【車迷觀點】唔使觀音借庫都有£117m BlueCo可以買羅渣士嘅原因
因為車仔太有錢…真的非常有錢…而且有錢到不行…(講笑。)
今朝寫完羅渣士篇文，BlueCo用£117m正式埋單，留言區最先討論嘅唔係「佢值唔值」，而係另一條更加現實嘅問題：
「車路士唔係連歐洲賽都無咩，邊度嚟咁多錢？」
有巴打即刻撳起計數機：古古尼亞£50m、山度士£48m，再預埋查洛巴同馬蛇嗰筆賠償，減返Palestra同羅渣士，Net Spend好似只係二千幾萬，濕濕碎啦。
但另一邊又有人問：賣人唔係要扣返未攤銷嘅買入價咩？咁買人又可唔可以分期攤銷？如果條數真係咁鬆動，點解之前又話車仔財政繃緊？羅渣士突然上車，係咪代表安素已經半隻腳踏出史丹福橋？
結果一單轉會，留言區同時出現幾條完全唔同嘅數。最神奇係，大家又唔可以話完全錯，只係各自攞住現金流、Net Spend同會計帳目其中一角，然後當自己睇到成隻大笨象。
既然大家問到咁肉緊，我都唯有再次打開BlueCo本天書。
今篇唔講羅渣士值唔值，亦唔打算將大家浸死喺UEFA條文入面，只集中拆一條問題：一間下季無歐洲賽、早幾個月仲俾人擔心會爆數嘅車路士，究竟憑乜突然簽下一個£117m球員？
唔通真係唔使觀音借庫，BlueCo自己識印銀紙？
£117m唔係一炮過，但首先戴返個頭盔
計數之前要講明，我唔係車路士會計部職員，無睇過羅渣士份轉會合約，更加唔知道BlueCo銀行戶口有幾多錢。
外界目前知道嘅，只有媒體報道嘅£117m總價同合約年期。至於首期幾多、餘款分幾期、附加條款點計，全部無公開。所以我都只係其中一個摸象嘅人，今次只能按公開資料砌圖，唔會扮自己睇過BlueCo盤數。
但有一點可以肯定：£117m轉會費，