【死因研究】曼聯 2：4 AC米蘭 送走艾蛇之後舊病仍然復發
抱歉，但呢場波對我嚟講堅係食花生用。
一邊係上季換帥後突然翻生，由卡域克帶住殺返歐聯、季前亦充滿希望嘅曼聯；另一邊係請咗前曼聯領隊艾摩廉返嚟，連踢幾場熱身賽都未贏過嘅AC米蘭。兩間老牌球會行到季前最後一站，一個似大病初癒準備出院，另一個仲喺急症室門口等緊分流。
正常劇本，邊個做屍體似乎一早寫好。
開波兩分鐘，麥佳亞已經頂入先開紀錄，睇落跟足劇本走。點知九十分鐘後，攤喺地嗰個反而係曼聯。艾摩廉帶住AC米蘭攻入四球，以4：2取得上任後首場勝仗。
循例戴返個頭盔。呢場始終只係熱身賽，兩邊都大手換人，馬天尼斯等球員亦只係啱啱復出搵狀態。用一場無分落袋嘅友誼賽推翻卡域克過去半季嘅成績，或者宣布艾摩廉係無菇嘅，都只係為抽水而抽水。
但熱身賽唔可以作實，唔代表場上出現過嘅症狀全部都係幻覺。
案情重組：兩度領先，十四分鐘連中三刀
曼聯今場有過唔止一次生存機會。
開波僅僅兩分鐘，般奴開出角球，麥佳亞近門頂入，後備席班人幾乎未坐暖就先拔頭籌。AC米蘭去到第37分鐘先由干卡路拉莫斯送出助攻，卓古斯無人看管下射成1：1；三分鐘後，泰利文斯把握米蘭後場失誤殺入禁區，再替曼聯博到十二碼。可惜般奴主射被托利亞尼救出，雙方平手返入更衣室。
換邊後，多古第51分鐘再次令曼聯領先。但優勢只維持咗六分鐘，卓古斯由右路帶入禁區，再將個波送到遠柱，由施斯撞入追成2：2。施斯位置的確有越位嫌疑，不過熱身賽無VAR，入球照計。
去到60分鐘，兩隊開始大手換人。AC米蘭一口氣換入摩迪等四人；卡域克一分鐘後再換六個，拉舒福特、明奈同季前首次上陣嘅馬天尼斯全部登場。
比分亦由呢一刻急轉直下。
第68分鐘，卓古斯右路傳中，干卡路拉莫斯近門頂入；三分鐘後，路夫斯捷克再由右邊禁區殺入，射近柱完成4：2。AC米蘭由第57分鐘追平開始計，只用十四分鐘連入三球，將曼聯第二次領先連根拔起。
兩度領先、射失十二碼、六人換血，以及三個由同一側打開嘅下半場失球，證物全部留低。邊樣係死因，邊樣只係表面傷口，而家逐樣驗。
死因一：領先但無控制比賽
第一個真正死因，早喺麥佳亞入波之後已經出現。
上半場曼聯只喺AC米蘭半場完成