【車迷觀點】車仔狂刷SSR先醒起缺張R卡 36歲軒達臣應唔應該免簽？
睇到個標題，應該有唔少巴打即刻咁諗：「你老味，同一個標題改少少就出PO，咁撚懶？」(講明，我打稿嘅時候只係HERE WE GO，未官宣嘅。)
係，我認自己懶。但懶得有原因，畢竟對我嚟講，韋碧克同軒達臣兩單轉會，好多地方確實相似到好似車路士體育總監一次過落咗兩張同款Order咁。
一個35歲，一個36歲；一個據報簽兩年，另一個亦簽到2028年。兩個都係英格蘭老將，踢過大球會，贏過重要錦標，熟悉英超，無乜升值空間，亦唔會有人期待佢哋突然爆Seed，再賣去沙特賺返三倍。
上篇文我先寫完，車路士狂刷咗幾年SSR幼齒卡，終於發現陣容入面需要一張知道自己應該做乜嘅R卡。點知文章出街無耐，球會就好似驚大家未聽清楚咁，再免簽多個軒達臣，將同一句說話用大聲公重複一次。
唯一唔同係，上篇我仲可以借白禮頓盡情抽水；今次軒達臣免費加盟，連轉會費都無得笑，逼住我要認真睇下佢仲識做啲乜。
老將還老將，前鋒同中場嘅老化方式從來唔一樣。所以今次雖然沿用同一個標題，內文就無得照抄。
36歲，但未退化成吉祥物
一講到軒達臣，最容易寫嘅當然係Leadership。
前利物浦隊長、英超冠軍、歐聯冠軍、英格蘭國腳，經歷過高普年代，由爭四一路贏到幾乎所有重要錦標。放入車路士呢間幼稚園，確實好容易令人幻想佢每日返工第一件事，就係逐個捉班𡃁仔入房，教佢哋紀律、犧牲、勝利文化同綁鞋帶方法。
呢啲嘢可能真係有用，但亦最難證明。始終更衣室無安裝球迷用嘅鏡頭，我哋無辦法統計軒達臣每90分鐘屌醒幾多個隊友，亦唔知一面冠軍獎牌可以激勵幾多個頹廢心靈。
反而上季喺賓福特，軒達臣至少證明咗自己唔係嚟呃人工。
佢英超