【車迷觀點】寫在細查加盟科木前 車仔史上最成功嘅超級水泡人
呢次，係細查喺我筆下第七次成為主角，恐怕亦係最後一次。
一個球員可以俾我寫足七鑊，如果佢唔係彭馬咁勁，就一定係好似山齊士咁好笑。但可惜細查無呢啲賣點，佢純粹係每次我以為已經幫佢寫完結案陳詞，車路士隔幾個月又重新定義佢一次。
由青訓後備、冠軍正選、純利資產、外借棄將、臨時消防員，再踢到成為隊內上陣最多嘅中堅。細查成段藍軍生涯，明明次次都似臨時拉伕，最後埋單竟然踢咗151場。
諗深一層，佢其實就係車路士史上最成功嘅超級水泡人。
球會年年都想買個潛力更高、數據更靚、更似未來答案嘅中堅返嚟。但每逢新答案受傷、失準或者仲未識答題，最後拎出嚟頂住檔先嗰個，又係細查。
普通水泡人頂兩場就功成身退，細查就由攝位開始，攝下攝下變成正選，甚至攝埋入決賽。等到球會覺得人腳終於齊整，又將佢放返入櫃桶，直到下一次防線穿窿。
今次唔想再淨係拗細查到底夠唔夠班。反而想睇清楚，一個從來無人預留位置俾佢嘅球員，究竟點樣一路執手尾，執出151場同幾個獎盃返嚟。
外借三次，返嚟第一季就參與四場決賽
細查喺Cobham成長，但佢從來唔係嗰種被鎂光燈注目嘅天才。由