢最麻煩係你根本唔知應該邊個跟佢。」
7號 柏度 尼圖（Pedro Neto）
速度型翼鋒，最大賣點非常直接：快、好快、真係好快。佢啱啱踢完世界盃先到香港會合，未必會踢足，但只要有空位俾佢跑，場波速度就會突然快一截。
可以同隔籬講：「佢最勁唔係跑得快，係高速之下仲控制到個波。」
11號 基頓斯（Jamie Gittens）
英格蘭翼鋒，鍾意喺左邊一對一推入中路，順境時可以將對面右閘扭到懷疑人生。問題係佢順境時間唔夠多，所以佢可以同一場波令人拍手，亦可以令人拍枱。
可以同隔籬講：「基頓斯一對一係真係有料，最後嗰一下就要睇佢瞓醒未。」
21號 哈圖（Jorrel Hato）
左腳後衛，可以踢左閘亦可以移入中堅，攞波同向前推進都相當淡定。對街外觀眾嚟講佢未必最搶眼，但如果想知現代後衛點解唔再只係負責解圍，望佢就啱。
可以同隔籬講：「佢踢左閘嗰陣唔一定長期企左邊，沙比隨時會叫佢入中路幫手組織。」
47號 昆達（Geovany Quenda）
今夏正式由士砵亭加盟嘅葡萄牙新星，可以踢翼鋒亦可以踢翼衛，左腳盤扭同爆發力係最大賣點。今次香港站亦係全球車迷第一次見佢著車路士波衫踢波。
可以同隔籬講：「佢唔係淨係識爆落底，左腳收入中路先係最值得期待嗰招。」
18號 韋碧克（Danny Welbeck）
係，你無認錯，真係以前曼聯、阿仙奴嗰個韋碧克。年紀當然唔細，但跑位、接應同英超經驗仍然有用，最少唔需要重新學習英格蘭足球係點樣撞人。
可以同隔籬講：「你無睇錯，車路士真係簽咗韋碧克，噢.... 噢噢噢，噢噢噢，我韋碧克降臨。」
未必最搶鏡，但新球季會繼續見
1號 羅拔 山齊士（Robert Sánchez）
車路士近年最具娛樂性嘅龍門，撲救同制空有時真係幫到手，但每次用腳出波都可以令全場車迷集體掩面。今次有輕傷在身，未必一定上陣。
13號 彭達斯（Mike Penders）
身高接近兩米嘅比利時年輕龍門，被視為球會長線培養對象。今季開始有機會正式挑戰一隊位置，大家可以留意佢腳下功夫同處理高波有幾成熟。呢次亦有可能係佢第一次著車仔波衫踢波。
6號 高維爾（Levi Colwill）
車路士青訓出身嘅左腳中堅，優點係由後場開始組織同向前傳球。佢踢得好嗰晚未必會有好多Highlight，因為最佳狀態就係令成條防線睇落無事發生。
29號 科芬拿（Wesley Fofana）
速度、侵略性同上前防守能力都相當突出，健康時係一名好很有存在感嘅中堅。真正問題從來唔係天份，而係身體可唔可以俾佢連續健康踢落去。
4號 托辛 艾達拉比奧尤（Tosin Adarabioyo）
高大、穩陣、英超經驗充足，不過佢有無短路就要睇下果晚好唔好彩。
19號 沙亞（Mamadou Sarr）
左腳年輕中堅，上季外借累積咗唔少一隊經驗，今夏返嚟爭取留隊。身體條件同覆蓋範圍仲有出波能力係賣點，但腳下功夫同集中力仍然要接受更高級別考驗。
34號 艾殊邦（Josh Acheampong）
青訓出身嘅多功能後衛，中堅、右閘甚至移入中場都踢得。佢最大價值係理解比賽同位置感遠比年齡成熟，屬於教練愈用愈容易上癮嗰類球員。
30號 安瑟明路（Aarón Anselmino）
阿根廷年輕中堅，防守風格主動，鍾意離開防線提早搶截。成功就型到飛起，失敗就會將身後成片草地送俾對手，上季有外借去咗多蒙特，今個季前熱身正正係佢證明自己可唔可以留低嘅機會。
14號 艾素高（Dário Essugo）
純防守中場，主要工作係掃蕩、對抗同保護防線。佢未必會經常交出漂亮傳送，但如果卡些度唔落場，最接近代替做防守嘅人就係佢。
45號 拉維亞（Roméo Lavia）
全隊最令人又愛又驚嘅中場之一，轉身避壓、護波同喺人群中盤扭都非常靚。但佢最大對手一直唔係對面球員，而係自己能否保持健康。
認唔到完全正常，季前賽尋寶區
28號 沙文路維（Teddy Sharman-Lowe）
今個季前兩場都獲得正選機會嘅年輕龍門，山齊士有傷之下，香港站仍然有可能繼續把關。
35號 Ted Curd
另一名車路士青訓龍門，今次主要係跟隨一隊操練同吸收經驗，落場時間未必多。唔識佢好正常，因為我都唔識。
