上篇死因研究寫曼聯2：4輸俾AC米蘭，有曼迷留言叫我慳返啖氣，話熱身賽啫，換人又多，結果唔可以作準。
老實講，佢哋無講錯。呢篇文唔係諗住報仇或者挑機，更加唔係要拎住侯城個比數逐個留言Tag返出嚟，問大家仲有咩高見。
季前熱身賽只可以當身體檢查，唔可以當死亡證；英超亦只係三十八場入面第一場，未去到輸完就要同卡域克解約。只不過一星期前見到嘅症狀，咁快又出現喺正式比賽，至少值得再望清楚一次。
而且今次個死法其實唔同。今場對侯城，曼聯控制住大部分球權，甚至將對手嘅運動戰威脅壓到接近消失。侯城下半場連一次禁區內射門都無，曼聯自己就有十三次起腳。
但睇足九十分鐘，好難有人會覺得曼聯只係唔好彩。
上次係場波失控後止唔到血；今次更加離奇，曼聯明明控制住對手，最後仍然救唔返自己。
案情重組：兩個死球，九十分鐘無法起死回生
侯城賽前先變一招。季前大部分時間踢四後衛，今場突然改排5-4-1，以三個中堅保護禁區，再由McBurnie單箭頭同曼聯後防肉搏。
開局十五分鐘雙方尚算均勢。第17分鐘，Slater開出角球，個波落到遠柱McBurnie腳下。拉文斯擋出近門射門，但Ajayi已經喺門前等住補中，替侯城先開紀錄。
曼聯之後曾經反撲，麥保姆同泰利文斯先後起腳，但未能追平。第37分鐘，泰利文斯喺禁區右側外圍犯規。又係Slater主理，罰球直接送到Mendy頭上，後者近門頂入。侯城兩次死球、兩次落刀，曼聯半場落後0：2。
卡域克換邊後立即用拉舒福特換走杜古，第67分鐘再派錫斯高、明奈入替山度士同泰利文斯。曼聯由無正中鋒變成將錫斯高擺入禁區，尾段連麥佳亞都長時間推上前線。
但換人無改變比數。麥保姆第78分鐘接應古夏直線形成全場最靚嘅機會，仍然被Tzolakis擋出。兩名入球功臣Ajayi同Mendy就算因傷退下，侯城後備防線仍然無失位。
完場侯城守住2：0。兩個死球係最清楚嘅致命傷，而曼聯用足餘下時間，仍然搵唔到一條翻生路線。
死因一：天堂仔傳到個波，守唔住第一點
兩個死球係致命傷，但曼聯嘅防線問題