【車迷觀點】梅迪歷重獲自由之後 必須越過嘅困難同高牆
呢篇，又係我深夜發作寫出嚟嘅文。梅迪歷禁賽結束，上一文我已經將成單案拆到連WADA份技術文件都譯埋，其實真係無咩好再深究。但當四周靜落嚟，我個腦仍然停咗喺梅迪歷身上。
講明，我唔係Gay，老實講，我唔算好鍾意梅迪歷。佢唔係我最欣賞嗰類球員，見到佢帶甩個波、射上觀眾席、去到最後三分一突然腦斷線，對住阿仙奴又口出狂言，我一樣照笑、照鬧，從來無特別留手。
但唔知點解，每次真正慢落嚟寫佢，筆觸總係會有少少唔同。
可能係因為自己嘅人生都唔算一帆風順，所以見到一個同樣被命運推落谷底、明明已經好努力掙扎，卻仍然唔知幾時先爬得返上嚟嘅人，總會忍唔住望多兩眼。唔一定因為鍾意佢，只係希望佢捱得過，證明人生遇到幾多唔如意，靠努力仍然可以行出另一條路。
英足總解除咗梅迪歷嘅禁賽，還返佢踢波嘅自由。新聞稿一句「即時恢復參賽資格」，睇落就好似監倉大門終於打開，呢場折磨亦正式完結。
但行出監倉、返到屋企，唔等於真正得到自由。前面仲有一道又一道高牆，等住呢個接近20個月無踢過正式比賽嘅人逐道爬過去。
第一道高牆：有操練，唔等於準備好踢波
之前我有寫過，禁賽期間，梅迪歷無放棄過自己。
佢唔可以入車路士訓練場，亦唔可以