2號 帕利斯查（Marco Palestra）
今夏由阿特蘭大加盟嘅意大利右閘，跑動能力同上下往返係主要賣點，屬於新球季可能突然搶到大量時間嘅新面孔。
42號 Calvin Diakite
車路士青年隊後衛，今次趁一批世界盃球員未歸隊獲得隨隊機會，主要目標係俾沙比睇清楚佢去到一隊強度有幾多貨。
56號 蘭頓艾拿文路（Landon Emenalo）
可以踢防線多個位置嘅青訓球員，今個季前已經獲得上陣機會。係，佢亦係前車路士技術總監Michael Emenalo個仔。
37號 Tayo Subuloye
青訓後衛，季前第一場已經正選上陣。現階段距離正式一隊仍有段距離，但香港場如果見到37號，至少你而家唔會R晒頭。
46號 禾殊（Reggie Walsh）
車路士近年最受注目嘅青訓中場之一，年紀輕但踢法相當淡定，可以負責串連亦可以去到禁區附近創造機會，預計會外借鍛鍊。
31號 屈臣（Reggie Watson）
只有16歲嘅中場，對西悉尼流浪者已經獲得正選機會。今次基本上係越級打怪，做到幾多都係Bonus，夠膽踢已經值得留意。
32號 MNJ（Mahdi Nicoll-Jazuli）
偏進攻型中場，對熱刺後備上陣後曾經送出直線製造射門機會。今場如果再有上陣時間，可以留意佢喺密集位置處理個波嘅速度。
36號 薩帕達耶夫（Dastan Satpayev）
人稱新阿古路嘅17歲哈薩克前鋒，未正式加盟報到已經提早跟隊，季前第一場更立即取得入球。佢未必已經準備好踢英超，但肯定係今次名單入面最值得偷望嘅未來股之一。
76號 麥昆（Ryan Kavuma-McQueen）
青訓翼鋒，速度同推進能力係主要賣點。今次波衫號碼大到似電視台頻道，但如果後段落場，反而可能係最無包袱、最敢直接挑戰對手嗰批。
人在香港，但前途未必喺車仔
9號 戴納（Liam Delap）
車路士陣中最接近傳統英式中鋒嘅球員，有身位、有衝刺，亦願意同中堅硬碰硬。但上季因為傷患搞到佢表現相當強差人意，雖然本人想留低爭位，但車路士前線人數太多，前途仍然未完全明朗。
15號 尼古拉斯 積臣（Nicolas Jackson）
曾經係車路士正選中鋒，但目前已經屬於外借或出售預備軍。今場即使落場，都比較似櫥窗展示，而唔係沙比新一隊嘅主角。
44號 史隆連拿（Gabriel Slonina）
一度被視為車路士未來龍門人選，但佢前面已經有多名門將，發展路線…嗯，同追女神嘅小兵一樣，相當尷尬。香港站更似係重新證明自己，而唔係正式爭一號位。
33號 基利文（Omari Kellyman）
可以踢攻中同前場多個位置，但加盟後一直受傷患同上陣時間影響。今個季前對佢而言唔止係操Fit，而係要重新證明自己仍然值得球會安排下一步。
梅迪歷（Mykhailo Mudryk），暫未列出季前號碼
停賽程序解決後，接近兩年無正式比賽嘅梅迪歷終於恢復跟隊操練。速度當然仲喺度，但身體狀態、比賽感覺同實際定位全部都係問號，今場會否上陣亦要睇沙比決定。
總結：唔使35個都記得
老實講，睇完以上35個名，我都唔預大家全部背得出。
如果只想輕鬆入場，認住彭馬、卡些度、艾斯迪華奧、祖奧柏度同尼圖已經夠；如果想睇新鮮感，就再加昆達、哈圖、基頓斯、戴納同韋碧克。
至於其餘球員，最簡單嘅判斷方法係：愈大波衫號碼，愈有可能係季前限定彩蛋。
但季前賽最好玩嘅地方，正正就係你永遠唔知今日個彩蛋，幾年後會唔會變成主角。2011年車路士嚟香港，當時其中一個最受注目嘅年輕人叫麥伊治蘭；佢最後無成為大家想像中嘅巨星。
所以今次見到任何一個陌生後生仔落場，唔使急住問佢係邊個，記住佢先。間中睇我文，遲啲可能又會見到佢個名都未定。
========================================
Facebook 同 主頁 已經開咗啦！如果鍾意我的文章可以入嚟按個讚！
⭕️ 車迷狗up天地 ❌
https://www.facebook.com/cfc9up
本文亦同步刊登於我的主場：
如果想第一時間收到新文通知，或者支持我繼續寫車路士長文，可以到 cfc9up.com 免費訂閱。